ދެން އެވެރިން ބުނާނީ ކައުންސިލާއި 2028ގެ ރިޔާސީ އިންތިހާބު ދޭން: ސޯލިހް

މި ސަރުކާރުގެ ވެރިން މަޖިލިސް އިންތިހާބަށް ފަހު ދެން ބުނާނީ ކައުންސިލް އިންތިހާބާއި 2028ގެ ރިޔާސީ އިންތިހާބު ވެސް ކާމިޔާބުކޮށްދިނުމަށް ކަމަށާއި މިވަގުތު  ހުރިހާ ކަމެއް ކުރަމުން ގެންދަނީ މި ވޯޓަށްޓަކައި އެކަނި ކަމަށް އިދިކޮޅު ލީޑަރު، ކުރީގެ ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

ވީ ކިހިނެއް؟ - އެމަނިކުފާނު މިގޮތަށް ވިދާޅުވީ އެމްޑީޕީގެ މަޖިލިސް ކެމްޕެއިން ނިންމާލުމަށް މިއަދު ހަވީރު މާލޭގައި ބޭއްވި ޕެރޭޑަށް ފަހު އާޓިފިޝަލް ބީޗްގައި ވާހަކަ ދައްކަމުންނެެވެ.

ބުނީ ކީކޭ؟- "ރައްޔިތުންގެ މަޖިލިސް ނިމުނީމަ ދެން ދައްކަވާނެ ވާހަކަ އަޅުގަނޑުމެންނަށް އެނގޭ. [ދެން ބުނާނީ] ކައުންސިލްގެ މެޖޯރިޓީ ދޭށޭ. އެ ނިމުނީމަ ދެން ބުނާނީ 2028ގެ ރިޔާސީ އިންތިހާބު ކަށަވަރުނުވަނީސް ތިމަންނައަަކަށް [ރައީސް މުހައްމަދު މުއިއްޒަށް] އެއް ކަމެއް ވެސް ކުރެވޭކަށް ނެތޭ،" ރާއްޖެއަށް ތަރައްގީ ގެނެވޭނީ ރައްޔިތުންގެ މަޖިލީހުގެ މެޖޯރިޓީ ސަރުކަރަށް ލިބިގެން ކަމަށް ރައީސް މުއިއްޒު ދައްކަވާ ވާހަކަފުޅަށް އިޝާރާތް ކުރައްވައި، ސޯލިހް ވިދާޅުވި އެވެ.

"ނަމަނަމަ، ތިބޭފުޅުން މި މަޅީގައި ނުޖެހޭތި!"

ތަފްސީލު - މި ކެމްޕެއިންގައި ރާއްޖޭގެ ވަރަށް ގިނަ ރަށްރަށަށް ދަތުރުކުރެވިއްޖެކަން ފާހަގަކުރައްވައި، ސޯލިހް ވިދާޅުވި ރައްޔިތުން ތިބީ ވަރަށް ބޮޑަށް "މާޔޫސްވެފައި" ކަމަށެވެ. ސަބަބެއް ކަމަށް ވިދާޅުވީ، ރައީސް މުއިއްޒު "ވެރިކަމަށް ވަޑައިގަތުމަށް ވެވަޑައިގެންނެވި ވައުދުތައް ނުފުއްދެވުން" ކަމަށެވެ.

"އިރާދަކުރެއްވިއްޔާ އާދިއްތަ ދުވަހު ބާއްވާ ރައްޔިތުންގެ މަޖިލިސް އިންތިހާބު ބޮޑު ތަނުން އެމްޑީޕީއަށް ކާމިޔާބުވާތަން އަޅުގަނޑަށް ފެނޭ،" ސޯލިހް ވިދާޅުވި އެވެ.

މިދިޔަ ސެޕްޓެމްބަރު މަހު ބޭއްވި ރިޔާސީ އިންތިހާބުގައި ރައީސް މުއިއްޒުއާ ވާދަކުރައްވައި ނާކާމިޔާބު ވެވަޑައިގެންނެވި ސޯލިހް ވިދާޅުވީ، އެމްޑީޕީން މިފަހަރު ނުކުމެ އޮތީ ރާއްޖެ ހަމަމަގަށް އެޅުވުމަށް ކަމަށެވެ. މިސްރާބު އޮތީ ހަމަމަގުން ކައްސާލާފައި ކަމަށް އެމަނިކުފާނު ތަކުރާރުކޮށް ވިދާޅުވި އެވެ.

"ރައްޔިތުންގެ މަޖިލީހުގެ މެޖޯރިޓީ އަޅުގަނޑުމެންނަށް ލިބުމާ އެކު، އިރާދަކުރެއްވިއްޔާ މި ސަރުކާރު ޖަވާބުދާރީ ކުރުމަށް ކުރަން ޖެހޭ ހުރިހާ ކަމެއް ކުރާނަން. ޒިންމާދާރު ކުރުވާނަން، ހަމަމަމަގަށް އަޅުވާނަން،" އެމަނިކުފާނު ވިދާޅުވި އެވެ.

ރައީސް މުއިއްޒު ވެރިކަމަށް ވަޑައިގަތީ "އެތައް ދޮގެއް ހައްދަވައިގެން" ކަމަށް ވިދާޅުވާ ވިދާޅުވުން މިއަދު ވެސް ތަކުރާރު ކުރައްވައި ސޯލިހް ވިދާޅުވީ "މިއަދު ވެސް ދަނީ ދޮގު ހައްދަވަމުން" ކަމަށާއި އެކަންކަން ހުއްޓުމަކަށް ގެންނަން ޖެހޭ ކަމަށެވެ.

ޑިމޮކްރެޓިކް ވެރިކަމަށް އަންނަ ބަޔަކު ވެރިކަން ކުރަން ޖެހޭނީ ރައްޔިތުން އެދޭ ގޮތަށްކަން ފާހަގަކުރައްވައި، ސޯލިހް ވިދާޅުވި ގޮތުގައި މި ސަރުކާރުން އެއާ މުޅިން އިދިކޮޅެވެެ.

އެއާއެކު ވިދާޅުވީ، ސަރުކާރު ހިންގަމުންދަނީ ހާމަކަން ކުޑަކޮށް، މައުލޫމާތުތައް ސިއްރުކޮށްގެން ކަމަށެވެ. އެގޮތުން ވިދާޅުވީ:

"ރިކަރަންޓް ހަރަދު އިންތިހާއަށް ބޮޑު. ސަރުކާރުގެ މާލިއްޔަތު ބޭނުންކޮށްގެން ކެމްޕެއިން ކުރުމަށް 100 މިލިއަނަށް ވުރެ ގިނަ ރުފިޔާ އެ ބޭފުޅުން ހަރަދުކޮށްފި،" އޭގެ މާބޮޑު ތަފްސީލެއް ނުދެއްވައި ސޯލިހް ވިދާޅުވި އެވެ.

އެމަނިކުފާނު ވިދާޅުވީ އެކަންކަމާ ގުޅޭ ގޮތުން "ސުވާލު ކުރިޔަސް ޖަވާބެއް ނުލިބޭ" ކަމަށެވެ.

"މިކަން ހަމައަކަށް އެޅުވޭނީ ރައްޔިތުންގެ މަޖިލިސް ތެރެއިން. އެހެންވެ އަޅުގަނޑުމެން ނުކުމެ މިތިބީ،" އެމްޑީޕީ ކެންޑީޑޭޓުން އެކަން ކުރާނެކަން ފާހަގަކުރައްވައި ސޯލިހް ވިދާޅުވި އެވެ.

އެއާއެކު އެމަނިކުފާނު އެދިވަޑައިގެންނެވީ އާދީއްތަ ދުވަހުގެ އިންތިހާބުގައި ރާއްޖޭގެ ހުރިހާ ރައްޔިތުން ވޯޓުލުމަށް ނުކުމެ، އެމްޑީޕީގެ ކެންޑިޑޭޓުންނަށް ވޯޓު ދިނުމަށެވެ.

"މިއީ، މާލޭގެ ރައްޔިތުންނަށް އަޅުގަނޑުމެން ދޫކުރި ގޯތިތައް ކަށަވަރުކުރުމަށް ދެވޭ ވޯޓެއް. މާލޭގައި ދިރިއުޅޭ ހުރިހާ ފަރާތްތަކަށް އަޅުގަނޑުމެން ދިން ފްލެޓްތަކުގެ ރަޖިސްޓްރީ ހޯދުމަށް ދެވޭ ވޯޓެއް [އަދި] ހުއްޓާލާފައިވާ ތަރައްގީގެ މަޝްރޫއުތައް ފެއްޓުމަށްޓަކައި ދެވޭ ވޯޓެއް،" ސޯލިހް ވިދާޅުވި އެވެ.

ސަރުކާރުގެ ކެންޑިޑޭޓުންނަށް ވޯޓު ދިނުން ސޯލިހް ސިފަ ކުރެއްވީ، "ތަރައްގީއާ އިދިކޮޅަށް ދެވޭ ވޯޓެއް"ގެ ގޮތުގަ އެވެ. އަދި ގޯއްޗާއި ފްލެޓް ލިސްޓު ސަރުކާރު "ބޭނުންހާ ގޮތަކަށް" ބަދަލު ކުރުމަށް ދެވޭ ވޯޓެއްގެ ގޮތުގަ އެވެ.

"މާލޭގެ ރައްޔިތުންނާއި މާލޭގައި ދިއިރުޅުއްވާ ރައްޔިތުން އަދި ރާއްޖޭގެ އެކި ކަންކޮޅުތަކުގައި އުޅުއްވާ ބޭފުޅުން މިކަމާ ފުންކޮށް ވިސްނަން ޖެހޭ،" އެމަނިކުފާނު އިތުރަށް ވިދާޅުވި އެވެ.

ސަރުކާރުގެ ސިޔާސަތުތަކަށް ފާޑުވިދާޅުވެ ވަހަކަ ދައްކަވަމުން ސޯލިހް ވިދާޅުވީ، މި ސަރުކާރުގައި އޮތީ "ކުދި ރަށްތައް ބާކީ ކުރުމުގެ ވިސްނުން" ކަމަށެވެ. އަދި މާލެއަށް ވެސް "ދައްކަނީ ދަޅަ" ކަމަށް އެމަނިކުފާނު ވިދާޅުވި އެވެ.