ތިލަމާލެ ބްރިޖްގެ %33 ނިމިއްޖެ، މަސައްކަތް ހުރީ ތާވަލަށް ވުރެ %1.2 ކުރީގައި

އިންޑިއާގެ އެފްކޮންސް ކުންފުނިން ހަދަމުން އަންނަ ތިލަމާލެ ބްރިޖްގެ %33 ނިމިއްޖެ ކަމަށް، ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން މިއަދު ބުނެފި އެވެ.

ވީ ކިހިނެއް؟ - މާލެއިން ފެށިގެން ވިލިމާލެ އާއި ގުޅިފަޅު އަދި ތިލަފުށި ގުޅާލައި، ތިލަމާލެ ބްރިޖްގެ މަސައްކަތް ކުރިއަށް ދާ ގޮތް ބަލަން މިއަދު ވަނީ ކޮންސްޓްރަކްޝަން މިނިސްޓްެރީގެ އިސް ޓީމެއް ސައިޓަށް ޒިޔާރަތްކޮށްފަ އެވެ. އެ ޓީމުގައި އިސްކޮށް ހުންެނެވި އެއް ބޭފުޅަކީ ސްޓޭޓް މިނިސްޓަރު އިބްރާހިމް ތޮއާމް އެވެ.

ތަފްސީލް - އެ ޒިޔާރަތަށް ފަހު އެކްސްގައި ތޮއާމް ކުރެއްވި މެސެޖެއްގައި ވިދާޅުވީ ބްރިޖްގެ ޕައިލިން މަސައްކަތުގެ %55 ނިމިއްޖެ ކަމަށެވެ. އަދި މުޅި މަޝްރޫއުގެ %33 މަސައްކަތް ވެސް މިހާރު ފުރިހަމަ ވެއްޖެ ކަމަށް ވިދާޅުވި އެވެ.

އޭނާ ވިދާޅުވި ގޮތުގައި މިވަގުތު މަޝްރޫއުގެ ދުވެލި ހުރީ ތާވަލަށް ވުރެ %1.2 ކުރީގަ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އިންޑިއާގެ އެގްޒިމް ބޭންކްގެ ލޯނެއްގެ ދަށުން އެ ގައުމުގެ އެފްކޮންސް ކުންފުނިން ހިންގަމުން އަންނަ މަޝްރޫއު، ކުރީ ސަރުކާރުގައި ކުރިއަށް ދިޔައީ ތާވަލަށް ވުރެ މާ ލަސްކޮށެވެ. އެއީ ކަނޑުގައި ބްރިޖް އެޅުމުގެ ތަޖުރިބާ އެފްކޮންސްގައި ނެތުމުން ކަމަށް، މިހާރުގެ ކޮންސްޓްރަކްޝަން މިނިސްޓަރީން ކުރިން ބުނެފައިވެ އެވެ.

ތޮއާމްގެ މެސެޖްގައި ވިދާޅުވީ މަޝްރޫއު ކުރިއަށް ދާ އިރު ދިމާވެދާނެ ގޮންޖެހުންތައް  މިނިސްޓްރީން ދިރާސާކުރަމުން އަންނަ ކަމަށެވެ.

މި އަންނަނީ "މަސައްކަތް މަޑުޖެހުމެއް ނެތި ކުރިއަށް ގެންދިއުމަށް އަޅަން ޖެހޭ ފިޔަވަޅުތައް ދުރާލާ އަޅަމުން،" އޭނާ ލިއުއްވި އެވެ.

ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު މީގެ ކުރިން 'ދައުރު'އަށް ދެއްވި އިންޓަވިއުއެއްގައި ވިދާޅުވީ ކަނޑުގައި ހަދާ ބްރިޖަކަށް ބަލާއިރު އެފްކޮންސްއިން އެވަރަށް ތައްޔާރުވެފައި ނެތް ކަމަށެވެ.

ބްރިޖް ނިންމަން މިހާރު ދީފައި އޮތް މުއްދަތު ހަމަވާނީ ސެޕްޓެމްބަރު 2026 އަށެވެ.