ކުރީގެ ވެރިން ވެސް ސަރުކާރަށް އެއްބާރުލުން ދޭން ޖެހޭނެ: ޝަހީމް

ރައީސް މުހައްމަދު މުއިއްޒު އާއި ކުރީގެ ރައީސް އަބްދުﷲ ޔާމީންގެ ދެމެދުގައި އުފެދިފައިވާ ހަމަނުޖެހުންތަކުގެ ތެރެއަށް ވަދެވަޑައިގަންނަވަން ބޭނުން ނުވާ ކަމަށާއި، ނަމަވެސް ސަރުކާރު ހިންގުމުގައި ކުރީގެ ވެރިން ވެސް އެއްބާރުލުން ދެއްވަން ޖެހިވަޑައިގަންނަވާނެ ކަމަށް ގަބޫލުކުރައްވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އިއްޔެ ވިދާޅުވެއްޖެ އެވެ.

ވީ ކިހިނެއް؟ - ސަރުކާރު ބަދަލުވުމާ އެކު، ޕީޕީއެމް-ޕީއެންސީ ތެރެއިން ޔާމީން ބާކީކޮށްލައި މުއިއްޒު ވެސް އެ މަނިކުފާނާ ވާހަކަނުދައްކަވާ ކަމުގެ ތުހުމަތުތަކާ އެކު، މިދިޔަ ބުރާސްފަތި ދުވަހުގެ ރޭ ޔާމީން ވަނީ ޕީޕީއެމް އިން ވަކިވެވަޑައިގެން، އާ ޕާޓީއެއް އުފެއްދެވުމުގެ މަސައްކަތް ފައްޓަވާފަ އެވެ.

މި ދަނޑިވަޅުގައި ސަރުކާރުގެ އިސް މަގާމުތަކުގައި ތިއްބެވި ޕީޕީއެމް-ޕީއެންސީގެ ލީޑަޝިޕުގެ ބޭފުޅުންވަނީ، އެ ބޭފުޅުން ތިއްބެވީ ރައީސް މުއިއްޒުގެ ފަހަތްޕުޅުގައި ސަރުކާރު ދަމަހައްޓަންކަން ހާމަކުރައްވާފަ އެވެ. އެކަން ހާމަކުރެއްވި ވަޒީރުންގެ ތެރޭގައި ޝަހީމް ވެސް ހިމެނިވަޑައިގަންނަވަ އެވެ.

ބުނީ ކީކޭ؟ - ޝަހީމް އިއްޔެ 'ދައުރު'އަށް ދެއްވި ހާއްސަ އިންޓަވިއުއެއްގައި، ރައީސް މުއިއްޒު އާއި ޔާމީންއާ ދެ ބޭފުޅުންގެ ތެރެއިން ކޮންމެ ވެސް އެއް ބޭފުޅަކު އިހުތިޔާރުކުރައްވަން ޖެހިވަޑައިގަތުމަކީ އުނދަގޫ ނިންމުމެއްތޯ އާއި މުއިއްޒުގެ ފަހަތްޕުޅުގައި ހުންނަވަން ނިންމެވީ ކީއްވެތޯ ސުވާލުކުރުމުން އޭނާ ވަނީ އެކަމާ ބެހޭ ގޮތުން ތަފްސީލުކޮށް ވާހަކަދައްކަވަން އުޒުރުވެރިވެވަޑައިގަންނަވާފަ އެވެ.

"އަޅުގަނޑު ބޭނުމެއް ނުވޭ އެ ދެ ބޭފުޅުންގެ [ރައީސް މުއިއްޒު އާއި ޔާމީން]އާ، ތެރޭގައި އޮތް ހަމަނުޖެހުމުގެ ތެރެއަށް ވަންނާކަށް. އަދި މީޑިއާގައި ވެސް އެކަމާ ބެހޭ ގޮތުން ވާހަކަ ދައްކާކަށް އަޅުގަނޑު ބޭނުމެއް ނުވޭ،" ޔާމީން 2018ގައި ވެރިކަމުގެ ދެ ވަނަ ދައުރަކަށް ކުރިމަތިލެއްވިއިރު ރަނިން މޭޓެއްގެ ގޮތުގައި ވެސް ހިޔާރުކުރެއްވި ޝަހީމް ވިދާޅުވި އެވެ.

އެކަމާ ގުޅޭ ގޮތުން ސީދާ އެއްޗެއް ވިދާޅުވާން ބޭނުން ނުވާކަން ފާހަގަކުރައްވައި ޝަހީމް ވިދާޅުވީ:

ޔާމީން ދެކޮޅަށް މަސައްކަތް ކުރަން ފެއްޓެވުމަކީ ސަރުކާރަށް ކުރިމަތިވާނެ ގޮންޖެހުމެއް ކަމަށް ގަބޫލުކުރައްވަންތޯ ސުވާލުކުރުމުން ޝަހީމް ވިދާޅުވީ، ސިޔާސީ މަސްރަހުގައި އެފަދަ ކަންކަން އަބަދުވެސް ހިނގާނެ ކަމަށާއި، ނަމަވެސް ގައުމު ހަމަ މަގަށް އެޅުވުމަށް ވެރިކަމުގައި ހުންނަވައިގެން ރައީސް މުއިއްޒު މަސައްކަތް ކުރައްވަމުން ގެންދަވާނެ ކަމާ މެދު ފުރިހަމަ ޔަގީންކަން އެބައޮތް ކަމަށެވެ.

ރައީސް މުއިއްޒުގެ އެ މަސައްކަތް ކާމިޔާބު ވާނެ ކަމަށް ގަބޫލުކުރައްވާ ކަމަށާއި، އެ މަނިކުފާނު ފެއިލްވެފައިވާ ކަމަށް ވިދާޅުވާން އަދި މާ އަވަސް ކަމަށް ޝަހީމް ވިދާޅުވި އެވެ.

ރައީސް މުއިއްޒު ވެރިކަމާ ހަވާލުވަޑައިގަތުމަށް ފަހު ފެންނަނީ ވަރަށް ބުރަކޮށް މަަސައްކަތް ކުރައްވަމުން ގެންދަވާ ތަންކަން ފާހަގަކުރައްވައި ޝަހީމް ވިދާޅުވީ، އެ މަނިކުފާނަށް ސަރުކާރު ހިންގުމުގައި ކުރީގެ ވެރިން ވެސް އެއްބާރުލުން ދެއްވަން ޖެހިވަޑައިގަންނަވާނެ ކަމަށް ގަބޫލުކުރައްވާ ކަމަށެވެ.

"އެހެންވީމަ މި ކަމަށް ދިވެހި ރައްޔިތުން، ރާއްޖޭގެ ސިޔާސީ ވެރިން އަދި ހުރިހާ ފަރާތްތަކުން ވެސް ވަރަށް ބޮޑަށް ސަޕޯޓު ދެއްވަން ޖެހޭނެ ކަމަށް އަޅުގަނޑު ގަބޫލުކުރަނީ. އަދި މިވީ ހަފްތާއެއްހާ ދުވަސް ގައުމުގެ ކަންތައްތަކާ ރައީސް މުއިއްޒު ހަވާލުވެވަޑައިގެންނެވިތާ. އެ މަނިކުފާނުގެ ވެރިކަމާ މެދު ޖަޖްމެންޓެއް ދޭން ނުވަތަ ގޯސް ކަމަށް ބުނަން އަދި މާ އަވަހޭ އަޅުގަނޑު ދަންނަވާނީ. އަޅުގަނޑަށް ފެންނަނީ ރަނގަޅު ކަންތައްތައް،" ޝަހީމް ވިދާޅުވި އެވެ.