އެމްޑީޕީގެ މެންބަރު ޝަހީމް ވިދާޅުވީ ފްލެޓް ލިސްޓް އޮޅުވާލާފައިވާ ކަމަށް

އެމްޑީޕީގެ ސަރުކާރުން އިމާރާތް ކުރަން ފަށާފައިވާ 4،000 ފްލެޓް ދޭނޭ ފަރާތްތަކުގެ ލިސްޓް އެ ސަރުކާރުގެ އެންމެ ފަހު ދުވަސްކޮޅުގެ ތެރޭ އެކުލަވާލުމުގައި ގޯސްކޮށް ކަންތައްތަކެއް ހިންގާފައިވާ ކަމަށާއި އެކަމުގައި އޮޅުވާލުންތަކެއް ހުރި ކަމަށް، އެމްޑީޕީއަށް ނިސްބަތްވެވަޑައިގަންނަވާ ހެންވޭރު ދެކުނު ދާއިރާގެ މަޖިލިސް މެންބަރު ހުސެއިން ޝަހީމް (އަދުން ހުސެއިން) މިއަދު ތުހުމަތުކުރައްވައިފި އެވެ.

ވީ ކިހިނެއް؟ - ކުރީ ސަރުކާރުން މާލެއިން ދޫކޮށްލާފައިވާ ބިންތަކާއި ފްލެޓްތަކާ ގުޅޭ ގޮތުން މި ސަރުކާރުގެ ސިޔާސަތު ސާފު ނުވާކަން ފާހަގަކުރައްވައި ފްލެޓާއި ގޯތީގެ ލިޔުން ހަވާލުކުރުން އަވަސްކުރަން ގޮވާލާ އެމްޑީޕީއަށް ނިސްބަތްވެވަޑައިގަންނަވާ ގަލޮޅު ދެކުނު ދާއިރާގެ މެންބަރު މީކާއިލް ނަސީމް މިއަދު ވަނީ މަޖިލީހަށް ކުއްލި މައްސަލައެއް ހުށަހަޅުއްވާފަ އެވެ.

އެ މައްސަލައިގެ ބަހުސްގައި ވާހަކަ ދައްކަވަމުން ޝަހީމް ވަނީ ފްލެޓް ލިސްޓާ ގުޅޭ ގޮތުން އޭރުގެ ހައުސިން މިނިސްޓަރު މުހައްމަދު އަސްލަމް އާއި އެކަމުގައި އިސްކޮށް އުޅުއްވި ހައުސިންގެ ސްޓޭޓް މިނިސްޓަރު އަކުރަމް ކަމާލުއްދީންއަށް ނިސްބަތްކުރައްވައި ތުހުމަތުތަކެއް ކުރައްވައިފަ އެވެ. 

ތަފްސީލް - ފްލެޓް ލިސްޓް އެކުލަވާލި ގޮތާ މެދު ކަންބޮޑުވުން ފާޅުކުރައްވަމުން ޝަހީމް ވިދާޅުވީ އެ ލިސްޓާ ވިދިގެން އޭނާގެ ދާއިރާގެ އެތައް ބައެއްގެ ފަރާތުން އޭނާއަށް ގިނަ އަދަދެއްގެ ޝަކުވާ ލިބިފައިވާ ކަމަށެވެ. އެ ޝަކުވާތަކަށާއި ފެންނަން ހުރި ކަންކަމަށް ބަލާއިރު ވެސް އެއީ އެއްގޮތަކަށް ވެސް ރަނގަޅަށް ހިންގާފައިވާ ނޫން ކަމަށް އޭނާ ވިދާޅުވި އެވެ.

ޝަހީމް ވިދާޅުވި ގޮތުގައި: 

"އެއީ އަދި އަޅުގަނޑު ނިސްބަތްވާ ޕާޓީގެ ސަރުކާރެއްގެ ސްޓޭޓް މިނިސްޓަރަކު އަދި މިނިސްޓަރަކު ކުރެއްވި ކަމުގައި ކަމެއް ކަމުގައި ވީ ނަމަވެސް، ރަނގަޅަށް ބަލާފައި ކޮށްފައި އޮތް ކަމެއް ނޫން ކަމަށް ދަންނަވަން. ނިހާޔަތަށް ކަންބޮޑުވާ ގޮތަށް މި އޮތީ،" ޝަހީމް ވިދާޅުވި އެވެ. 

"އަޅުގަނޑުގެ ދާއިރާގައި ޖެހިޖެހިގެން ހުރި ގޭގެ އެކަކަށް ލިބިފައި އަނެކަކަށް ނުލިބުނީމާ އަޅުގަނޑެއް ދެން ނުޖެހޭ އެ ރައްޔިތުންނަކަށް ޕޮއިންޓް ދިން ގޮތް ކިޔައިދޭކަށް. އެ މީހުންނަށް އެނގޭ ތިމަންނާގެ ފަސް ކުދިން އެއް ކޮޓަރީގައިކަން އުޅެނީ. އެކަމަކު އަދި ކުއްޖަކު ވެސް ނެތް މީހަކަށްކަން މި ހުރީ ލިބިފައި."

ފްލެޓް ލިސްޓުގެ ޝަކުވާތަކާ ގުޅިގެން އޭރުގެ ސަރުކާރުގެ ތެރެއިން ކަންކަން ސާފުކުރެއްވިކަން ފާހަގަކުރައްވާ ޝަހީމް ވިދާޅުވީ:

"ހުރިހާ އެޕްލިކޭޝަންގެ މައުލޫމާތު ބަލަން ވަގުތެއް ނެތޭ އެބޭފުޅުން ވިދާޅުވީ. އެކަމަކު، އަޅުގަނޑުމެންނަށް ފަސްއަހަރުގެ ދައުރެއް ރައްޔިތުން ދެއްވި. ހަމަ އެންމެ ދުވަހެއް ވެސް މަދެއް ނޫން... ސަރުކާރު ނިމުނުއިރުގައި ކަމާ ހަވާލުވެ ތިބި ވަޒީރުންނާއި ނައިބު ވަޒީރުންނަށް އޮންނަންވާނީ ދެ ފުށްފެންނަ ގޮތަށް އިންސާފުވެރިކޮށް މިކަންކޮށްފައި،" ލިސްޓުގައި ހުރި ޝަރުތު ހަމަވާ މީހުންނަށް ފްލެޓް ލިބުމާ އޭނާ ދެކޮޅު ނޫންކަން ފާހަގަކުރައްވަމުން ވިދާޅުވި އެވެ.

ޝަހީމް ގޮވާލެއްވީ ހައްގުވާ ބަޔަކަށް ފްލެޓް ނުލިބި ދާނޭ ކަމުގެ ބިރު މިހާރުގެ ލިސްޓާ ހެދި އޮތަތީ މިހާރަށް ވުރަށް ބޮޑަށް އެކަން ބަލާފައި ފްލެޓް ލިބޭނޭ މީހުންގެ ލިސްޓު އިސްލާހުކޮށް ފްލެޓް ހަވާލުކުރުމުގެ މަސައްކަތް ފެށުމަށެވެ.

"ލިބެން ޖެހޭނޭ ފަރާތްތަކެއް ތިބީތީ އަޅުގަނޑު އެދެނީ މި ސަރުކާރުން ވެސް އަލުން ލިސްޓް ޗެކްކޮށް އެޔައިގެން ކުރިއަށް ދިޔުމަށް،" ޝަހީމް ވިދާޅުވި އެވެ. 

އެނގުން މުހިންމު - ފްލެޓް ހަވާލުކުރުމުގެ ކަންކަމުގައި ގޯސްތަކެއް ހަދާފައިވާ ކަމަށް ބުނެ، އެންޓި-ކޮރަޕްޝަން ކޮމިޝަން (އޭސީސީ) އިން ވަނީ ދެ ފަހަރެއްގެ މަތިން ފްލެޓް ދޫކުރުމުގެ މަސައްކަތް ހުއްޓާލުމަށް ހައުސިން މިނިސްޓްރީއަށް އަންގައިފަ އެވެ.

އެ އެންގުމާ ގުޅިގެން ފްލެޓު ދޫކުރުމުގެ މަސައްކަތް ހުއްޓާލާފައިވާ ކަމަށް ހައުސިން މިނިސްޓްރީން ބުނި ނަމަވެސް، މިހާރު އިމާރާތް ކުރަމުން އަންނަ 4،000 ފްލެޓް ލިބޭ މީހުންނަށް އެ މިނިސްޓްރީގެ ފަރާތުން ވަނީ އެ ސަރުކާރުގެ އެންމެ ފަހު ދުވަހު ފްލެޓް އެއްބަސްވުން ހަވާލުކޮށްފަ އެވެ.