ރާއްޖެއިން އައިސީޖޭގައި: 'އިޒްރޭލުން ހިންގަނީ ނަސްލެއް ނައްތާލުމުގެ ޖަރީމާއެއް'

ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުން ދާ އަމަލުތަކަކީ ނަސްލު ނައްތާލުމުގެ ޖަރީމާތަކެއް ކަމަށް ރާއްޖެއިން ބައިނަލްއަގުވާމީ ކޯޓް، އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)ގައި ސިފަކޮށް އިންސާފު ގާއިމްކުރުމަށް ރާއްޖެއިން އެ ކޯޓުގައި އެދިއްޖެ އެވެ.

ވީ ކިހިނެއް؟ - އިޒްރޭލުން ފަލަސްތީނުގެ ބިންތައް ހިފައި ޒަޔަނިސްޓުން ވަޒަންވެރި ކުރުވަމުން ދާތީ އައިސީޖޭގައި މިހާރު ހިނގަމުން ދާ މައްސަލައިގައި ރާއްޖޭގެ ފަރާތުން މިއަދު ވަނީ އެ ކޯޓުގައި ބަޔާން ދީފަ އެވެ. އެ ބަޔާން ރާއްޖޭގެ ފަރާތުން ދެއްވީ  ޖަރުމަނުގައި ހުންނަވާ ދިވެހި ސަފީރު އައިޝަތު ޝާން ޝާކިރު އެވެ. 

ބުނީ ކީކޭ؟ - ޝާން އިއްވެވި ބަޔާނުގައި އޭނާ ވަނީ ގާޒާގައި މިހާރު އިޒްރޭލުން ހިންގަމުން ދާ ލޭ އޮހޮރުވުންތަކާއި ފަލަސްތީނުގެ ރައްޔިތުންނަށް ދެމުންދާ އަނިޔާތައް ނިމުމަކަށް ގެނައުމަށް ބައިނަލްއަގުވާމީ މުޖުތަމައުން މަސައްކަތް ކުރުމަށް ގޮވާލައްވައިފަ އެވެ. އޭނާ ވިދާޅުވި ގޮތުގައި: 

"މިދަނޑިވަޅަކީ އަހަރުތަކެއް ވަންދެން ދެމިގެން ގޮސްފައިވާ މި މައްސަލައަށް އައިސީޖޭ މެދުވެރިކޮށް އިންސާފު ހޯދުމަށް ލިބިގެންދާނެ މުހިންމު ފުރުސަތެއް. މި ފުރުސަތުގެ ބޭނުން ނަގާ ނުލައްވާނެ ކަމަށް އުންމީދުކުރަން،" ފަލަސްތީނުގެ މިނިވަން ދައުލަތެއް ގާއިމް ކުރުމަށް ތާއީދު ކުރުމަކީ ރާއްޖޭގެ ހާރިޖީ ސިޔާސަތުގެ މުހިންމު އަސާސެއްކަން ފާހަގަ ކުރައްވައ ޝާން ވިދާޅުވި އެވެ. 

ތަފްސީލް - މީގެ އިތުރުން އައިސީޖޭއަށް ރާއްޖޭގެ ފަރާތުން ހުށަހެޅި ގާނޫނީ ކަންކަން ހުށަހަޅައި ދެއްވީ ރާއްޖޭގެ ވަކީލުންގެ ޓީމުގައި ހިމެނޭ އޭމީ ސޭންޑާ އެވެ. އޭނާ މައިގަނޑު ގޮތެއްގައި ފާހަގަ ކުރެއްވީ އިޒްރޭލުގެ ބައެއް އަމަލުތަކުގެ ސަބަބުން ފަލަސްތީނުގެ ރައްޔިތުންގެ އަސާސީ އިންސާނީ ހައްގުތަކުން އެ މީހުން މަހުރޫމްވެފައިވާ މިންވަރެވެ. އެގޮތުން ވިދާޅުވީ: 

"މިއީ އިންސާނީ ހައްގުތައް ހިމަޔާތްކޮށްދީފައިވާ ބައިނަލްއަގުވާމީ އެކި ގާނޫނުތަކާ ކަނޑައެޅިގެން ހިލާފަށް އިޒްރޭލުން ހިންގާ އަމަލުތައް،" ސޭންޑީ ވިދާޅުވި އެވެ.