ނޫރައިން އެމްއެމްޕީއާރުސީގެ ޗެއާޕާސަން ކަމުން އިސްތިއުފާ ދެއްވައިފި

އެމްއެމްޕީއާރުސީގެ ޗެއާޕާސަން ކަމުގެ މަގާމުގައި ހުންނެވި އައިޝާ ނޫރައިން ޖަނާހު، އެ މަގާމުން އިސްތިއުފާ ދެއްވައިފި އެވެ.

ވީ ކިހިނެއް؟ - ނޫރައިން އެ މަގާމުން އިސްތިއުފާ ދެއްވިކަން މިއަދު ސަރުކާރުގެ އޮފިޝަލަކު 'ދައުރު'އަށް ކަށަވަރުކޮށްދެއްވި އެވެ.

ނަމަވެސް އޭނާ އިސްތިއުފާ ދެއްވި ސަބަބެއް ޔަގީނެއް ނޫނެވެ.

ފާހަގަކޮށްލެވޭ ކަމެއް - ނޫރައިންއަކީ، ރައީސް މުހައްމަދު މުއިއްޒުގެ ޓްރޭޑް އަދި އިންވެސްޓްމަންޓާ ގުޅޭ ގޮތުން ލަފާއެރުވުމަށް ހާއްސަ އެޑްވައިޒަރު ވިޔަފާރިވެރިޔާ، މުހައްމަދު އަލީ ޖަނާހުގެ ދަރިކަނބަލުންނެވެ.

ނޫރައިން ކުއްލި ގޮތަކަށް މަގާމުން އިސްތިއުފާ ދެއްވާފައިވާއިރު، ދުބާއީގައި މި މަހު ކުރީކޮޅު އޮތް އަރަބިއަން ޓްރެވެލް މާކެޓް(އޭޓީއެމް) ފެއާގައި އިނގިރޭސީ ބަހުން ދެއްވި އިންޓަވިއުއަކާ ގުޅިގެން ދިވެހިންގެ ތައުރީފް ސޯޝަލް މީޑިއާގައި އޭނާއަށް ލިބުނެވެ.

އޭނާއަށް ލިބުނު އެ މަގްބޫލުކަމާ ގުޅިގެން އެމްއެމްޕީއާރުސީގެ ބޭރުގެ އިތުރު އެހެން ފެއާއެއްގައި ނޫރައިން ބައިވެރި ނުކުރުމަށް ޓުއަރިޒަމް މިނިސްޓަރު ފައިސަލް އެންގެވި ކަމަށް ބުނެ ޗެނަލް-13އިން ވަނީ ރިޕޯޓުކޮށްފަ އެވެ. ނަމަވެސް ފައިސަލް އެކަން ދޮގު ކުރައްވާފައިވެ އެވެ.

"ކުރިއަށް އޮތް އައިޓީބީ ޗައިނާ ފެއާގައި ބައިވެރިވާ ރާއްޖޭގެ ވަފުދުގަ އިވެސް ނޫރައިން ބައިވެރިވާނެ. އިންތިޒާމްކޮށް ރޭވިގެން މި ސިނާއަތުގައި އިސްކޮށް ހަރަކާތްތެރިވާ ކަނބަލުންނަށް ޓާގެޓްކޮށްގެން މިފަދަ ދޮގު ވާހަކަތައް ފަތުރައިގެން އެކަނބަލުންގެ އަޒުމް ބަލިކަށި ނުކުރެވޭނެކަމުގެ ފުރިހަމަ ޔަގީންކަން އަޅުގަނޑަށް އެބައޮތް،" ފައިސަލް މީގެ ތިން ދުވަސް ކުރިން ފޭސްބުކްގައި ކުރެއްވި ޕޯސްޓެއްގައި ލިޔުއްވާފައިވެ އެވެ.