ފަތުރުވެރިޔާ އަތުުން ވައްކަން ކުރުން: ޓޫރިޒަމަށް އަސަރުކުރާނެތީ ކައުންސިލްގެ ކަންބޮޑުވުން

ފަތުރުވެރިކަމުގައި ފުވައްމުލަކަކީ ރާއްޖޭގެ ބްރޭންޑަކަށް ހަދަން އެ ރަށުގެ ކައުންސިލުން ބުރަ މަސައްކަތްތަކެއް ކުރަމުން އަންނަނިކޮށް އެ ރަށަށް ގޮސް އުޅުނު ފަތުރުވެރިއެއްގެ އަތުން އަގުބޮޑެތި މުދާތަކެއް ވަގަށް ނެގި ހާދިސާއެއް ފެންމަތިވުމުން ރަށު ކައުންސިލުން ކަންބޮޑުވުން ފާޅުކޮށްފި އެވެ.

ވީ ކިހިނެއް؟ - ފުވައްމުލަކަށް ގޮސް އުޅުނު ބްރެޒިލް ފަތުރުވެރިއެއްގެ އަތުން ޑްރޯންއަކާއި ފައިސާތަަކެއް އިއްޔެ ނެގި ވައްކަމުގެ ހާދިސާ ހިނގި ގޮތް ފަތުރުވެރިޔާ ކިޔައިދޭ ވީޑިއޯއެއް ވެސް ސޯޝަލް މީޑިއާގައި ވަނީ އާންމުވެފަ އެވެ.

ތަފްސީލް - މި މައްސަލައާ އެކު ފުވައްމުލަކު ސިޓީ ކައުންސިލުން ވަނީ ކަންބޮޑުވުން ފާޅުކޮށްފަ އެވެ. ހާއްސަކޮށް ފަތުރުވެރިކަމުގެ މަންޒިލެއްގެ ގޮތުގައި ފުވައްމުލައް އިޝްތިހާރު ކުރުމަށް ކައުންސިލުން ކުރާ މަސައްކަތަށް މީގެެ ސަބަބުން ގޮންޖެހުން ކުރިމަތިވެދާނެކަން ކައުންސިލުން ގަބޫލު ކުރެ އެވެ.

"މި ރަށުގައި ވައްކަމަކީ ހިނގާ ކަމެއް. އެހެން ނަމަވެސް ފަތުރުވެރިއެއްގެ އަތުން މިގޮތަށް ވައްކަން ކުރީމާ އެ ވާހަކަ ފެތުރި ފަތުރުވެރިކަމަށް އަސަރު ކުރާނެ،" ފުވައްމުލަކު މޭޔަރު އިސްމާއިލް ރަފީގު ވިދާޅުވި އެވެ.

އޭނާ ވިދާޅުވީ ގޮނޑުދޮށް ފަދަ އާންމު ތަންތަނުގައި އަގުބޮޑެތި ސާމާނު ނުބެހެއްޓުމަށް ފަަތުރުވެރިންގެ މެދުގައި ހޭލުންތެރިކަން އިތުރު ކުރުމަށް ގެސްޓުހައުސްތަކާ ގުޅިގެން މަސައްކަތްތައް ކުރާނެ ކަމަށެވެ.

"ކުރިއަށް އޮތްތަނުގައި ފުލުހުންނާ ގުޅިގެން ކުށުގެ ވެށި ރަނގަޅު ކުރަން ވެސް މަސައްކަތް ކުރާނަން. ޓޫރިސްޓް ޕޮލިސް ތައާރަފު ކުރުމާއި މަގުތައް އަނދިރިކޮށް ހުރުން ފަދަ ކަންކަން ހައްލުކޮށް ފަތުުރުވެރިން ހޭލުންތެރި ކުރުން ވެސް،" އޭނާ ވިދާޅުވި އެވެ.

އެނގުން މުހިއްމު - ފުވައްމުލަކަށް ގޮސް އުޅުނު ފަތުރުވެރިއަކު ގެންގުޅުނު ޑްރޯން އަކާއި އޭނާގެ ދަބަސްތަކެއް ވަގަށް ނެގި މައްސަލަ ފުލުހުން ދަނީ ތަހުގީގު ކުރަމުންނެވެ. އެ މައްސަލާގައި މިހާތަނަށް އެއްވެސް މީހަކު ހައްޔަރެއް ނުކުރެ އެވެ. ފުލުހުން އިއްޔެ ބުނެފައިވަނީ އެކަމުގައި ޝާމިލުވާ މީހުން ދެނެގަނެވިފައިވާ ކަމަށެވެ.

ފަތުރުވެރިޔާ ބުނެފައިވާ ގޮތުން އޭނާ ބީޗުގައި ބަހައްޓާފައި ހުއްޓާ ވަގަށް ނެގި ސާމާނުގެ ތެރޭގައި އޭނާގެ ޑްރޯން އާއި ފޯނުގެ އިތުރުން ކްރެޑިޓް ކާޑުތަކާއި 1،500ރ. އާއި 200 ޑޮލަރު ހިމެނެ އެވެ.