ފުވައްމުލަކުގެ ޝައުގު ހުރީ މެދުރާއްޖެތެރޭގެ ފަޅު ރަށަކަށް

މަސްވެރިކަމާއި ދަނޑުވެރިކަމާއި އިގްތިސާދީ ބޭނުންތައް ފިޔަވައި އާމްދަނީ ހޯދަން ދޫކުރަން ސަރުކާރުން ކަނޑައަޅާފައިވާ ފަޅުރަށްތަކުގެ ތެރެއިން ފުވައްމުލަކުގެ ޝައުގުވެރިކަން ހުރީ މެދު ރާއްޖެތެރޭގެ ރަށަކަށް ކަަމަށް ފުވައްމުލަކު ކައުންސިލުން ބުނެފި އެވެ.

ވީ ކިހިނެއް؟ - ރާއްޖޭގެ އެހެން ރަށްތަކާ ހިލާފަށް ވަކިން އެންމެ އަތޮޅެއްގެ މައްޗަށް އޮންނަ ފުވަމުލަކަށް އާމްދަނީ ހޯދުމަށް ފަޅުު ރަށެއް ހަމަޖައްސަވައިދެއްވާނެ ކަމަށް ރައީސް މުހައްމަދު މުއިއްޒު ވަނީ ވައުދުވެވަޑައިގެންފަ އެވެ.

ދެކުނުގެ އަތޮޅުތަަކަށް ކުރައްވަމުންދާ ދަތުރުފުޅުގައި އިއްޔެ އެ ރަށަށް ވަޑައިގެން ރައީސް ވިދާޅުވީ:

ފާހަގަކޮށްލެވޭ - އާމްދަނީ ހޯދުމަށް ކައުންސިލްތަކަށް ފަޅުރަށް ދޫކުރުމަކީ މި ސަރުކާރުގެ ސިޔާސަތަކެވެ. އެ ސިޔާސަތުގެ ދަށުން މިފަހުން 25 ރަށެެއް ކައުންސިލްތަކަށް ދޭން ނިންމާ، އެކަމަށް ކުރިމަތިލާން ވަނީ ހުޅުވާލާފަ އެވެ.  

ބުނީ ކީކޭ؟ - ފުވައްމުލަކުގެ މޭޔަރު އިސްމާއިލް ރަފީއު މިއަދު 'ދައުރު'އަށް ވިދާޅުވީ، ސަރުކާރުން ދޫކުރާ ފަޅުރަށްތަކުގެ ތެރެއިން ފުވައްމުލަކުން ބޭނުންވާ ރަށެއް ކަނޑައަޅަން ކައުންސިލުން ދަނީ ބަލަންޖެހޭ ކަންކަން ބަލާ، މަޝްވަރާތައް ކުރަމުން ކަމަށެވެ. އެގޮތުން ފަޅު ރަށުގެ ބޮޑުމިނާއި ފަޅާއި ވަށައިގެންވާ މާހައުލާއި އިތުރު ކަންކަމަށް ވިސްނާނެ ކަމަށް ވިދާޅުވި އެވެ.

ވަކި ގޮތެއް ނިންމާފައިނުވާ ނަމަވެސް އިސްމާއިލް ވިދާޅުވި ގޮތުގައި މިހާތަނަށް ދެއްކި ވާހަކަތަކުން ކައުންސިލުގެ ޝައުގުވެރިކަން ބޮޑަށް ހުރީ މެދުރާއްޖެތެރޭގެ އަތޮޅުތަކުގެ ތެރެއިން ދޫކުރާ ފަޅުރަށަކަށް ކުރިމަތިލުމަށެވެ.

ކައުންސިލްތަކަށް ދޫކުރަން ނިންމާފައިވާ 25 ފަޅުރަށުގެ ތެރޭގައި ހުވަދު އަތޮޅުގެ ހަ ރަށް ހިމެނޭ އިރު، ފުވައްމުލަކާ ދުރު ނަމަވެސް މެދުރާއްޖެތެރޭގެ ރަށަކަށް ކުރިމަތިލާން ވިސްނަނީ، އޭނާ ފާހަގަކުރެއްވި ގޮތުގައި:

"އަދި ގޮތެއް ނުނިންމަން. މަޝްވަރާ ކުރުމަށްފަހު ގޮތެއް ނިންމާފައި [ފަޅުރަށް ހޯދަން] ކުރިމަތިލުމުގެ މަސައްކަތްތައް ގަވައިދުގައި އޮތް ގޮތަށް ކުރިއަށް ގެންދާނީ،" އިސްމާއިލް ވިދާޅުވި އެވެ.

ފާހަގަކޮށްލެވޭ - ކައުންސިލްތަކުގެ އާމްދަނީ އިތުރުކުރުމަށް ކުއްޔަށްދޫކުރާ ފަޅުރަށްތަކުގެ ލިސްޓުގައި މިހާރު 25 ރަށް އޮތް ނަމަވެސް، އެ ލިސްޓަށް  ކުރިއަށް އޮތްތަނުގައި ރަށްތައް އިތުރުވެގެން ދާނެ ކަމަށް ރައީސް ވިދާޅުވި އެވެ. އަދި:

"އެހެންވީމަ، މި ފޯމިއުލާގެ ދަށުން މި ހުޅުވާލީ. ފުވަމުއްލަކަށް ވެސް ކައިރި އަތޮޅަކުންވިޔަސް އެ ފުރުސަތު ހޯދުމަކީ އަޅުގަނޑު މަރުހަބާ ކިޔާނެ ކަމެއް، އެކަން ކުރުމަށް ވެސް އެދެން. އިރާދަ ކުރެއްވިއްޔާ ހުވަދު އަތޮޅުން އަދި އެހެން ސަރަހައްދަކުންވިޔަސް ތިބޭފުޅުންނަށް ދޭން ޖެހޭ ހުރިހާ އެއްބާރުލުން ދީ، މި ސިޓީއަށް ފަޅު ރަށެއް ވީހާވެސް އަވަހަކަށް ހޯދައި އެކަމުގެ މަގުފަހުކޮށްދޭނަން،" ރައީސް ވިދާލުވި އެވެ.

"މަދުވެގެން އެއް ރަށް [ފުވައްމުލަކަށް ހޯދައިދޭނަން]. އެއަށްވުރެ ގިނަ ރަށްރަށް ވެސް ހޯދޭނެ."