އިންޑިއާ ސިފައިންގެ އަދަދު ނޭނގިގެން ގައުމީ ސަލާމަތަށް ނުރައްކަލެއް ނެތް: ޝަހީބް

ރާއްޖޭގައި މިވަގުތު ތިބި އިންޑިއާ ސިފައިންގެ އަދަދު ސަރުކާރަށް މިހާތަނަށް ޔަގީންކުރެވިފައި ނުވުމަކީ ގައުމީ ސަލާމަތައް ނުރައްކަލެއް އޮތް ކަމެއް ނޫން ކަމަށް ރައީސް އޮފީހުގެ ޗީފް ސްޕޯކްސްޕާސަން މުހައްމަދު ޝަހީބު ވިދާޅުވެއްޖެ އެވެ.

ވީ ކިހިނެއް؟ - މި ސަރުކާރުން އެންމެ ފުރަތަމަ އިއުލާންކޮށްފައިވާ ގޮތުން، ރާއްޖޭގައި ތިބީ 77 އިންޑިއާ ސިފައިންނެވެ. ނަމަވެސް، ސެނަހިޔާގައި ތިބި ޑޮކްޓަރުންނާއި ސިއްހީ މާހިރުން ހިމެނޭ ގޮތަށް، އިންޑިއާ ސިފައިންގެ އަދަދަކީ 89 ކަމަށް ސަރުކާރުން ފަހުން ބުންޏެވެ.

އެކި އިދާރާތަކުގައި އެ އަދަދުތަކާ ގުޅޭ ގޮތުން އެކި ގޮތަށް ހުރުމުން، އިންޑިއާ ސިފައިންގެ ސީދާ އަދަދު އަދިވެސް ރަނގަޅަށް ސާފުނުވާ ކަމަށް ވެސް ސަރުކާރުން ބުނެ އެވެ.

ރައީސް މުހައްމަދު މުއިއްޒު ވެރިކަމާ ހަވާލުވުމަށް ފަހު ދޮޅު މަސް ވެފައިވާ އިރު، އަދިވެސް އިންޑިއާ ސިފައިން ރާއްޖޭގައި ތިބި ސީދާ އަދަދު ސަރުކާރުން ހާމަކޮށްފައި ނުވާތީ، މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެކަމާ ގުޅޭގޮތުން އެކި ފަހަރުމަތިން ނޫސްވެރިން ސުވާލު ކުރި އެވެ.

ބުނީ ކީކޭ؟ - އެ ސުވާލުތަކުގެ ޖަވާބުގައި ޝަހީބު ވިދާޅުވީ، ރާއްޖޭގައި ތިބި އިންޑިއާ ސިފައިންގެ ސީދާ އަދަދު ޔަގީން ނުވުމަކީ، ގައުމީ ސަލާމަތައް ނުރައްކަލެއް އޮތް ކަމެއް ނޫން ކަމަށެވެ. 

"އިންޑިއާ ސިފައިންގެ އަދަދު، މީޑިއާއަށް އަޅުގަނޑުމެން މި ދަންނަވަނީ އަޅުގަނޑުމެންނަށް ލިބޭ އަދަދު. ކަމާބެހޭ މުއައްސަސާތަކުން އެކަންތައްތައް ބަލާ. އެއީކީ ގައުމީ ސަލާމަތައް ހުރި ނުރައްކާ ގުޅުން ހުރި ކަމެއްގެ ގޮތުގައެއް އެ ބޭފުޅުން ފާހަގައެއް ނުކުރައްވާ، އަދި އެބޭފުޅުން އެކަންތައް މެނޭޖު ކުރައްވަމުން ގެންދަވަނީ،" ޝަހީބު ވިދާޅުވި އެވެ.

ރައީސް އޮފީހުން މީގެ ކުރިން ހާމަކޮށްފައިވާ އަދަދަށް އަދިވެސް ބަދަލެއް އައިސްދާނެކަން ފާހަގަކުރައްވާ ޝަހީބު ވިދާޅުވީ، މިވަގުތަށް ރައީސް އޮފީހުން މީޑިއާޔާ ހިއްސާ ކުރަމުން އަންނަ އަދަދަކީ މިހާތަނަށް ކަމާބެހޭ ފަރާތްތަކުން ލިބިފައިވާ އަދަދު ކަމަށެވެ.

ދޮޅު މަސް ވެގެން ދާއިރު އަދިވެސް އިންޑިއާ ސިފައިންގެ ސީދާ އަދަދު ސަރުކާރަށް ސާފު ވެފައި ނުވުމަކީ މައްސަލައެއް ކަމަށް ގަބޫލު ނުކުރައްވަންތޯ ތަކުރާރުކޮށް ސުވާލު ކުރުމުން ވެސް ޝަހީބު ވިދާޅުވީ، އެއީ މައްސަލައެއް ކަމަށް ނުދެކޭ ކަމަށެވެ.

"އަޅުގަނޑަށް ލިބިފައި އޮތް މައުލޫމާތު އަޅުގަނޑު މި އަރުވަނީ، އަދަދަކީ 89އެކޭ. ދެން ސަރުކާރުގެ ކަމާބެހޭ މުއައްސަސާތަކުން ކަންތައްތައް ރިވިއުކޮށް ކަންތައްތައް ބަލަމުންދަނީ،" އޭނާ ވިދާޅުވި އެވެ.

ޑިފެންސް މިނިސްޓްރީ އާއި އެހެން އިދާރާތަކަށް ރާއްޖޭގައި ތިބި އިންޑިއާ ސިފައިންގެ އަސްލު ހަގީގީ އަދަދު އެނގޭތޯ ސުވާލު ކުރުމުން ޝަހީބް ވިދާޅުވީ "އަޅުގަނޑު ގަބޫލުކުރަނީ އެނގޭނެ ކަމަށް" ކަމަށެވެ.

ޝަހީބު ދެއްކެވި ވާހަކައިން ދޭހަވަނީ، ޑިފެންސް މިނިސްޓްރީ އާއި އެހެނިހެން ކަމާބެހޭ އިދާރާތަކަށް އެ މައުލޫމާތު ލިބިފައިވާ ނަމަވެސް، އެ މައުލޫމާތު ރައީސް އޮފީހާ ހިއްސާ ނުކުރާ ކަމެވެ. ނަމަވެސް، އޭނާ ސީދާ އެހެން ވިދާޅެއް ނުވެ އެވެ.

ފާހަގަކޮށްލެވޭ - އިދިކޮޅުގައި ތިބި އިރު، އެތައް ހާސް އިންޑިއާ ސިފައިން ރާއްޖޭގައި ތިބިކަމަށް އޭރު ތުހުމަތު ކޮށްފައިވެ އެވެ. އެކަމުގެ ސަބަބުން ދިވެހިންގެ ސިޔާދަތާއި މިނިވަންކަން ގެއްލިދާނެ ކަމަށް އެތައް ފަހަރަކު މި ސަރުކާރުގެ އިސް މަގާމުތަކުގައި ތިއްބެވި ބޭފުޅުން ވިދާޅުވެފައިވެ އެވެ.

އިންޑިއާ ސިފައިން ފޮނުވާލުމަށް ވެރިކަމުގެ ފުރަތަމަ ދުވަހު ސަރުކާރުން އެދިފައި ވާއިރު، އެކަމާ ގުޅިގެން ދެ ސަރުކާރުގެ އިސް ބޭފުޅުންގެ މެދުގައި "ކޯ ގްރޫޕެއް" ވަނީ އެކުލަވާލާފަ އެވެ. ނަމަވެސް، އިންޑިއާ ސިފައިން އަނބުރާ ފޮނުވާލެވޭނެ ކަމަށް ބެލެވެނީ ކިހާތާކު ކަމެއް ސަރުކާރުން ނުބުނެ އެވެ.