އިންޑިއާއަށް 'ބުލީކުރި' ޑެޕިއުޓީން ވަކިނުކުރާތީ ޔާމީންގެ ފާޑުކިއުން

އިންޑިއާގެ ބޮޑުވަޒީރު ނަރެންދުރަ މޯދީ އަށާއި އިންޑިއާއަށް ބަދުބަސް ބުނެ، މަލާމާތްކުރި މައްސަލާގައި ސަސްޕެންޑުކޮށްފައި ތިބި މި ސަރުކާރުގެ ތިން ޑެޕިއުޓީ މިނިސްޓަރުން ވަޒީފާއިން ވަކިނުކުރާތީ ކުރީގެ ރައީސް އަބްދުﷲ ޔާމީން ރޭ ފާޑުވިދާޅުވެއްޖެ އެވެ.

ވީ ކިހިނެއް؟ - މި ސަރުކާރު ގެންނަން މަސައްކަތް ކުރެއްވުމަށް ފަހު، އިންތިހާބު ކާމިޔާބުވުމާ އެކު ޖެހުނު މައްސަލަތަކެއްގެ ތެރެއިން ޕީޕީއެމްއިން ވަކިވެޑައިގެން އާ ޕާޓީއެއް އުފެއްދެވުމުގައި މިހާރު އުޅުއްވާ ޔާމީން މިހެން ވިދާޅުވީ، ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް އެމަނިކުފާނުގެ ތާއީދާ އެކު ކުރިމަތިލާ ކެންޑިޑޭޓުންނާ އެކު ރޭ ބޭއްވި ޖަލްސާގަ އެވެ.

ކެންޑިޑޭޓުންނަށް ސުވާލުކުރަން ފުރުސަތު ލިބޭ ގޮތަށް ބާއްވާ އެ ޖަލްސާގައި، ޖަލު ހުކުމްގައި ހުންނެވިޔަސް ގެއަށް ބަދަލުކޮށްފައިވާ ޔާމީން ކޮންމެ ރެއަކު ވެސް ބައިވެރިވެވަޑައިގެން ސުވާލުކުރައްވައި ހައްދަވަ އެވެ. އަދި އެގޮތަށް ކުރައްވާ ސުވާލުތަކުގައި ނުސީދާކޮށް ސަރުކާރަށް ވަރަށް ބޮޑަށް ފާޑުވިދާޅުވާ ތަން ފެނެ އެވެ.

ޑެޕިއުޓީ މިނިސްޓަރުން މަގާމުން ވަކިނުކުރާތީ ރޭ ފާޑުވިދާޅުވީ ވެސް އެގޮތަށް ކުރެއްވި ސުވާލެއްގެ ތެރެއިންނެވެ.

ބުނީ ކީކޭ؟ - ޔާމީން ވިދާޅުވީ ޗައިނާގެ ދަތުރުފުޅަށް ފަހު ނޫސްވެރިންނާ ބައްދަލުކުރައްވައި އިންޑިއާއިން ރާއްެޖެއަށް 'ބުލީ' ކުރަނީ ކަމަށް ދޭހަވާ މޭރުމަކުން ރައީސް މުހައްމަދު މުއިއްޒު ވާހަކަފުޅު ދެއްކެވި ކަމަށެވެ. ނަމަވެސް ސަރުކާރުގެ ޑެޕިއުޓީ މިނިސްޓަރުން ވެސް އިންޑިއާ ރައްޔިތުންނާ ދިމާލަށް ބޭއަދަބީ ބަހުރުވައިން މުހާތަބުކޮށް ބުލީކޮށްފައިވާ ކަމަށް ޔާމީން ވިދާޅުވި އެވެ.

"ވަރަށް ބުލީކޮށްފި ނޫންތޯ. ސަރުކާރުގެ ހަމަ ވަރަށް މަތީ ފަންތީގެ ދެ ޑެޕިއުޓީ މިނިސްޓަރުން އިންޑިއާ ރައްޔިތުންނާ ދިމާލަށް ވަރަށް ބޭއަދަބީ ބަހުރުވައިން މިކަންކަން ކުރަނީ،" ވަކި ބޭފުޅެއްގެ ނަން ނުގެންނަވައި ޔާމީން ވިދާޅުވި އެވެ.

ޔާމީން ވިދާޅުވީ އެގޮތަށް ކަން ކުރުމުން، ރަސްމީކޮށް މައާފަށް އެދުން ނުވަތަ އެކަން ކުރި މީހުން ވަޒީފާއިން ވަކިކުރަން އިންޑިއާއިން ހުށަހެޅި ކަމަށެވެ. އެކަމަކު އެކަން ސަރުކާރުން މިހާތަނަށް ނުކޮށް، އެ ދެ ޑެޕިއުޓީން ތިއްބެވީ ސަސްޕެންޑުކޮށްލައިގެން ކަމަށް ޔާމީން ވިދާޅުވި އެވެ.

"މިހާރު އެ ދެ މުވައްޒަފުން އެ ތިބީ އަނެއްކާވެސް ޑެޕިއުޓީ މިނިސްޓަރުންގެ ލެވަލްގައި އިނގޭތޯ. އެހެންވީމައި ދިވެހި ސަރުކާރުން ނޫނީ ސަރުކާރު ތަމްސީލުކުރަން ތިބި މަތީ ފެންވަރުގެ މީހުން ވެސް އިންޑިއާ މީހުން ބުލީކުރުމަށްޓަކައި ބައެއް ކަންތައްތައް ކޮށްފި އިނގޭތޯ،" ޔާމީން ވިދާޅުވި އެވެ.

އެ ހުރިހާ ކަމެއް ހިނގާދިޔައިރު ވެސް ދެ ގައުމުގެ ދެމެދުގައި ވާހަކަދައްކައިގެން ކޮންމެވެސް އެއްގޮތަަކަށް މައްސަލަ ހައްލުނުވެގެން އުޅެނީ ކީއްވެތޯ ޔާމީން ސުވާލު އުފެއްދެވި އެވެ.

އެނގުން މުހިންމު - ލަކްޝަދީބްގެ ފަތުރުވެރިކަން ކުރިއެރުވުމާ ގުޅޭ ގޮތުން މޯދީ އާއްމުކުރެއްވި ވީޑިއޯއަަކަށް ފާޑުވިދާޅުވި ޔޫތު މިނިސްޓްރީގެ ޑެޕިއުޓީ މިނިސްޓަރުންގެ މަގާމުގައި ތިއްބެވި މަރިޔަމް ޝިއުނާ އާއި މަލްޝާ ޝަރީފްގެ އިތުރުން، އެހެން ބޭފުޅަކު ވެސް ސަސްޕެންޑް ކުރި އެވެ.

ސަރުކާރުގެ އިސް މަގާމުތަކެއް ފުރުއްވަން ތިއްބެވި ޑެޕިއުޓީންތަކެއް އެހެން ގައުމެއްގެ އިސް ބޭފުޅަކަށް އެގޮތަށް ފާޑުވިދާޅުވުމުން، ސަރުކާރަށް އަމާޒުވާން ފެށި ފާޑުކިއުންތަކާ ގުޅިގެން އެ ތިން ބޭފުޅުން ސަސްޕެންޑު ކުރީ މުސާރަ ހިނގާ ގޮތަށެވެ. އަދި ތިން ބޭފުޅުން ވަކިކުރުމާ މެދު ސަރުކާރުން އަދިވެސް ގޮތެއް ނުނިންމަ އެވެ.

ސަސްޕެންޝަނުގައި ހުންނަވަނިކޮށް ވެސް ނުކުޅެދުންތެރިކަން ހުންނަ މީހަކަށް، ޝިއުނާ ސޯޝަލް މީޑިއާ ގަނާކުރި މައްސަލައެއް މިފަހުން ފެންމަތިވި އެވެ.