ސަރުކާރުން ހުށަހެޅި އެސްޑީއެފް ބިލަށް ވޯޓުލީ 2 މެންބަރުން؛ ރިޔާސަތުން ނިންމީ ބިލް ބޭރުކުރަން

ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ސޮވެރިން ޑިވެލޮޕްމެންޓު ފަންޑުގެ ބިލު މަޖިލީހަށް ބަލައިގަތުމަށް ނެގި ވޯޓުގައި އެންމެ ދެ މެންބަރުން ބައިވެރިވެ، މަޖިލީހުގެ ރިޔާސަތުގެ ވޯޓާ އެކު އެ ބިލު މަޖިލީހަށް ބަލައިނުގަނެ ބޭރުކޮށްލައިފި އެވެ.

ވީ ކިހިނެއް؟ - މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި އެ ބިލު ބަލައިގަތުމަށް ނެގި ވޯޓުގައި ބައިވެރިވެ ވަޑައިގަތީ ކެލާ ދާއިރާގެ މެންބަރު އިބްރާހިމް ޝަރީފާއި މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) އެވެ.

ތަފްސީލް - ވޯޓުގެ ނަތީޖާ އެއްވަރުވުމުން، މަޖިލީހުގެ ގަވައިދު އޮންނަ ގޮތުން ރިޔާސަތުން ވަނީ އެ މައްސަލާގައި ގޮތެއް ނިންމުމަށް ވޯޓު ލައިފަ އެވެ. ރިޔާސަތުގައި އިންނެވި މަޖިލީހުގެ ނައިބު ރައީސް ހޯރަފުށި ދާއިރާގެ މެންބަރު އަހުމަދު ސަލީމް ވޯޓު ދެއްވީ އެ ބިލު ބަލައިގަތުމަށް ނުފެންނަ ކަމަށެވެ.

ސޮވެރިން ޑިވެލޮޕްމެންޓް ފަންޑުގެ ބިލަކީ ރައީސް މުހައްމަދު މުއިއްޒުގެ ސަރުކާރުން ރައްޔިތުންގެ މަޖިލީހަށް ހުށަހެޅި ފުރަތަމަ ބިލެވެ.

ބިލުގެ ވޯޓަށް އެހިއިރު، މަޖިލީހުގައި ތިއްބަވާ ސަރުކާރު ތަމްސީލު ކުރާ މެންބަރު ތަޅުމުގައި ވަޑައިގެން ނެތެވެ. އިދިކޮޅު އެމްޑީޕީ އާއި ޑިމޮކްރެޓްސްގެ އިތުރު މެންބަރުން ތަޅުމުގައި ތިއްބެވި ނަމަވެސް ވޯޓުގައި ބައިވެރިވަޑައިގެންފައެއް ނުވެ އެވެ.

"ރައްޔިތުންގެ މަޖިލީހުގައި އެބަ ތިއްބަވާ ޖުމްލަ 80 މެންބަރުން. ހާޒިރުވެ ތިއްބެވި މެންބަރުންގެ އަދަދަކީ 28. ފެންނަ ކަމަށް ވޯޓު ދެއްވި މެންބަރުންގެ އަދަދު 1. ނުފެންނަ ކަމަށް ވޯޓު ދެއްވި މެންބަރުންގެ އަދަދު ވެސް އެއީ1،" މިއީ އާދަޔާ ހިލާފު ނަތީޖާއެއް ކަމަށް މަޖިލީހުގެ ރިޔާސަތުން އިއުލާނު ކުރެއްވި އެވެ.

"އަޅުގަނޑަކަށް ނޭނގެ ރައްޔިތުންގެ މަޖިލީހުގެ ތާރީހުގައި އަދި މިފަދަ ވޯޓެއް މިގޮތަށް ނެގުނު ކަމެއް،" މަޖިލީހުގެ ނައިބު ރައީސް ސަލީމް ވިދާޅުވި އެވެ.

"އަޅުގަނޑު މިއާއެކީ ފާހަގަކޮށްލަން ބޭނުންވޭ މި ބިލު ހުށަހެޅުއްވީ ސަރުކާރުގެ ފަރާތުން. އަޅުގަނޑު ތަކުރާރުކޮށް ދަންނަވަމުން މި ދިޔައީ މިއަދު މި ގަޑީގައި ވޯޓު އޮންނާނެ ކަމަށް. އަޅުގަނޑުމެންނަށް ފްލޯ އިން މި ފެންނަނީ ސަރުކާރުގެ އެއްވެސް މެންބަރަކު، ހަމަ އެއްވެސް މެންބަރަކު ވަޑައިގެން ނެތްކަން،" ބިލުގެ މުހިއްމުކަން ސަރުކާރުގެ މެންބަރުންގެ ފަރާތުން ނުފެންނަ ކަމަށް ވިދާޅުވެ ބިލު ބަލައިގަންނަން ނުފެންނަ ކަމަށް ވޯޓު ދެއްވައި ރިޔާސަތުން އިއުލާނު ކުރެއްވި އެވެ.

އެނގުން މުހިއްމު- ސަރުކާރުގެ ފަރާތުން ހުށަހެޅި ސޮވެރިން ޑިވެލޮޕްމެންޓް ފަންޑުގެ ބިލުގެ އެންމެ ބޮޑު މަގްސަދަކީ، އެ ފަންޑަށް ގާނޫނީ ބާރެއް  ދިނުމެވެ.

މަޖިލީހުން ބަލައިނުގަނެ ބޭރުކޮށްލި އެ ބިލުގައިވާ ގޮތުން ސޮވަރިން ފަންޑުގައި ހުންނަ ފައިސާ ބޭނުންކުރެވޭނީ އެ ގާނޫނުގައި ކަނޑައަޅާ ގޮތުގެ މަތިން، ގަވަނިން ކައުންސިލްގެ ލަފަޔާ އެކު ރައީސްގެ ހުއްދަ ލިބިގެންނެވެ. އަދި ފަންޑަށް ޖަމާވާ އާމްދަނީ ބަޖެޓުގައި ހިމަނަން ޖެހޭނެ ކަމަށާއި އެއްވެސް ހަރަދެއް ކުރަންވާނީ ވެސް ބަޖެޓުގައި ހިމަނައިގެން ކަމަށް އެ ބިލުގައިވެ އެވެ.

ގަވަނިން ކައުންސިލް އެކުލަވާލައި، މެމްބަރުން އައްޔަންކުރައްވައި، ވަކިކުރައްވާނީ ވެސް ރައީސް އެވެ.