އެމްޑީޕީގެ ބައެއް މެމްބަރުން(ދައުރު ފޮޓޯ/ހުސައިން ސުނޭން)
އެންޓި ޑިފެކްޝަން ގާނޫނެއް އަލުން ހެދުމަށް މަޝްވަރާތައް އެބަ ކުރަން: އެމްޑީޕީ
ރައްޔިތުންގެ މަޖިލީހަށް އިންތިހާބުވި ޕާޓީން މެމްބަރަކު ވަކިވެއްޖެ ނަމަ މެމްބަރުކަމުގެ ގޮނޑި ގެއްލޭގޮތް ހެދުން ނުވަތަ އެންޓި ޑިފެކްޝަން ގާނޫނެއް ހެދުމުގެ މަޝްވަރާތައް ކުރަމުން އަންނަ ކަމަށް އެމްޑީޕީގެ ޕާލިމަންޓްރީ ގްރޫޕް (ޕީޖީ)ން މިއަދު ބުނެފި އެވެ.
ވީ ކިހިނެއް؟ - މަޖިލީހަށް އިންތިހާބުވާ ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ މަޖިލީހުގެ މެމްބަރުކަމުން ވަކިވާނެ ކަމަށް 2017ވަނަ އަހަރު ސްޕްރީމް ކޯޓުން ކަނޑައެޅިއިރު، އެންޓި ޑިފެކްޝަން ގާނޫނެއް ހަދަން ވެސް މަޖިލީހަށް ލާޒިމް ކުރި އެވެ.
-
އެ ގާނޫނު މަޖިލީހުން ފާސްކޮށް އޭރުގެ ރައީސް އަބްދުﷲ ޔާމީން ތަސްދީގު ކުރެއްވި
-
ނަމަވެސް އުފެދުނު ހިޔާލު ތަފާތުވުންތަކަށް ފަހު، އެ ގާނުނޫ އުވާލަން މަޖިލީހުގެ އަގުލަބިއްޔަތުން ފާސްކުރީ 1 ނޮވެމްބަރު 2018ގައި
އެންޓި ޑިފެކްޝަން ގާނޫނެއް އެކުލަވާލުމުގެ މަޝްވަރާތައް ކުރަމުންދާކަން އެމްޑީޕީން މިއަދު ހާމަކުރީ އެމްޑީޕީގެ ޕީޖީ ގްރޫޕުން މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި އެކަމާ ގުޅޭގޮތުން ނޫސްވެރިއަކު ކުރެއްވި ސުވާލަކަށް ޖަވާބު ދެއްވަމުން ނެވެ.
ތަފްސީލް - މިދިޔަ ބްރާސްފަތި ދުވަހު އެމްޑީޕީގެ 13 މަޖިލިސް މެމްބަރަކު ވެރިކަން ކުރާ ޕާޓީ ޕީއެންސީއަށް ބަދަލުވެފައިވަނިކޮށް، އެމްޑީޕީ ޕީޖީ ގްރޫޕުން ބޭއްވި ނޫސްވެރިންެ ބައްދަލުވުމުގައި ނޫސްވެރިއަކު ވަނީ، 2019ގައި އެމްޑީޕީން މަޖިލީހުގެ ފުރިހަމަ މެޖޯރިޓީ ހޯދިއިރު އެންޓި ޑިފެކްޝަން ގާނޫނެއް އެކުލަވާލާނެ ކަމަށް ވައުދުވެފައިވާކަން ފާހަގަކޮށް، މިދިޔަ ފަސް އަހަރުގައި އެކަން ކޮށްފައި ނުވަނީ ކީއްވެތޯ ސުވާލު ކޮށްފަ އެވެ.
ޖަވާބުގައި ހުޅުމާލެ ދާއިރާގެ މެމްބަރު އަލީ ނިޔާޒް ވިދާޅުވީ، އެ ގާނޫނުގައި އޮތް ރަނގަޅު ކަންކަމަކީ އަދި ގޯސް ކަންކަމަކީ ކޮބައި ކަމުގެ މަޝްވަރާތައް ކުރަމުން އަންނަ ކަމަށެވެ.
"[އެންޓި ޑިފެކްޝަން ގާނޫނެއް] ގެނައުމާ މެދު ކުރިއަށް އޮތްތަނުގައި ވިސްނާނަން. އަޅުގަނޑުމެންގެ ވިސްނުމުގައި ނެތްކަމެއް ނޫން އެއީ. 13 މެމްބަރަކު ޕާޓީން ވަކިވީމަ ކޮންމެހެން ވިސްނާ ވިސްނުމެއް ނޫން. މުސްތަގުބަލުގައި މަޖިލިސް އިސްލާހުކުރުމަށް ކުރާ މަސައްކަތެއްގެ ގޮތުގައި ރަށްޓެހި ޕާޓީތަކާ އެކު ގުޅިގެން ވެސް މި މަޝްވަރާތައް ކުރަމުން އެބަދަން،" ނިޔާޒް ވިދާޅުވި އެވެ.
ނިޔާޒް އިތުރަށް ވިދާޅުވީ 19 ވަނަ މަޖިލިސް އެމްޑީޕީން ފެށީ 65 މެމްބަރުންނާ އެކު ނަމަވެސް، ސަރުކާރު ބަދަލުވެގެންދާއިރު އެ އަދަދު އަބަދު ވެސް މަޖިލީހުގައި ދަށްވާ ކަމަށެވެ. އަދި އެއީ ސިޔާސީ ދާއިރާގައި ކަން ހިނގާ ގޮތްކަން ފާހަގަކުރައްވައި އޭނާ ވިދާޅުވީ އެއް މިންވަރެއްގައި މަޖިލީހުގައި ޕާޓީތައް ތަމްސީލުކުރާ މިންވަރު އެއްވެސް އިރެއްގައި ހިފެހެއްޓިފައި ނުހުންނަ ކަމަށެވެ.
އެނގުން މުހިންމު - ޔާމީންގެ ވެރިކަމުގައި ތަސްދީގުކުރި އެންޓި ޑިފެކްޝަން ގާނޫނު އުވާލަން ހުށަހެޅީ އޭރުގެ ވިލިފުށީ ދާއިރާގެ މެންބަރު ރިޔާޒު ރަޝީދު އެވެ. އޭނާ އެ ގާނޫނު އުވާލަން އޭރު ހުށަހެޅުއްވީ ރައްޔިތުންގެ މަޖިލީހުގެ މެންބަރުންނަށް ގާނޫނު އަސާސީން މަތިކޮށްފައިވާ މަސްއޫލިއްޔަތު އަދާކުރުމަށް ހުރަސް އެޅޭކަމަށް ބުނެ އެވެ.
ކޮމެންޓް (1)
ސޭކުސްތާން