ނުކުޅެދުންތެރިކަން ހުރި ދަރިފުޅަށް ބަހުގެ އެއްވެސް ފަސިންޖަރަކު ގޮނޑިއެއް ނުދެއްކި، ބަދަލުގައި މަލާމާތް

އޯޓިސްޓިކް ދަރިފުޅުގެ ތެރަޕީ ނިންމާލުމަށް ފަހު، އިއްޔެ އައިމިނަތު ނިޝީ ބަސް ސްޓޮޕްގައި މަޑުކޮށްގެން ހުރީ ބަހުގައި ގެއަށް ދިޔުމަށެވެ. ގާތްގަނޑަކަށް ގަޑިއިރެއްހާއިރު ފަހުން އުޅަނދު އައިއިރު ބަސް އޮތީ އެއްކޮށް ފުލްވެފަ އެވެ. ނަމަވެސް އޭނާ އެއަށް އެރީ، ހާއްސަ އެހީއަށް ބޭނުންވާ މީހުންނަށް ގޮނޑި ހާއްސަކޮށްފައި ހުންނާނެތީ އެތަނުން ޖާގަ ހޯދުމަށެވެ.

އައިމިނަތަށް ފެނުނީ، އެ ގޮނޑިތަކުގައި ވެސް އެހެން މީހުން އިށީނދެގެން ތިބި ތަނެވެ. އުނދަގުލުން ދަރިފުޅު ބަހަށް އަރުވައި، އިށީންނާނެ ތަނެއް ނުފެނިގެން އުޅުނު އިރު ވެސް އެއިން މީހަކު ގޮނޑިން ހިއްލާ ވެސް ނުލަ އެވެ. އެންމެ ފަހުން ޑްރައިވަރާ ވަރަށް ވާހަކަ ދައްކައިގެން، ދަރިފުޅު ބައިންދަން ލިބުނީ، ބަހުގެ އެހީތެރިޔާ އިންނަ ގޮނޑި އެވެ. އައިމިނަތު ހުރީ ދަރިފުޅު ކައިރީގައި ކޮޅަށެވެ.

"ބަސް ސްޓޮޕް އައުމުން، އަނެއްކާވެސް ގޮނޑިއެއް ލިބޭތޯ އަޅުގަނޑު މަސައްކަތް ކުރިން. އެކަމަކު އެއްވެސް މީހަކު ގޮނޑިއެއް ނުދިން،" ސޯޝަލް މީޑިއާގައި ކުރި ދިގު ޕޯސްޓެއްގައި އައިމިނަތު ކިޔައިދިނެވެ.

ނުކުޅެދުންތެރިކަން ހުންނަ ކުއްޖާއަށް އެ ބަހުން ގޮނޑިއެއް ނުލިބުނެވެ. އެފަދަ މީހުންނަށް ހާއްސަކޮށްފައިވާ ގޮނޑިތަކުގައި އިށީނދެގެން ތިބީ ކުޅެދޭ މީހުންނެވެ. އެކަމަކު އެއަށް ވުރެ ބޮޑަށް އައިމިނަތުގެ ހިތަށް އަސަރުކުރީ، އޭނާގެ ދަރިފުޅު ލައްވާލި އަޑަކަށް، ބަހުގައި ތިބި މީހުން އެ ކުއްޖާއަށް ބަލައި ހީހެދުމެވެ.

"މިފަދަ ބެލުންތަކާ އަޅުގަނޑުމެން ކުރިމަތިލަނީ ވަރަށް ކެތްތެރިކަމާ ހިތްވަރާ އެކީ. އެކަމަކު ފާހަގަވީ ގިނަ އިންސާނުންގެ އޯގާތެރިކަމުގެ ކަންފުޅެއް ވެސް ނެތްކަން،" އެ މަންމަ ލިޔުނެވެ.

އައިމިނަތުމެން ދަތުރު ކުރި އެ ބަސް ދެން މަޑުކުރި ބަސް ސްޓޮޕުން ވެސް، ނުކުޅެދުންތެރިކަން ހުންނަ ކުއްޖަކު އެއަށް އެރި އެވެ. ބަސް އާދޭތޯ، އެ މީހުން ވެސް ގަޑިއެއްހާއިރު އިންތިޒާރު ކުރަން ޖެހުނު ކަމަށް އެ މީހުންނާ ހަވާލާދީ އޭނާ ބުންޏެވެ.

ނުކުޅެދުންތެރިކަން ހުންނަ މީހުންނަށް ހާއްސަކޮށްފައިވާ ގޮނޑިތަކުން ޖާގަ ލިބެން ޖެހޭނެ ކަމަށް ބުނެ އެމީހުން ބަހަށް އެރި ނަމަވެސް އެ ގޮނޑިތަކުގައި ތިބީ އެހެން ބައެކެވެ. 

"އޭރު އަޅުގަނޑުގެ ފަހަތުގައި އިށީނދެގެން ތިބި ބޮޑު ދެ އަންހެނުން. ވަރަށް ރުޅިއައިސްފައި އެ މީހުން ބުނި އަޑުއިވުނު، ތިޔަ ބުނާ ގޮނޑިއެއް މިޔަކު ނުހުންނާނޭ. ކަލޭމެން ނުކުޅެދޭ މީހުން ގޭގެ އެނދުމަތީގައި ތިބީމައި ނިމުނީނޫންހޭ،" އައިމިނަތު ލިޔުނެވެ.

"އެ އަޑު އިވުމުން ހަމަ ރޮވުނު. ވަރަށް ހިތަށް އަސަރު ކުރި. ހިތަށްއެރީ ހާދަ ރަހުމް ކުޑަ ބަޔެކޭ. އިންސާނިއްޔަތުގެ ކަންފުޅެއް ވެސް ނެތީ ބާވައޭ."

އެ ދަތުރު ނިމެންދެން އޭނާގެ ހިތް އޮތީ ޝަކުވާ އާއި ސުވާލުތަކުން ފުރިފަ އެވެ. އޭނާ ލިޔުނެވެ.

"މިއަދު ތިބާ ކުޅެދޭ މީހަކަސް މާދަމާގެ ހާލަތު އެނގޭ ހެއްޔެވެ؟"

"މި ކުދިންނަށްޓަކައި އަޅުގަނޑުމެން މި އުފުލާ ބުރަޔާއި ގުރުބާނީ، ކުޑަ މިންވަރެއް ވެސް ވަޒަންކުރެވޭތޯ އެވެ."

"މި ދަރިން އެންމެ ފަހަރަކު ވެސް މަންމާއޭ ކިޔާފައި ގޮވާލާތޯ އަޅުގަނޑުމެން މި ކުރާ ދުއާ އާއި ހޭދަ އެނގޭ ހެއްޔެވެ؟"

"ތިޔަ ބުނެލާ ބަސްތައް އެ ކުއްޖާއަށް ނީވިދާނެ. އެކަމަކު އެ ދަރިފުޅުގެ ހައްގުގައި މުޅި ދިރިއުޅުން ގުރުބާން ކުރާ މަންމަގެ ހިތަށް ކުރާނެ އަސަރު އިހުސާސްކޮށްލި ނަމަ،" އައިމިނަތު ލިޔުނެވެ.

އެމްޓީސީސީގެ ބަހުގައި، ނުކުޅެދުންތެރިކަން ހުންނަ މީހުންނަށް ގޮނޑިތަކެއް ހާއްސަކޮށްފައި ހުރެ އެވެ. އަދި އެކަން އަންގައިދިނުމަށް ލޭބަލްކޮށްފައި ވެސް ހުރެ އެވެ. އެކަމަކު އައިމިނަތުގެ އެދުމަކީ، އެއަށް ވުރެ އެ ނިޒާމް ހަރުދަނާކޮށްދީ، އޭގެ ހައްގުވެރިންނަށް އޭގެ ބޭނުން ހިފޭނެ ގޮތް ހަދައިދިނުމެވެ. ނުކުޅެދުންތެރިކަން ހުންނަ މީހުންގެ ފަސޭހައަށް ކޮށްދޭން ބުނާ ވައުދުތައް ރަނގަޅު ގޮތުގައި ފުއްދައިދިނުމެވެ.