އެންޓި ޑިފެކްޝަން ބިލް ރައީސް ތަސްދީގުކުރައްވައިފި

ޕާޓީގެ ޓިކެޓުގައި ރައްޔިތުން މަޖިލީހުގެ މެންބަރުކަމަށް އިންތިހާބުވާ މެންބަރުން ޕާޓީ ބަދަލުކުރުމުން މެންބަރުކަމުން އިސްތިއުފާ ދޭން ޖެހޭ ގޮތަށް ރައްޔިތުން މަޖިލީހުން ފާސްކުރި އެންޓި ޑިފެކްޝަން ބިލު ރައީސް މުހައްމަދު މުއިއްޒު މިއަދު ތަސްދީގުކުރައްވައިފި އެވެ.

ވީ ކިހިނެއް؟ - އެ ބިލު މަޖިލީހުން ފާސް ކުރިތާ ދެހަފްތާއެއްހާ ދުވަސްވީއިރު ވެސް ބިލު ފާސް ކުރުން ލަސްވެފައި ވާތީ ސިޔާސީވެރިން ކަންބޮޑުވުން ފާޅުކޮށްފައިވަނިކޮށް މިއަދު އެ ބިލު ރައީސް މުއިއްޒު ތަސްދީގު ކުރެއްވިކަން ރައީސް އޮފީހުގެ ވެބްސައިޓުގައި ވަނީ ހާމަ ކޮށްފަ އެވެ.

ބުނީ ކީކޭ؟ - ރައީސް އޮފީހުން ބުނީ ރައީސް އެ ބިލް ތަސްދީގުކުރެއްވުމާ އެކު އެ ގާނޫނު މިއަދު ވަނީ ސަރުކާރުގެ ގެޒެޓުގައި ޝާއިއުކޮށްފައި ކަމަށެވެ. އަދި އެއާ އެކު މިއަދުން ފެށިގެން އެ ގާނޫނަށް އަމަލުކުރަން ފަށާނެ ކަމަށް ވެސް ރައީސް އޮފީހުން ބުންޏެވެ. 

ތަފްސީލު - މެންބަރުން ގަނެވިއްކުން ހުއްޓުވުމުގެ ބޭނުމުގައި އިދިކޮޅު އެމްޑީޕީގެ ފަރާތުން މަޖިލީހަށް މިދިޔަ ފެބްރުއަރީ މަސް ތެރޭ ހުށަހަޅައި މި މަހު އެއް ވަނަ ދުވަހު 33 މެންބަރުންގެ ވޯޓާއެކު ބިލު ފާސްކުރީ އެންމެ ފަހުން ގޮނޑި ގެއްލުމަކީ އިހުތިޔާރީ ކަމަކަށްވާ ގޮތަަށެވެ. ބިލު މަޖިލީހަށް ހުށަހެޅިއިރު، ޕާޓީ ބަދަލު ކުރާ ހާލަތުގައި ގޮނޑި ގެއްލޭނެ ކަމަށް އެ ބިލުގައި ބުނެ އެވެ.

އެގޮތުން މިހާރު ގާނޫނުގައި އޮތް ގޮތުން އިސްތިއުފާ ދޭން ޖެހޭ ހާލަތްތަކުގެ ގޮތުގައި އޮތީ ބިލު ހުށަހެޅި އިރު ގޮނޑި ގެއްލޭނެ ކަމަށް ބަޔާންކޮށްފައިވާ މައިގަނޑު ތިން ހާލަތެވެ. އެއީ:

އެ ތިން ހާލަތުން ކުރެ ހާލަތެއް މެދުވެރިވެއްޖެ ނަމަ އެ މެންބަރަކު "މެންބަރުކަމުން އިސްތިއުފާ ދޭންވާނެ" ކަމަށް ގާނޫނުގައި ބުނެ  އެވެ. އިހުތިޔާރީ ކަމެއްގެ ގޮތުގައި އެ އިިބާރާތް ލިޔެފައިވާއިރު، އިސްތިއުފާ ނުދީފި ނަމަ އަމަލު ކުރާނެ ގޮތެއް ބަޔާންކޮށްފައެެއް ނުވެ އެވެ.

އޭގެ އިތުރުން، ކޮމިޓީ މަރުހަލާގައި ގާނޫނަށް ގެނެސްފައިވާ އިސްލާހުތަކުގެ ތެރޭގައި  ޕާޓީން އެ މެންބަރަކު ވަކިކުރާ ހާލަތުގައި އަމަލު ކުރާނެ ގޮތްތައް ބަޔާންކޮށްފައިވެ އެވެ. އެގޮތުން:

މަޖިލިސް މެންބަރުންގެ އިތުރުން، ކައުންސިލަރުންނާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެންބަރުންނަށް ވެސް މިފަދަ ހާލަތްތަކުގައި އިސްތިއުފާ ދޭން ވާނެ ކަމަށް ގާނޫނުގައި ބުނެ އެވެ.

އެނގުން މުހިންމު - މަޖިލިސް މެންބަރެއްގެ ގޮނޑި ގެއްލޭނެ ހާލަތްތައް ބަޔާން ކުރަނީ ގާނޫނުއަސާސީގެ 73 ވަނަ މާއްދާގެ (ނ)ގަ އެވެ. އިންތިހާބުވާ ޕާޓީ ބަދަލު ކުރުމާއި އެ ޕާޓީއަކުން ވަކިވުމުން، ގޮނޑި ގެއްލޭނެ ކަމަކަށް އެ މައްދާގައި ބަޔާންކޮށްފައެއް ނުވެ އެވެ.

ބައެއް ގާނޫނީ ބޭފުޅުން ދެކެވަޑައިގަންނަވާ ގޮތުގައި އެންޓި ޑިފެކްޝަން ބިލެއްގައި ގޮނޑި ގެއްލޭނެ ކަމަށް ބަޔާން ކުރެވޭނީ ގާނޫނުއަސާސީއަށް އެ ގޮތަށް އިސްލާހު ގެނެސްގެންނެވެ.