ސިވިލް ސާވިސް އިން ވަކިވި މުވައްޒަފުންނަށް އަލުން ފުރުސަތު ދެނީ

ސިވިލް ސާވިސްގައި މަސައްކަތް ކުރި މުވައްޒަފުންގެ ތެރެއިން އެކި ސަބަބުތަކާ ހުރެ ވަޒީފާ ދޫކޮށްލާފައި ތިބި މީހުންނަށް އަލުން ސިވިލް ސާވިސްގައި ވަޒީފާ އަދާކުރުމުގެ ފުރުސަތު ފަހިކޮށްދިނުމަށް ރައީސް މުހައްމަދު މުއިއްޒު ނިންމަވައިފި އެވެ.

ވީ ކިހިނެއް؟ - ރައީސް އޮފީހުން ބުނީ، އެކި ސަބަބުތަކާ ހުރެ ސިވިލް ސާވިސްގެ ވަޒީފާ ދޫކޮށްލާފައިވާ މީހުންނަށްް އަލުން ސިވިލް ސާވިސްގެ ވަޒީފާ އަދާކުރުމުގެ މަގު ފަހުކޮށްދިނުމަށް ރައީސް ނިންމެވީ އިއްޔެ ބޭއްވި ވަޒީރުންގެ މަޖިލީހުގެ ޖަލްސާގައި ރައީސް އޮފީހުން ހުށަހެޅި ކަރުދާހުގެ މައްޗަށް މަޝްވަރާ ކުރުމަށް ފަހު ކަމަށެވެ.

ތަފްސީލް - މި ނިންމުމާ ގުޅޭގޮތުން ރައީސް އޮފީހުން ބުނީ، ސިވިލް ސާވިސްގައި މުވައްޒަފުން ލިބުން ދަތި ދާއިރާތަކުގެ މަގާމުތަކާއި ވަގުތީ ގޮތުން މީހުން ބޭނުންވާ މަގާމުތަކުގައި ވަޒީފާއަދާކުރުމަށް ޝައުގުވެރިކަންހުރި، އެ ދާއިރާތަކުގައި ވަޒީފާއަދާކޮށް ވަޒީފާއިން ވަކިވެފައިވާ މީހުންގެ ދަފުތަރެއް އެކުލަވައިލުމަށް ނިންމާފައިވާ ކަމަށެވެ.

 މީގެ އިތުރުން ހަޔާ އެޑިޔުކޭޝަން ލޯން ސްކީމަށް ކަނޑައެޅޭ ބަޖެޓުގެ ތެރެއިން މަދުވެގެން %5 ހުރިހާ ދާއިރާއެއްގެ 'ހައިލީ ޓެކްނިކަލް ފީލްޑްތަކަށް' ހާއްސަ ކުރަން ވެސް އިއްޔެގެ ކެބިނެޓު ބައްދަލުވުމުގައި ނިންމާފައިވާ ކަމަށް ރައީސް އޮފީހުން ބުންޏެވެ.

ސިވިލް ސާވިސް މުވައްޒަފުންގެ ތެރެއިން ވަޒީފާ އިން ވަކިވެފައިވާ މީހުންގެ ތެރޭ ހިމެނޭ އަލުން މަސައްކަތަށް ނިކުންނަށް ބޭނުން މުވައްޒަފުންނަށް ވަޒީފާ ދޭން ނިންމެވީ؛

ރައީސް އޮފީހުން ބުނީ، ސިވިލް ސާވިސް މުވައްޒަފުން ހޯދުމުގައި ހުރި ދަތިތަކާއި ސިވިލް ސާވިސް އިން ހިއްސާކޮށްފައިވާ މައުލޫމާތުތަކަށް ބިނާކޮށް މުވައްޒަފުން ވަކިވާ ސަބަބުތަކާއި އެކަންކަމަށް ހައްލު ހޯދުމަށް ވެސް އިއްޔެގެ ކެބިނެޓުގައި މަޝްވަރާ ކޮށްފައިވާ ކަމަށެވެ.

ގުޅުން ހުރި -ނަރުހުން ހިމެނޭ ގޮތަށް، ސިއްހީ ދާއިރާ އިން އެކި ސަބަބުތަކާ ހުރެ ވަކިވެފައިވާ މުވައްޒަފުންނާއި ހިދުމަތުން ރިޔަޓަޔާ ކޮށްފައި ތިބި މީހުން އަލުން ހިދުމަތަށް ގެނައުމަށް ނިންމާ އެއާ ގުޅޭ އުސޫލެއްގެ ދަށުން ދަނީ މަސައްކަތް ކުރަމުންނެވެ.