ގުޅިފަޅާއި ގިރާވަރު ފަޅުން އިތުރު 135 ހެކްޓަރު ހިއްކަން ނިންމައިފި

މާލޭ މީހުންނަށް ގޯތި ދިނުމަށް ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި ހިއްކަން ފެށި ގުޅިފަޅާއި ގިރާވަަރު ފަޅުން އިތުރު 135 ހެކްޓަރުގެ ބިން ހިއްކަން ނިންމާފައިވާކަން ރައީސް މުހައްމަދު މުއިއްޒު މިއަދު އިއުލާންކުރައްވައިފި އެވެ.

ވީ ކިހިނެއް؟ - ރައީސް މިކަން އިއުލާން ކުރެއްވީ އެ މަނިކުފާނުގެ ސަރުކާރުން ހިންގާ ބޯހިޔާވަހިކަމުގެ އެންމެ ބޮޑު މަޝްރޫއު ކަމަށްވާ، ކ. ފުށިދިއްގަރު ފަޅު ހިއްކުމުގެ މަޝްރޫއު ފެށުމަށް އެ ފަޅުގައި މިއަދު ހަވީރު ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

ބުނީ ކީކޭ؟ - "އަޅުގަނޑުމެންގެ ޕްލޭންގައި އޮންނާނެ އަދި އިއުލާން ވެސް ކުރިން ގުޅިފަޅުގައި މިހާރު ފެށިފައިވާ މަޝްރޫއު ވެސް، އެއެއް ނޫނޭ އަޅުގަނޑުމެންގެ ޕްލޭންގައި އޮތް މިންވަރަކީ. އަޅުގަނޑުމެން އިރާދަކުރެއްވިއްޔާ ގުޅިފަޅު ވެސް މިހާރު އެ ހިއްކަމުންދާ މިންވަރަށް ވުރެ މާ ބޮޑު ތަނުން ހިއްކަން ނިންމާފައި ވާނީ. ސައުވީސް މިލިއަން ކިއުބިކް މީޓަރުގެ ވެލި މިހާރު އަޅަނީ. އިތުރު 21 މިލިއަން ކިއުބިކް މީޓަރުގެ ވެލި ރީކްލެމޭޝަންގެ ގޮތުގައި ކުރިއަށް ދާނެ،" އޭގެ ސަބަބުން 85 ހެކްޓަރުގެ ބިން ގުޅިފަޅަށް އިތުރުވެގެން ދާނެކަން ފާހަގަކުރައްވައި ރައީސް ވިދާޅުވި އެެވެ.

"ހަމަ އެއާ އެކު، ގިރާވަރު ފަޅަށް ވެސް މިހާރު އެ ކުރިއަށްދާ މިންވަރަށް ވުރެ މާ ބޮޑު ތަނުން އިތުރުކުރެވި، އިތުރު 50 ހެކްޓަރު ގިރާވަރު ފަޅުން ވެސް އަޅުގަނޑުމެން ހިއްކާނަން."

ތަފްސީލު- ރައީސް ވިދާޅުވީ، މާލެ، ވިލިމާލެ، ގުޅިފަޅު، އަދި ގިރާވަރު ފަޅު ގުޅިގެންދާ ގޮތަށް ގްރޭޓާ މާލެ ކަނެކްޓިވިޓީ ބްރިޖާ އެކު، އެ ތަންތަން ހިއްކައި ނިންމާ އަދި މިއަދު ފެށި ފުށިދިއްގަރު ފަޅު މަޝްރޫއު ހިމެނޭ ގޮތަށް ބޯހިޔާވަހިކަމުގެ މައްސަލައަށް ޖުމްލަ ހައްލެއް ލިބިގެންދާނެ ކަމަށެ.

އޭގެ އިތުރުން، އެމަނިކުފާނުގެ ވިސްނުންފުޅަކީ، އެ ތަންތަން ހިއްކާ ނިންމައި ނުހިއްކާ އޮތް އެ ތަންތަނުން ދިނުމަށް ކުރީ ސަރުކާރުން ނިންމާފައިވާ ގޯތިތައް ވެސް އެ ތަންތަނުން ގޯތި ލިބުނު މީހުންނަށް ދިނުން ކަމަށް މިއަދު ވެސް ރައީސް ތަކުރާރު ކުރެއްވި އެވެ.

ފާހަގަކޮށްލެވޭ ކަމެއް - މިއަދުގެ ރަސްމިއްޔާތުގައި ރައީސް ވަނީ، ފުށިދިއްގަރު ފަޅު މަޝްރޫއަށް ކިޔާނެ ނަމަކީ 'ރަސް މާލެ' ކަމުގައި އިއުލާން ކުރައްވާފަ އެވެ. އަދި އެއީ، ތިމާވެއްޓާ ރަށްޓެހި، މުޅި ދުނިޔެއަށް ވެސް ނަމޫނާ ސިޓީއަކަށް ވެގެންދާނެ ކަމަށް އެ މަނިކުފާނު ވިދާޅުވި އެވެ.

"ފުށިދިއްގަރު ފަޅު މަޝްރޫ އަކީ މިއަދާ ހަމައަށް ރާއްޖޭގައި ހިންގާ، އެންމެ ބޮޑު ބިން ހިއްކުމުގެ މަޝްރޫއު. މި މަޝްރޫއުގެ ދަށުން 1،155 ހެކްޓަރުގެ ބިން، މިއަދު މި ފަށާ ގޮތަށް ގާތްގަނޑަކަށް އަށް މަސްދުވަސް ވާއިރު އޮންނާނީ ނިމިފައި،" އެއީ ހުޅުމާލޭގެ ދެ ފިވަހި އެއްކޮށްލުމުން ވާ ވަރަށް ވުރެ ތިން ގުނަ ބޮޑު ސަރަހައްދެއްކަން ފާހަގަކުރައްވައި ރައީސް ވިދާޅުވި އެވެ.