ހަވާ އެރުވުންތަކަށް 8 ލައްކަ ރުފިޔާ ހަރަދުކޮށްފި

ރައްޔިތުންގެ މަޖިލީހުގެ އިންތިހާބު ކާމިޔާބު ކުރެއްވި ކެންޑިޑޭޓުން އުފާފާޅުކުމުގެ ގޮތުން މިހާތަނަށް މަދުވެގެން 800،000ރ. އަށް ވުރެ ބޮޑު ހޭދައެއް ކޮށްފައިވާކަން 'ދައުރު'އަށް އެނގިއްޖެ އެވެ.

ވީ ކިހިނެއް؟ - ވިޔަފާރި އުސޫލުން ރާއްޖޭގައި ހަވާއަރުވަނީ، އެމްއެންޑީއެފްގެ ވިޔަފާރި ކުންފުނި ސިފްކޯއިންނެވެ.

ސިފްކޯގެ ބައެއް މަސްދަރުތަކުން 'ދައުރު'އަށް އެނގިފައިވާ ގޮތުން މިދިޔަ ހަފްތާގެ އާދިއްތަ ދުވަހު ބޭއްވި މަޖިލިސް އިންތިހާބުގެ ވަގުތީ ނަތީޖާއާ އެކު ރެއާ ހަމައަށް ރާއްޖޭގެ ވިއްސަކަށް ދާއިރާގެ ކެންޑިޑޭޓުން ވަނީ ހަވާއަރުވައިފަ އެވެ.

ތަފްސީލު - ސިފްކޯއިން އާންމު ގޮތެއްގައި ހަވާއަރުވައިދެނީ މިނިޓެކަށް 1،000 ޑޮލަރު (15،420ރ.) އަށެވެ. އެ ކުންފުނިން ދޫކުރާ ޕެކޭޖު ނެގެނީ މަދުވެގެން ތިން މިނިޓަށެވެ.

އެނގިފައިވާ ގޮތުގައި މިފަހަރު ސިފްކޯއިން ވަނީ ކެންޑިޑޭޓުންނަށް ހާއްސަ ރޭޓެއްގައި ހަވާއެރުވުމުގެ ޕެކޭޖް ވިއްކައިފަ އެވެ. އެއީ:

 މި މައުލޫމާތުތަކާ ގުޅޭ ގޮތުން އެމްއެންޑީއެފްގެ ރަސްމީ ބަހެއް އަދި ނުލިބެ އެވެ.

އިންތިހާބުގެ ކާމިޔާބީއާ ގުޅިގެން އުފާ ފާޅުކުރުމަށް މިފަހަރު ހަވާއެރުވުން ފެށުނީ ސަރުކާރު ހިންގާ މައި ޕާޓީ، ޕީއެންސީއަށް ލިބުނު ސުޕަ މެޖޯރިޓީ ފާހަގަކުރަން މިދިޔަ ހޯމަދުވަހުގެ ރޭ އާޓިފިޝަލް ބީޗު ސަރަހައްދުގައި ބޭއްވި ހަރަކާތާ އެކު އެވެ. އެ ހަރަކާތުގައި ހަވާއެރުވީ ފަސް މިނެޓަށެވެ. އެހެންކަމުން ޖީއެސްޓީ %8އާ އެކު، އެރޭގެ ހަރަކާތަށް 800 ޑޮލަރުގެ ރޭޓުން ހަރަދުވާނީ، 4،320 ޑޮލަރު (66،614ރ.) އެވެ.

އޭގެ ފަހުން ހުޅުމާލެ އާއި ރާއްޖޭގެ އެކި ރަށްރަށުގައި ވެސް ހަވާއެރުވި އެވެ. ގިނަ ރަށްތަކުގައި ހަވާއެރުވީ ތިން މިނެޓަށެވެ.

އެ ހުރިހާ ރަށްތަކެއްގައި ހަވާއަރުވާފައި ވަނީ މަދުވެގެން ތިން މިނެޓަށް ކަމަށް ބަލާ ނަމަ، އެ ވިއްސަކަށް ސަރަހައްދުގައި އެކަމަށް މަދުވެގެން 826،000ރ. ހަރަދުވާނެ އެވެ.

ކެންޑިޑޭޓުން މި ކުރާ ހަރަދުތަކާ އެކު ސަރުކާރަށް ވެސް ފާޑުކުޔުން ވަނީ އަމާޒުވެފަ އެވެ. އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެކަމާ ބެހޭ ގޮތުން ނޫސްވެރިޔަކު ސުވާލުކުރުމުން އެ އޮފީހުގެ ތަރުޖަމާނު ހީނާ ވަލީދު ވިދާޅުވީ އެކަމަށް ހަރަދު ކުރަނީ ސަރުކާރުން ނޫން ކަމަށެވެ.

"އެއީ އެބޭފުޅުންގެ ޓީމުތަކާއި އެ ކެންޑިޑޭޓުންގެ އުފާފާޅުކުރުމަށްޓަކައި ކުރަމުންދާ ކަމެއް. އެއީ ސަރުކާރުގެ އެއްވެސް އަނެއްހެން ބައިވެރިވުމެއް އޮވެގެން ކުރާ ކަމެއް ނޫން،" ހަވާއަރުވަނީ ސަރުކާރުން ހަރަދުކޮށްގެންތޯ ނުވަތަ އެ ކެންޑިޑޭޓުން އަމިއްލައަށް ކުރާ ހަރަދެއްތޯ އެހުމުން ހީނާ ވިދާޅުވި އެވެ.