ނަހުލާގެ މަންމައާ ބައްޕަ އޭނާގެ ކެންޑޭޓް ފޯމާ އެކު އިލެކްޝަންސް ކޮމިޝަންގައި (ފޮޓޯ/އައިޝަތު ނަހުލާ)
ނަހުލާގެ ކެންޑިޑަސީ ފޯމު ހުށަހަޅުއްވަން ވަޑައިގަތީ މަންމަ އާއި ބައްޕަ
ޖުމްހޫރީ ޕާޓީގެ ޓިކެޓުގައި ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ވާދަކުރައްވަން ކުރީގެ ޓްރާންސްޕޯޓް މިނިސްޓަރު އައިޝަތު ނަހުލާ މިއަދު ފޯމު ހުށަހަޅުއްވައިފި އެވެ. އެކަމަކު އޭނާ ފޯމު ހުށައަޅުއްވަން އިލެކްޝަންސް ކޮމިޝަނަށް ވަޑައިގަތީ ބައްޕަ އާއި މަންމަ އެވެ.
ވީ ކިހިނެއް؟ - ޖުމްހޫރީ ޕާޓީގެ ޑެޕިއުޓީ ލީޑަރުގެ މަގާމު ވެސް ފުރުއްވަމުން ގެންދަވާ ނަހުލާ ވާދަކުރައްވަނީ ޖޭޕީގެ ޓިކެޓްގައި ހުޅުމާލެ ދެކުނު ދާއިރާގެ ގޮނޑިއަށެވެ.
ނަހުލާގެ ފޯމު ހުށަހަޅުއްވަން މަންމަ ހަދީޖާ އިބްރާހިމް އާއި ބައްޕަ ހަސަން ޒަރީރު ވަޑައިގެންނެވި ފޮޓޯއެއް އޭނާ ވަނީ އެކްސްގައި ހިއްސާކުރައްވައިފަ އެވެ.
އޭނާ ލިއުއްވީ މަންމަ އާއި ބައްޕައަށް ޝުކުރު އަދާކުރައްވާ ކަމަށެވެ.
ٱلْحَمْدُ لِلَّٰهِ ، ހުޅުމާލެ ދެކުނު ދާއިރާއަށް ވާދަކުރުމަށް, މާތްﷲ ގެވާގިފުޅާއިއެކު ހުށައެޅި ކެންޑިޑެންސީ މިއަދު އިލެކްޝަން ކޮމިޝަނުންވަނީ ގަބޫލު ކުރައްވާފަ. އިލެކްޝަން ކޮމިޝަނަށް ފޯމު ހުށަހެޅުއްވުމަށް ވަޑައިގެންނެވި ، އަޅުގަނޑު ގެ ލޮބުވެތި މައިންބަފައިންނަށް ޝުކުރުއަދާކުރަން. pic.twitter.com/glaXnZm6MN
— Aishath Nahula (@aishath_nahula) February 12, 2024
ފާހަގަކޮށްލެވޭ ކަމެއް - ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މަޖިލިސް މެމްބަރު ގާސިމް އިބްރާހިމްގެ އަނބިކަނބަލުން ނަހުލާ، ސިޔާސީ ދާއިރާއަށް ވެންނެވީ ކުރީގެ ރައީސް އަބްދުﷲ ޔާމީންގެ ވެރިކަމުގައި ގާސިމް ހައްޔަރުކުރުމާ ގުޅިގެންނެވެ.
ގާސިމް ހިމެނޭހެން އޭރު ޖަލުގައި ބަންދުކުރި ސިޔާސީ ލީޑަރުން މިނިވަންކުރަން ގޮވާލައި އެ ލީޑަރުންގެ އަނބިކަނބަލުންނާއި، އިދިކޮޅު އެމްޑީޕީއާ އިއްތިހާދުވި ސިޔާސީ ޕާޓީތަކުން ހިންގި ހަރަކާތްތަކުގައި ނަހުލާ ބައިވެރިވެވަޑައިގަތެވެ.
އެއަށް ފަހު ހަތަރު ޕާޓީގެ އިއްތިހާދަކުން 2018ގެ ރިޔާސީ އިންތިހާބު އެމްޑީޕީން ކާމިޔާބު ކުރުމާ އެކު، ރައީސް އިބްރާހިމް މުހައްމަދު ސޯލިހުގެ ވަޒީރުންގެ މަޖިލީހުގައި ޓްރާންސްޕޯޓު މިނިސްޓަރުގެ މަގާމު ނަހުލާއަށް ލިބިވަޑައިގަތެވެ. އެ ސަރުކާރު ނިމެންދެން އޭނާ އެ މަގާމުގައި ހުންނެވި އެވެ.
ކޮމެންޓް (4)
ސިދުގީ
ސަނައްޓޭ
މެކުނު
ނަހުލާ