ރައީސްގެ އެކައުންޓަށް ފައިސާ ވަތް ކަމަށް ބުނާ މައްސަލަ ބަލަން އެމްޑީޕީ އާއި ޕީއެންއެފް އިން ގޮވާލައިފި

ރައީސް މުހައްމަދު މުއިއްޒު ހައުސިން މިނިސްޓަރަކަށް ހުންނަވަނިކޮށް ކޮރަޕްޝަންގެ އަމަލުތަކެއް ހިންގެވި ކަމަށް ބުނާ މައްސަލައެއް ފެންމަތިވެ، އެ ތުހުމަތުތައް ބަލަން އިދިކޮޅު އެމްޑީޕީ އާއި ޕީއެންއެފް އިން މިއަދު ގޮވާލައިފި އެވެ.

މައްސަލައިގެ ފެށުން - މި މައްސަލަ ފެންމަތިވީ، ކާކުކަން ނާންގައި 'ހަސަން ކުރުސީ'ގެ ނަމުގައި އެކްސްގައި ހަރަކާތްތެރިވާ އެކައުންޓަކުން، މި ކޮރަޕްޝަންއާ ގުޅުން ހުރި ކަމަށް ބުނެ ލިޔެކިޔުންތަކެެއް ރޭ ޕޯސްޓުކުރުމާ ގުޅިގެންނެވެ. 

އެނގުން މުހިއްމު - އެ ޑޮކިއުމަންޓްތަކާ ގުޅޭ ގޮތުން ރައީސް އޮފީހުގެ ބަހެއް އަދި ނުލިބެ އެވެ.

ވީ ކިހިނެއް؟ - އެމްޑީޕީ އާއި ޕީއެންއެފް އިން މިއަދު ވަކިވަކިން ބޭއްވި ނޫސްވެރިންގެ ބައްދަލުވުންތަކެއްގައި ވަނީ މި މައްސަލަ ބަލަން ގޮވާލައިފަ އެވެ.

ތަފްސީލު - މަޖިލިސް އިންތިހާބުގެ ކެމްޕެއިނަށް މާލެ އަތޮޅުގެ ރަށްރަށަށް ވަޑައިގަތުމުގެ ކުރިން މާލޭ އެއް ނަންބަރު ފާލަމުގައި ހުންނަވައި މިއަދު މެންދުރު ނޫސްވެރިންނާ ވާހަކަ ދައްކަވަމުން ޕީއެންއެފްގެ ވަގުތީ ސެނެޓް މެންބަރު، ކުރީގެ ނައިބު ރައީސް ޑރ. މުހައްމަދު ޖަމީލު އަހްމަދު ވިދާޅުވީ:

"އަޅުގަނޑު ގޮވާލަން އެމްޑީޕީ އަށާއި ރައްޔިތުންގެ މަޖިލީހުގެ މެންބަރުންނަށް މި މައްސަލަ މަޖިލީހަށް ހުށަހަޅުއްވައިދެއްވާށޭ. ހުށަހަޅުއްވައިގެން، އަޅުގަނޑުމެން އިންތިހާބަށް ދިޔުމުގެ ކުރިން މި މައްސަލައާ ބެހޭ ގޮތުން މަޖިލީހުގެ ކުއްލި ބައްދަލުވުމެއް ބާއްވައިގެން ވެސް އެބަ ޖެހޭ ބަހުސް ކުރަން،" ކުރީގެ ރައީސް އަބްދުﷲ ޔާމީންގެ ވަކީލުންގެ ޓީމުގައި ހިމެނިވަޑައިގެންނަވާ އިސް ވަކީލު ޖަމީލު ވިދާޅުވި އެވެ.

"މިއީ މަގުމަތީގައި ހުރި މީހަކަށް ކުރެވުނު ތުހުމަތެއް ނޫން. އަދި އޭގައި ހުރީ އާދައިގެ ތުހުމަތުތަކެއް ވެސް ނޫން."

ރައީސަށް ކުރެވޭ ސީރިއަސް ތުހުމަތުތަކެއް އެ ލިިޔެކިޔުންތަކުގައި ހުރިކަން ފާހަގަކުރައްވައި ޖަމީލު ވިދާޅުވީ، އެއީ "ބެލެވެން ޖެހޭ ކަންކަން" ކަމަށެވެ.

"އަޅުގަނޑު ދެކޭ ގޮތުގައި [ރައީސް] މުއިއްޒު އެބަ ޖެހޭ މަގާމުގެ މަސްއޫލިއްޔަތު ނައިބު ރައީސް [ހުސައިން މުހައްމަދު ލަތީފް]އާ ހަވާލުކުރައްވަން. މި ތުހުމަތުތަކުން ބަރީއަވަންދެން އަދި މައްސަލަ ތަހުގީގުކޮށް ނިމެންދެން މަސްއޫލިއްޔަތުން [އެމަނިކުފާނު] އެކަހެރިވާން ޖެހޭ،" ޔާމީންގެ ސަރުކާރުގެ އިންތިހާބީ ނައިބު ރައީސް ޖަމީލް ވިދާޅުވި އެވެ.

ޕީއެންއެފްގެ ނޫސްވެރިންގެ ބައްދަލުވުން ބޭއްވި ފަހުން، އެމްޑީޕީ އޮފީހުގައި އެ ޕާޓީން މަޖިލިސް ކެމްޕެއިނާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމުގައި ވެސް މުއައްސަސާތަކަށް ގޮވާލީ، ރައީސަށް ކުރެވޭ ތުހުމަތުތައް ބެލުމަށެވެ.

"މިނިސްޓަރަކަށް ހުންނެވިއިރު، އެ މިނިސްޓްރީގެ ބެލުމުގެ ދަށުން ރާއްޖޭގެ ބޮޑެތި ޕްރޮޖެކްޓަތައް ހިންގި ބޭރުގެ ނުފޫޒުގަދަ ކުންފުނިތަކުން ބޮޑެތި އަދަދުތަކުން ފައިސާ ހާއްސަކޮށް [ރައީސް] މުއިއްޒުގެ އަމިއްލަފުޅު އެކައުންޓަށް ޖަމާވިކަމުގެ އާންމުވެފައިވާ ތަފްސީލުތަކަކީ އަޅުގަނޑުމެން ވަރަށް ކަންބޮޑުވާ ކަމެއް،" އެމްޑީޕީގެ މަޖިލިސް ކެމްޕެއިން ތަރުޖަމާނު، ކެނދިކުޅުދޫ ދާއިރާގެ މެންބަރު އަހްމަދު އީސާ ވިދާޅުވި އެވެ.

"އަޅުގަނޑު ގަބޫލު ކުރާ ގޮތުގައި ޒިންމާދާރު ގޮތެއްގައި މިނިވަން މުއައްސަސާތަކުން މި މައްސަލަތައް ބަލައި ރައްޔިތުންނަށް ހަގީގަތް ސާފުކޮށްދޭން ޖެހޭ."

އީސަ ވިދާޅުވީ އެމްޑީޕީގެ ފަރާތުން މި މައްސަލަ މަޖިލީހަށް ހުށަހަޅައިގެން ވެސް ބަލާނެ ކަމަށެވެ.

"މިވަގުތު ރައީސް މުއިއްޒަށް ޝޯޝަލް މީޑިއާގައި ރައްޔިތުން ކުރަމުންދާ ތުހުމަތުތަކަކީ ހަގީގަތެއް ނަމަ، އެއީ ރައީސް މަގާމުން ދުރުކުރަން ރައްޔިތުންގެ މަޖިލީހަށް ލާޒިމް ވާނެ ކަމެއް،" އީސަ އިތުރަށް ވިދާޅުވި އެވެ.