މަސްޖިދުލް ހަރަމްގައި ރޭ ތަރާވީހާއި ދަމުނަމާދުގައި ބައިވެރިވި މީހުން
މަސްޖިދުލް ހަރަމްއަށް ރޭ 2.5 މިލިއަން މީހުން ޖަމާވެ، ނަމާދުކޮށްފި
ރޭ މައްކާގެ މަސްޖިދުލް ހަރަމްއަށް ދުނިޔޭގެ އެކި ހިސާބުތަކުން 2.5 މިލިއަން އަޅުވެރިން ޖަމާވެ، ތަރާވީހު ނަމާދާއި ދަމުނަމާދު، ޖަމާއަތުގައި ފުރިހަމަކޮށްފި އެވެ.
ރޭގެ ދަމުނަމާދު އިމާމްވެ ކުރެއްވީ ހަރަމްފުޅުގެ އިސް އިމާމް އަބްދުއްރަހުމާން އަލް ސުދެއިސް އެވެ.
ރޯދަމަހުގެ ފަހު 10ގައި މަސްޖިދުލް ހަރަމް އޮންނަނީ ފުރި ބާރުވެފަ އެވެ. ހާއްސަކޮށް 27 ވަނަ ވިލޭރެއަށް ވުމުން މިސްކިތާއި މިސްކިތާ ގުޅިފައި އޮތް ސަރަހައްދުން މީހުން މަދުވުމެއް ނެތެވެ.
ސައުދީ އަރަބިއްޔާއިން ގެންދަނީ މަސްޖިދުލް ހަރަމް ހިމެނޭ ސަރަހައްދު ބޮޑުކޮށް، ޒަމާނީ ފެންވަރަށް ހަދަމުންނެވެ. މިހާރު ވެސް އެއީ ދުނިޔޭގައި އެންމެ ބޮޑު ހޭދައެއް ކުރި އެއް މަޝްރޫއު އެވެ. އެގޮތުން މަސްޖިދުލް ހަރަމްގެ ތަރައްގީއަށް ސައުދީން ހިންގާ މަޝްރޫއުއަށް 21 ބިލިއަން ޑޮލަރު (323 ބިލިއަން ރުފިޔާ) ހޭދަކުރި އެވެ.
