ފުލުހުން އަނިޔާކުރި ކަމަށް ބުނާ ކުއްޖާގެ ބައްޕަ ބަންދުކޮށްފި

ހޯމަ ދުވަހުގެ ރޭ ހުޅުމާލޭގައި ފުލުހުންގެ ޗެކް ޕޮއިންޓަކުން ސައިކަލެއް ހުއްޓުވަން އުޅުމުގެ ތެރޭގައި ފުލުހުން ޖެހި ކަމަށް ބުނާ ކުޑަކުއްޖާގެ ބައްޕަ ހައްޔަރުކޮށްފި އެވެ.

ވީ ކިހިނެއް؟ - ހުޅުމާލޭ ފޭސް 2ގައި ހިނގި އެ ހާދިސާގައި، ސައިކަލުގައި ތިބި މީހުންގެ ތެރެއިން ފަހަތުގައި އިން 17 އަހަރުގެ އަންހެން ކުއްޖާގެ ގައިގައި ސިގްނަލް ބެޓަންއިން ފުލުހުން ޖެހި ކަމަށް ބުނެ، އެ ސަރަހައްދުގައި އެ މައްސަލަ ވަރަށް ބޮޑަށް ހޫނުވި އެވެ.

ސޯޝަލް މީޑިއާގައި އެ ސީންގެ ވީޑިއޯ ފުޓޭޖު އާންމުވީ ފުލުހުން އެކަން ދޮގުކުރަމުން ދަނިކޮށެވެ. ވީޑިއޯ އާންމުވުމާ އެކު އެ މައްސަލައާ ގުޅޭ ގޮތުން ފުލުހުންގެ އިންޓާނަލް އިންވެސްޓިގޭޝަނެއް ކުރިއަށްގެންދަން ވަނީ ނިންމާފަ އެވެ.

އެ ހާދިސާގައި އަންހެން ކުއްޖާއަށް އެކިވަރުގެ އަނިޔާ ލިބުނެވެ.

ތަފްސީލު - އާއިލާގެ ފަރާތުން 'ދައުރު'އާ ވާހަކަ ދެއްކި މީހަކު ބުނި ގޮތުގައި ކުއްޖާގެ ބައްޕަ ފުލުހުންގެ ބެލުމުގެ ދަށަށް ގެންދިޔައީ އިއްޔެ ހަވީރުގެ ވަގުތެއްގަ އެވެ.

އެއީ ސީން ހިނގި ތަނުގައި ހުރި ފިހާރައަކުން ކެމެރާގެ ފުޓޭޖް ހޯދަން ގޮސް ތިއްބާ ކަމަށް ވެސް އޭނާ ބުންޏެވެ.

"ފުޓޭޖް ހޯދަން ދިޔައިމަ ފިހާރައިގައި ތިބި މީހުން ބުނީ [އެ ތަނުގެ] ވެރިން ހުއްދަ ދިނީމަ ދޭނަމޭ. ބުނީމަ އަހަރެމެން ފިހާރައިގެ ބޭރުގައި މަޑުކޮށްގެން ތިބީ،" އޭނާ ބުންޏެވެ.

ފިހާރައިގެ ބޭރުގައި ތިއްބާ އެ ހާދިސާ ހިނގި ރޭ އެތަނުގައި އުޅުނު ފުލުހުންގެ ބަޔަކަށް ފެނިގެން ގޮސް ބޮޑު މައްސަލައަކަށް އެކަން ހެދީ ކަމަށް އާއިލާއިން ބުނެ އެވެ.

ކުއްޖާގެ ބައްޕަ ހައްޔަރުކުރީ، އާއިލާއިން ބުނި ގޮތުގައި، ފުލުހުންގެ މަސައްކަތަށް ހުރަސް އެޅުމާއި އިންޒާރު ދިން ކަމުގެ ތުހުމަތުގަ އެވެ. އޭނާގެ ބަންދަށް ކްރިމިނަލް ކޯޓުން ފަސް ދުވަހުގެ މުއްދަތެއް ޖަހާފައިވާ ކަމަށް ވެސް އާއިލާއިން ބުންޏެވެ.

ޕޮލިސް މީޑިއާއިން ފޯނަށް ޖަވާާބު ނުދޭތީ މިކަމާ ގުޅޭ ގޮތުން ފުލުހުންގެ ބަހެއް އަދި ލިބޭގޮތެއް ނުވެ އެވެ.

އެނގުން މުހިންމު - ފުލުހުންގެ ތަރުޖަމާނު ޗީފް ސުޕްރިންޓެންޑެންޓް އޮފް ޕޮލިސް އަހުމަދު ޝިފާން އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވީ އެ ހާދިސާ ހިނގީ ފުލުހުން ގާއިމްކޮށްފައި ހުރި ވެހިކަލް ޗެކް ޕޮއިންޓަކާ އަރާ ހަމަވުމުން ސައިކަލުގެ ދުވެލި ބާރުކޮށް، ޗެކްޕޮއިންޓްގެ ފަހަތުގައި ތިބި ފުލުހުންގެ ގައިން ނައްޓާފައި ކުރިއަށް ދާން އުޅުމުގެ ތެރޭގައި ސައިކަލް ވެއްޓިގެން ކަމަށެވެ. ސައިކަލު ދުއްވަން އިނީ ލައިސަންސް ނެތް މީހެއް ކަމަށް ވެސް އޭނާ ވިދާޅުވި އެވެ.

ކަން ހިނގި ގޮތް ފެންނަ ވީޑިއޯ ސޯޝަލް މީޑިއާގައި އާންމުވީ އޭގެ ފަހުންނެވެ.