އެމްޑީޕީން އެންމެ ފަހުން އުކުޅަހުގައި ބޭއްވި ނުރަސްމީ ގައުމީ މަޖިލީހުގެ ބައްދަލުވުން(ފޮޓޯ/އެމްޑީޕީ)
އެމްޑީޕީ މަޖިލިސް ޕްރައިމަރީ ބާއްވަނީ ޖެނުއަރީގައި؛ މޭޔަރު އިންތިހާބަށް ފަހު
އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި އިދިކޮޅު މައި ޕާޓީ، އެމްޑީޕީގެ ފަރާތުން ވާދަ ކުރާނެ ކެންޑިޑޭޓުން ހޮވުމަށް ބާއްވާ ޕްރައިމަރީ އޮންނާނީ މާލޭ މޭޔަރުގެ ބައި-އިލެކްޝަނަށް ފަހު، އަންނަ މަހުގެ ތެރޭގައި ކަމަށް އެ ޕާޓީން މިއަދު ބުނެފި އެވެ.
ވީ ކިހިނެއް؟ - އެމްޑީޕީގެ ޕްރައިމަރީގައި ވާދަ ކުރުމަށް ބައެއް ކެންޑިޑޭޓުން އިއުލާންކޮށް، ކެމްޕެއިން ފަށާފައި ވާއިރު، ވާދަވެރި ޕީޕީއެމް-ޕީއެންސީން މި މަހުގެ 23ގައި މަޖިލިސް ޕްރައިމަރީ ބޭއްވުމަށް ވަނީ ނިންމާފަ އެވެ.
ބުނީ ކީކޭ؟ - "މިވަގުތު ހުރިހާ ފޯކަސްއެއް ހުރީ މޭޔަރު އިންތިހާބުގެ ބައި-އިލެކްޝަންއަށް. މަޖިލިސް ޕްރައިމަރީ އޮންނާނީ އެއަށް ފަހު ޖެނުއަރީ މަސް ތެރޭގައި،" އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) މިއަދު 'ދައުރު'އަށް ވިދާޅުވި އެވެ.
ތަފްސީލު - އޭނާ ވިދާޅުވި ގޮތުގައި، ޕްރައިމަރީ ބާއްވާނެ ސީދާ ތާރީހެއް އަދި ނުނިންމަ އެވެ. އެ ތާރީހު ގައުމީ މަޖިލިސްއިން ނިންމާނެ ކަމަށް އޭނާ ވިދާޅުވި އެވެ.
މާލޭ މޭޔަރުގެ ބައި-އިލެކްޝަން އޮތީ އަންނަ މަހުގެ 13ގަ އެވެ. އެއަށް ފަހު، ހޮނިހިރު ދުވަހެއްގައި ބާއްވާ ނަމަ، ޕްރައިމަރީ އޮންނާނެ ކަމަށް ބެލެވޭ ތާރީހުތަކަކީ:
-
20 ޖެނުއަރީ
-
27 ޖެނުއަރީ
މީގެ ކުރިން އެމްޑީޕީން އެތެރޭގެ އިންތިހާބުތައް ބާއްވާފައި ވަނީ ހޮނިހިރު ދުވަހެއްގަ އެވެ.
ފާހަގަކޮށްލެވޭ ކަމެއް - މަޖިލިސް އިންތިހާބު، އަންނަ މާޗު މަހުގެ ކުރީކޮޅު ފެށޭ ރޯދަ މަހަށް ފަހު ބޭއްވުމަށް މަޖިލީހުގެ މިނިވަން މުއައްސަސާތަކުގެ ކޮމިޓީން ވަނީ ލަފާ ދީފި އެވެ. ނަމަވެސް، އިންތިހާބު ބާއްވާނެ ތާރީހެއް އިލެކްޝަސް ކޮމިޝަނުން އަދި ކަނޑައެއް ނާޅަ އެވެ.
ފަސްމަންޒަރު - އެމްޑީއޭ އާއި އެމްއެންޕީން ވެސް ބައިވެރިވާ ވެރިކަން ކުރާ ކޯލިޝަން ޕީޕިއެމް-ޕީއެންސީގެ މަޖިލިސް ޕްރައިމަރީ މި މަހުގެ 23ގައި ބާއްވާއިރު، އެ ޕްރައިމަރީއަށް ކުރިމަތިލުމަށް ހުޅުވާލި މުއްދަތު މިދިޔަ ހޯމަ ދުވަހަށް ވަނީ ހަމަވެފަ އެވެ. އެހެން ޕާޓީތަކުން އަދި ޕްރައިމަރީގެ ވާހަކަ ނުދައްކަ އެވެ.