އިންތިގާލީ އިންސާފުގެ އޮފީހުން ނުނިންމާ މައްސަލަތަކަށް ހަދާނެ ގޮތަކާ މެދު މަޝްވަރާ ކުރަނީ

ދައުލަތުގެ ފަރާތުން އެކިއެކި ބޭއިންސާފުތަކާ ކުރިމަތިވެފައިވާ ފަރާތްތަކަށް އިންސާފު ހޯދައިދިނުމަށް ކަމަށް ބުނެ މިދިޔަ ސަރުކާރުން އުފެއްދި އިންތިގާލީ އިންސާފުގެ އޮމްބަޑްސްޕާސަންގެ އޮފީހުގެ މުއްދަތު ހަމަވިއިރު، އެ ތަނުން ބަލަން ފަށައި ނުނިމި ހުރި މައްސަލަތަކާ މެދު އަމަލުކުރާނެ ގޮތަކާ މެދު މަޝްވަރާކުރަމުން އަންނަ ކަމަށް ރައީސް އޮފީހުން މިއަދު ބުނެފި އެވެ.

ވީ ކިހިނެއް؟ - އިންތިގާލީ އިންސާފުގެ ގާނޫނުގެ ދަށުން 17 ޑިސެމްބަރު 2020ގައި އުފެއްދި އިންތިގާލީ އިންސާފުގެ އޮފީހަށް ކަނޑައަޅާފައިވާ ދެ އަހަރު ދުވަހުގެ މުއްދަތު 17 ޑިސެމްބަރު 2022ގައި ވަނީ ހަމަވެފަ އެވެ. އެކަމަކު އެ އޮފީހުން ތަހުގީގު ކުރަމުން ދިޔަ މައްސަލަތައް، އެ މުއްދަތުގެ ތެރޭގައި ތަހުގީގުކޮށް ނިމިފައެއް ނުވެ އެވެ. އެހެންވެ، އެ މައްސަލަތައް ބަލަން އިތުރު ވަގުތު ބޭނުންވާތީ ކަމަށް ބުނެ، މިދިޔަ ސަރުކާރުގެ ދައުރު ނިމެންދެން އޭރުގެ ރައީސް އިބްރާހިމް މުހައްމަދު ސޯލިހް އެ އޮފީހުގެ މުއްދަތު އިތުރުކޮށްދެއްވި އެވެ. ސަރުކާރު ބަދަލުވުމާ އެކު މިދިޔަ 17 ނޮވެމްބަރުގައި އެ އޮފީސް ވަނީ އުވިފަ އެވެ.

އެ އޮފީސް އުވުމާ ގުޅިގެން، އެއޮފީހުގެ ހުރިހާ ލިޔެކިޔުންތަކާއި ހަރުމުދާ ފިނޭންސް މިނިސްޓްރީއާ ހަވާލުކޮށްފައިވާ ކަމަށް އެ ދުވަހު އެ އޮފީހުން ބުނެފައިވެ އެވެ. ނަމަވެސް، އެ ތަން އުވުނުއިރު އެ ތަނަށް ހުށަހެޅިފައިވާ އެއްވެސް މައްސަލައެއްގެ ތަހުގީގު ރިޕޯޓެއް އާންމުކޮށްފައެއް ނުވެ އެވެ. އަދި ގިނަ މަސައްކަތްތައް ހުރީ ނުނިމި އެވެ.

ބުނީ ކީކޭ؟ - ރައީސް އޮފީހުގެ ސްޓްރެޓެޖިކް ކޮމިއުނިކޭޝަންސް މިނިސްޓަރު އިބްރާހިމް ހަލީލު މިއަދު ވިދާޅުވީ، އެ އޮފީހުގެ މަސައްކަތަކީ ގާނޫނުން ވަކި މުއްދަތެއް ކަނޑައެޅިފައިވާ މަސައްކަތެއް ކަމަށެވެ.

މަޖިލިސް މެދުވެރިކޮށް އެ ގާނޫނަށް އިސްލާހު ގެނައުމަކާ ނުލައި އެ މުއްދަތު އިތުރު ކުރުމުގެ އިހްތިޔާރު ރައީސަށް އެ ގާނޫނުން ލިބިދީފިނުވުމާ އެކު، އެ އޮފީހުން ކުރަން ފަށައި ނުނިމި ހުރި މައްސަލަތަކާ މެދު ކުރިއަށް ދާނެ ގޮތެއް ނިންމުމަށްޓަކައި ކަމާ ބެހޭ ފަރާތްތަކާ ދަނީ މަޝްވަރާކުރަމުން ކަމަށް ހަލީލު ވިދާޅުވި އެވެ.

ގުޅުން ހުރި ކަމެއް - މަސައްކަތްތައް އެކަށީގެންވާ ގޮތެއްގައި ނުހިންގާ އޮތުމަށް ފަހު، ދައުރު ނިމެން ދެ ހަފްތާއަށް ވެފައި ވަނިކޮށް، މައްސަލަތައް ބެލުމުގައި އަމަލުކުރާނެ އިޖުރާއަތުގެ ގަވާއިދާއި އުސޫލަތާކައި ހިލާފަށް އަވަސް އަރުވާލައިގެން މައްސަލަތައް ނިންމަން އުޅުމާއި ކުރީގެ ނިންމުންތައް ބަދަލުކުރާ ކަމުގެ ތުހުމަތާ އެކު، އެ އޮފީހުގެ އެމްބަޑްސްޕާސަން ޖިހާދާ އަނީސް ވަނީ މިދިޔަ ނޮވްމެބަރު ތެރޭ އިސްތިއުފާ ދެއްވާފަ އެވެ.

އެއަށް ފަހު، ލިޔެކިއުންތައް ބަދަލުކުރުމާ ގުޅޭގޮތުން ހުށަހެޅި މައްސަލައެއްގެ ތަހުގީގަށް އޭސީސީން ވެސް ވަނީ އެ އޮފީހަށް ވަދެ، ބަލައި ފާސްކޮށް ބައެއް ލިޔެކިއުންތައް ގެންގޮސްފަ އެވެ. 

ފާހަގަކޮށްލެވޭ ކަމެއް - އެ އޮފީހުގެ ދައުރު ނިމެން އެއް ދުވަހަށް ވެފައި ވަނިކޮށް މިދިޔަ 16 ނޮވެމްބަރުގައި، އެ އޮފީހަށް މައްސަލަތައް ހުށަހެޅި ބައެއް މީހުން ވަނީ އެ މައްސަލަތަކުގެ ރިޕޯޓު ހަވާލުކޮށްދިނުމަށް އެދި އެ އޮފީހަށް އެއްވެފަ އެވެ. އެ މީހުން އެ ދުވަހު ފާޅުކުރި ކަންބޮޑުވުންތަކުގެ ތެރޭގައި:

ފަސްމަންޒަރު - އިންތިގާލީ އިންސާފުގެ އޮފީހަކީ 1953ގެ ޖެނުއަރީ މަހުން ފެށިގެން 2018 ވަނަ އަހަރުގެ ނޮވެމްބަރު މަހުގެ 17ގެ ނިޔަލަށް ހިނގާފައިވާ އިންސާނީ ހައްގުތަކާއި ކަރާމާތާ ގުޅުން ހުރި މައްސަލަތައް ބަލަން އެކުލަވާލި ކޮމިޝަނެކެވެ. އެގޮތުން 3000އަށް ވުރެ ގިނަ މައްސަލަ އެ އޮފީހަށް ހުށަހެޅި ބަލަމުންދިޔަ އެވެ. އެ ތަނުން ބެލި ފާހަގަކޮށްލެވޭ މައްސަލަތަކަކީ: