އަދީބާއި ޒިޔަތަށް މައާފުދިނުމުގެ ކަންބޮޑުވުމާ އެކު އެޗްއާރުސީއެމްއިން ގޮވާލީ ގާނޫނު އިސްލާހުކުރަން

އެމްއެމްޕީއާރުސީގެ ބޮޑު ހިޔާނާތް ހިންގުމުގައި އިސްކޮށް އުޅުއްވި ކުރީގެ ނައިބު ރައީސް އަހްމަދު އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތަށް ރައީސް އިބްރާހިމް މުހައްމަދު ސޯލިހް މައާފް ދެއްވުމުން ހިއުމަން ރައިޓްސް ކޮމިޝަން (އެޗްއާރުސީއެމް) އިން އިއްޔެ ކަންބޮޑުވުން ފާޅުކޮށް، މައާފު ދިނުމާ އަދަބު ލުއިކޮށްދިނުމުގެ ގާނޫނު އިސްލާހުކުރުމަށް ގޮވާލައިފި އެވެ.

ވީ ކިހިނެެއް؟ - ރައީސް ސޯލިހް، އަދީބާއި ޒިޔަތަށް މިދިޔަ ހޯމަ ދުވަހު މައާފު ދެއްވުމުން، ރާއްޖޭގެ އެންމެ ބޮޑު ހިޔާނާތުގެ އެއް މައްސަލައިގެ އިސް ބައިވެރިން، އެންމެ އަށް އަހަރުގެ ތެރޭގައި، މިހާރު ވަނީ މިނިވަން ވެފަ އެވެ. މިގޮތަަށް ރައީސް ސޯލިހް ނިންމެވީ އެ މަނިކުފާނުގެ ފަސް އަހަރުގެ ވެރިކަން ނިމެން އެންމެ ހަތަރު ދުވަަހަށް ވެފައި ވަނިކޮށެވެ.

ތަފްސީލް - އަދީބާއި ޒިޔަތުގެ އަދަބު ލުއިކޮށްދިނުމާ ގުޅިގެން ކަންބޮޑުވުން ފާޅުކޮށް އެޗްއާރުސީއެމް އިން އިއްޔެ ނެރުނު ބަޔާނެއްގަައި ބުނެފައިވަނީ، އެފަދަ ކުށްތައް ސާބިތުވެ، ހުކުމްކޮށްފައިވާ ފަރާތްތަކަކަށް ހުކުމްގެ ބޮޑު ބައެއް ތަންފީޒު ނުވަނީސް އަދަބު ލުއިކޮށްދިނުމުގެ ސަބަބުން މިނިވަން ވެގެން ދިއުމަކީ ކޮރަޕްޝަން ހުއްޓުވައި މަނާކުރުމަށް އަޅާފައިވާ ހަރުދަނާ ފިޔަވަޅުތަކަށް އެޅިގެންދިޔަ ހުރަހެއް ކަމަށެވެ.  

ގާނޫނީ ނިޒާމުގައި އެކަށައަޅާފައިވާ އުސޫލުތަކާ އިޖުރާއަތުތަކުގެ ތެރެއިން ކުށްވެރިންނަށް ދެވޭ އަދަބުތައް ފުރިހަމައަށް ތަންފީޒުނުކުރެވި، ސިޔާސީ ބޭނުންތަކާއި އެ ނޫން ވެސް ސިޔާސީ މަގްސަދުތައް ހާސިލުކުރުމަށް ކަމަށް ބެލެވިދާނެ ފަދަ ގޮތަކަށް އަދަބުތައް ލުއިކޮށްދިނުމަކީ ރައްޔިތުންގެ އިތުބާރު ވެސް ގެއްލިގެންދާނެ ކަމެއްކަން ފާހަގަކޮށް އެޗްއާރުސީއެމް އިން ބުނީ:

"ދެންނެވުނު މަގްސަދު ހާސިލުކުރުމަށްޓަކައި މައާފް ދިނުމާއި އަދަބު ލުއިކޮށްދިނުމުގެ ގާނޫނު ވީ އެންމެ އަވަހަށް އިސްލާހުކުރުމަކީ ކޮންމެހެން ބޭނުންތެރިކަމެއް ކަމުގައި މި ކޮމިޝަނުން ދެކެމެވެ،" ބަޔާނުގައިވެ އެވެ.

ކޮރަޕްޝަނުގެ ސަބަބުން ދައުލަތަށް ގެއްލިގެންދާ ފައިސާ އަކީ ރައްޔިތުންގެ ހައްގުތައް ކަށަވަރުކޮށްދިނުމުގެ ގޮތުން، ގައުމުގެ އުމްރާނީ ތަރައްގީއަށާއި ދައުލަތުގެ ފަރާތުން ފޯރުކޮށްދޭން ޖެހޭ އަސާސީ ހިދުމަތްތައް ފޯރުކޮށްދިނުމަށް ބޭނުންވާ ފައިސާކަން ފާހަގަކުރަމުން އެޗްއާރުސީއެމް އިން ބުނީ:

ފަސްމަންޒަރު - ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި އެމްއެމްޕީއާރުސީގެ ހިޔާނާތުގެ ތެރެއިން ރާއްޖޭގެ ރަށްތަކާއި ފަޅުތައް ކުއްޔަށް ދީގެން ދައުލަތަށް ލިބެން ޖެހޭ 3.2 ބިލިއަަނަށް ވުރެ ގިނަ ރުފިޔާ އަމިއްލަ ފަރާތްތަކުގެ އެކައުންޓުތަކަށް ވައްދައި އެކި ބޭނުންތަކަށް ބޭނުންކުރި އެވެ.

ރައީސް ސޯލިހް 2018ގައި ވެރިކަމަށް ވަޑައިގަތީ އެ ހިޔާނާތް ބަލައި ގެއްލުނު ފައިސާ ހޯދާނެ ކަމުގެ ވައުދާ އެކު އެވެ. ވެރިކަމުގެ ފަސް އަހަރު ނިމިގެންދާއިރު، އެއިން އެންމެ ފައިސާއެއް ވެސް ދައުލަތަށް ހޯދިފައެއް ނުވެ އެވެ.