އީސީގައި އަދިވެސް ބައިބައިވުމެއް؛ ފުއާދު އިސްތިއުފާ ދޭން ވިސްނަނީ

އިލެކްޝަންސް ކޮމިޝަން (އީސީ)ގެ ތެރޭގައި މީގެ ހަ މަސް ކުރިން އުފުދުނު ހިޔާލު ތަފާތުވުންތަކުގެ ތެރެއިން އަދިވެސް އެެ ކޮމިޝަންގެ މެންބަރުންނަށް އެއްގަލަކަށް ނޭރި، ކޮމިޝަންގެ ރައީސް ފުއާދު ތައުފީގު އެ މަގާމުން އިސްތިއުފާ ދެއްވުމާ މެދު ވިސްނަވަމުން ގެންދަވާކަން އޭނާ މިއަދު ހާމަކުރައްވައިފި އެވެ.

މައްސަލައިގެ ފެށުން - ކުރީގެ ރައީސް މުހައްމަދު ނަޝީދު އިސްވެ އުފެެއްދެވި ދަ ޑިމޮކްރެޓްސް ޕާޓީ ރަޖިސްޓްރީ ކުރުމުގެ މަރުހަލާގައި މިދިޔަ ޖުލައި މަސް ތެރޭ ކޮމިޝަންގެ މެންބަރުންގެ މެދުގައި އުފެދުނު ހިޔާލު ތަފާތުވުންތަކުގެ ތެރޭގައި ފުއާދާއި އެހެން ބައެއް މެންބަރުންނާ ދެމެދު މައްސަލަ ޖެހުނެވެ. އެގޮތުން:

ވީ ކިހިނެއް؟ - ބައެއް ނޫސްތަކުން ރިޕޯޓުކޮށްފައިވާ ގޮތުގައި ފުއާދު ކޮމިޝަންގެ ރައީސް ކަމުން އިސްތިއުފާ ދެއްވުމަށް މިހާރު ނިންމަވާފައިވާ ކަމަށެވެ. ނަމަވެސް، މިއަދު 'ދައުރު'އާ ވާހަކަ ދައްކަވަމުން ފުއާދު ވިދާޅުވީ، އެއީ "މުޅިން ތެދު ވާހަކައެއް ނޫން" ކަމަށެވެ.

ބުނީ ކީކޭ؟ - "އަދި އަޅުގަނޑު އިސްތިއުފާއެއް ނުދެން، އިސްތިއުފާ ދިނުމަށް ނުވެސް ނިންމަން... [ނަމަވެސް] އަޅުގަނޑަށް އަދިވެސް ކޮމިޝަންގެ ތެރޭގައި ހުރި ގޮންޖެހުންތަކުގެ ސަބަބުން، އިސްތިއުފާ ދިނުމަށް އެބަ ވިސްނަން،" ކޮމިޝަންގެ ރައީސްކަމުގެ މަގާމުގައި ދެ ވަނަ ދައުރެއް ފުރުއްވަމުން ގެންދަވާ ފުއާދު ވިދާޅުވި އެވެ.

ތަފްސީލު - އީސީގެ މެންބަރުންގެ މެދުގައި ޖެހުނު މައްސަލަތަކުގެ ތެރެއިން އޭރު، ގާނޫނީ ބުރަދަނެއް ނެތް ވޯޓެއް ނަގައި ފުއާދު ކޮމިޝަންގެ ރައީސް ކަމުން ވަކިކުރުމަށް ވެސް ނިންމި އެވެ. ނަމަވެސް، ކޮމިޝަންގެ ގާނޫނު ބުނާ ގޮތުން، އެއީ އެ ގޮތަށް ކުރެވޭނެ ކަމެއް ނޫނެވެ.

ފުއާދު މިއަދު 'ދައުރު'އަށް ވިދާޅުވީ:

"ފަސް މެންބަރުންގެ ތެރެއިން ތިން މެންބަރަކު ދިމާކޮށްފައި ހުންނަ ތަނެއްގައި އުޅުމަކީ، ހަގީގަތުގައި ވެސް ނަފްސާނީ ގޮތުންނާއި ހުރިހާ ގޮތްތަކުން ވެސް ވަރަށް އުނދަގޫ ކަމެއް. މަސައްކަތް ވެސް އެންމެ ރަނގަޅަކަށް ކުރިއަށް ނުގެންދެވޭނެ،" ފުއާދު ވިދާޅުވި އެވެ.

ފުއާދު ފާހަގަކުރެއްވި ގޮތުގައި، މި ކަންބޮޑުވުންތައް މަޖިލީހާ ހިއްސާކުރި ނަމަވެސް، އަދިވެސް ހައްލެއް ނާދެ އެވެ.

"ދެން އެހެންވީމަ، އަޅުގަނޑަށް ކުރެވެން އޮތް ކަމެއް ކޮށްފައި، ރީތި ގޮތުގައި ދިއުން ކަންނޭނގެ އޮންނާނީ،" ވަރަށް މާޔޫސްކަމާ އެކު ފުއާދު ވިދާޅުވި އެވެ.

"އެހެންވީމަ، އެކަމާ ދޭތެރޭ [އިސްތިއުފާ ދިނުމާ މެދު] ވިސްނަމުން މި ދަނީ. އެހެން ނަމަވެސް، އަދި އިސްތިއުފާއެއް ނުދެން."

ފުއާދުއާ ހިޔާލު ތަފާތުވި ތިން މެންބަރުންނަކީ:

"އެ މީހުން [އެ ތިން މެންބަރުން] ބޭނުންހާ ގޮތަކަށް ކަންކަން ނުގެންދެވޭތީ، އެ މީހުން ބޭނުންވަނީ އަޅުގަނޑު ބޭރުކޮށްލަން. އަޅުގަނޑަށް ވެސް އެއްބަހެއް ނުވެވޭނެ، ރައްޔިތުންގެ ހައްގުތަކަށް އަރައިގަނެގެން [އަދި] ޕާޓީއެއް ރަޖިސްޓްރީ ކުރަން އައިމަ، އެކި ސަބަބުތައް ދައްކައި އެކަންކަން ނުކުރާކަށް،" ފުއާދު އިތުރަށް ވިދާޅުވި އެވެ.

އޭގެ އިތުރަށް، ރައްޔިތުންގެ މަޖިލީހުގެ ދާއިރާތައް ބެހުން ފަދަ ކަންކަމުގައި ވެސް އޭނާ ލަފާ ދެއްވައި އެކަން ރަނގަޅަށް ކުރުމަށް ވަކާލާތު ކުރެއްވި ކަމަށް ފުއާދު ވިދާޅުވި އެވެ.

"އެހެންވީމަ، އުނދަގޫވާނެ ކޮމިޝަންގެ ރައިސްއަކަށް ހުންނަ މީހަކު، އެ މީހުން ބޭނުންހާ ގޮތަށް އެއްބަސް ނުވާ ކަމަށްވާ ނަމަ، ކަންކަން ކުރަން. މީގައި އެންމެ ބޮޑު މައްސަލަ އަކީ އެ މީހުން ބޭނުންވާ ގޮތަށް ކަންކަން ނުކުރެވުން،" އާނާ ތަކުރާރުކޮށް ވިދާޅުވި އެވެ. 

ރިޔާސީ އިންތިހާބުގެ ތެރޭގައި ފުއާދު ދެއްކި ޕްރޮފެޝަނަލިޒަމް އާއި ވަކި ކޮޅަކަށް ބުރަ ނުވެ، މިނިވަންކަމާ އެކު މަސައްކަތްކޮށްފައި ވާތީވެ، ބައެއް އާންމުންގެ ތައުރީފު އޭނާއަށް އަމާޒުވި އެވެ. އެކަމަށްޓަކައި ފުއާދު ޝުކުރު އަދާކުރެއްވި އެވެ.

"އަޅުގަނޑު މި ތަނުގައި ހުރިހާ ދުވަހަކު، ގާނޫނާއި ގަވައިދާ އެއްގޮތަށް މަސައްކަތް ކުރާނަން އަދި ރައްޔިތުންގެ ހައްގުތަކަށް ރައްކާތެރި ވާނަން،" އޭނާ ވިދާޅުވި އެވެ.