ރައްޔިތުންގެ މަޖިލީހުގެ ރިޔާސަތުގައި ނައިބު ރައީސް އީވާ އަބްދުﷲ (ފޮޓޯ/ މަޖިލިސް)
ރިޔާސަތާ ދެކޮޅަށް އަމީން އާއްމަށް ޖަލްސާއެއް ނުބޭއްވޭނެ: އީވާ
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ މައްޗަށް ހުށަހަޅާފައިވާ އިތުބާރު ނެތް ކަމުގެ މައްސަލައިގެ ގަރާރު ހުށަހަޅާފައިވަނީ ގަވާއިދާ ހިލާފަށް ކަމަށް ކަނޑައަޅައި އެ މައްސަލަ ބޭރުކުރުމަށް އިއްޔެގެ ޖަލްސާގެ ރިޔާސަތު ބެލެހެއްޓެވި ވިލުފުށީ ދާއިރާގެ މެމްބަރު ހަސަން އަފީފް ނިންމެވި ނިންމެވުމާ ދެކޮޅަށް އެ މައްސަލަ އަލުން އެޖެންޑާކޮށް ޖަލްސާއެއް ބޭއްވުމުގެ ބާރު އަމީން އާއްމަށް ނުލިބޭ ކަމަށް ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ މިއަދު ވިދާޅުވެއްޖެ އެވެ.
ވީ ކިހިނެއް؟ - އީވާ އެ ގޮތަަށް ވިދާޅުވީ އިއްޔެ އާއި މިއަދު މަޖިލީހުގެ ކަންކަން ހިނގައިދިޔަ ގޮތާ ގުޅިގެން ނެރުއްވި ބަޔާނެއްގަ އެވެ.
މަޖިލީހުގެ ނައިބު ރައީސް ނެތި ވެސް ނަޝީދު މަގާމުން ވަކިކުރުމުގެ ގަރާރު ކުރިއަށް ގެންދެވޭނެ ކަމަށް ސުޕްރީމް ކޯޓުން ކަނޑައަޅާފައި ވާއިރު، އިއްޔެ ބޭއްވި ދެ ޖަލްސާ ވެސް ކުރިއަކަށް ނުގެންދެވުނެވެ. އެ ގަރާރު ހުށަހަޅާފައި ވަނީ ގަވައިދާ ހިލާފަށް ކަމަށް ބުނެ، އިއްޔެ ރިޔާސަތު ބެލެހެއްޓެވި ޑިމޮކްރެޓްސްގެ ވިލުފުށީ ދާއިރާގެ މެމްބަރު ހަސަން އަފީފް ނިންމެވުމުން އަމީން އާއްމު އެ މައްސަލަ އެޖެންޑާކޮށް އަލުން ޖަލްސާއެއް ބޭއްވި އެވެ. އެ ޖަލްސާގެ ރިޔާސަތު ބެލެހެއްޓެވި އީވާ ވެސް ވަނީ އެ މައްސަލަ ކުރިއަށް ނުގެންދެވޭނެ ކަމަށް ވިދާޅުވެފަ އެވެ. އެގޮތުން:
-
ރިޔާސަތުން އަމަލުކުރީ މަޖިލީހުގެ އިދާރާގެ ލަފައާ ހިލާފަށް ކަމަށް އެ އިދާރާއިން ވަނީ ބުނެފައި
-
އެ މައްސަލާގައި އީވާ އާއި އަފީފް މެމްބަރުންގެ އިމްތިޔާޒްތަކަށް އަރައިގެންފައިވާ ކަމަަށް މަޖިލީހުގެ އިމްތިޔާޒް އަދި ސުލޫކް ކޮމިޓީން ނިންމި
-
ގަރާރާ މެދު ދެން އަމަލު ކުރާނެ ގޮތެއް ކަނޑައެޅުމަށް އޭޖީގެ ލަފާ ހޯދުމަށް އިއްޔެ އާއްމު ކޮމިޓީން ވެސް ނިންމި
-
އޭޖީ ވިދާޅުވީ އެ މައްސަލަ ކުރިއަށް ނުގެންދެވޭނެ ކަމަށް އިއްޔެ ނިންމީ ގާނޫނުއަސާސީއާ ހިލާފަށް ކަމަށާއ އެ މައްސަލަ ބެލުމުގައި ރިޔާސަތު ބެލެއްޓުމަށް ދެކޮޅު ހަދައި ނުވަތަ އުޒުރުވެރިވާ މެންބަރުންނާ އަދި މަސްލަހަތު ފުށުއަރާ އެއްވެސް ފަރާތެއް ރިޔާސަތުގައި ނުބޭންދުމުގެ މުހިއްމު ކަމަށް އިސްކަން ދޭން ޖެހޭ ކަމަށް
ބުނީ ކީކޭ؟ - "މަޖިލީހުގެ ޖަލްސާއެއްގައި ރިޔާސަތުން ވަކި ގޮތެއް ނިންމުމެއް ނިންމުމުން އެ ނިންމުން ނަފީކޮށް، މަޖިލީހުގެ އަމީންއާއްމު އެހެން ގޮތަކަށް އެ ނިންމުން މާނަކުރައްވައި މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރުމުގެ މައްސަލަ މަޖިލީހުގެ ޖަލްސާއަށް އަލުން އެޖެންޑާ ކުރައްވައި ޖަލްސާއަށް ގޮވުމުގެ ބާރު އަމީން އާއްމަށް ލިބިގެން ނުވާ ވާހަކަ ދެންނެވީމެވެ،" އީވާގެ ބަޔާނުގައި ވިދާޅުވި އެވެ.
ސުޕްރީމް ކޯޓުގެ ހުކުމާ ގުޅިގެން އީވާ ވިދާޅުވީ:
-
އެ ހުކުމުން ސާފުކޮށްދީފައިވަނީ މަޖިލީހުގެ ރައީސް މަގާމުން ވަކިކުރުމުގެ މައްސަލައެއްގެ ރިޔާސަތު ބެލެހެއްޓުމަށް މަޖިލީހުގެ ނައިބު ރައީސް ހަމައެކަނި އުޒުރުވެރިވާ ހާލަތުގައި މަޖިލީހުގެ ގަވާއިދުގެ 44 ވަނަ މާއްދާގެ ދަށުން މަޖިލީހުގެ ރިޔާސަތު ބެލެހެއްޓުމަށް ކަނޑައަޅާފައިވާ މެމްބަރުންނަށް ވެސް އެ މާއްދާގައި ކަނޑައަޅާފައިވާ ތަރުތީބުން އެ ޖަލްސާގެ ރިޔާސަތު ބެލެހެއްޓިދާނެކަން
-
މަޖިލީހުގެ ނައިބު ރައީސް ޖަލްސާއެއްގެ ރިޔާސަތު ބަލަހައްޓަން ހުންނެވި ޖަލްސާއެއްގައި އެ ގަވާއިދުގެ 44 ވަނަ މާއްދާއިން ކަނޑައަޅާ ފަރާތްތަކަށް އެ ޖަލްސާއެއްގެ ރިޔާސަތު ނުބެލެހެއްޓޭނެ
"އެހެންކަމުން، ސުޕްރީމް ކޯޓުގެ އެ ހުކުމް ތަރަހައިން ބޭރުވެ، މަޖިލީހުގެ ނއިބު ރައީސް އުޒުރުވެރި ނުވާ އެއްވެސް ހާލަތެއްގައި މަޖިލީހުގެ ގަވާއިދުގެ 44 ވަނަ މާއްދާއިން ރިޔާސަތު ބަލަހައްޓަވަން ކަނޑައަޅާފައިވާ ފަރާތަކާ މަޖިލީހުގެ ރިޔާސަތު ބެލެހެއްޓުން ހަވާލުކުރުމުގެ ގާނޫނީ އެއްވެސް ބާރެއް އަމީން އާއްމަށް ލިބިގެނެއް ނުވެ އެވެ،" އީވާ ވިދާޅުވި އެވެ.
މަޖިލީހުގެ އަމީން އާއްމަށް ލިބިދޭ ބާރަކީ މަޖިލީހުގެ ގަވާއިދުގެ ތެރެއިން ހަމައެކަނި މަޖިލީހުގެ ރައީސް މަގާމުން ވަކިކުރުމުގެ މައްސަލަ އެޖެންޑާކުރުމާއި ޖަލްސާއަށް ގޮވުމުގެ ބާރުކަން އެ ހުކުމުން ސާފުވާކަން ފާހަގަކުރައްވަމުން އީވާ ވިދާޅުވީ އެ ޖަލްސާގައި ހިނގާ ކަންކަމާއި ނިންމާ ނިންމުންތައް މާނަކުރުމާއި އެ ނިންމުންތަކާ ހިލާފަށް އަމަލުކުރުމުގެ ބާރު އަމީން އާއްމަށް ލިބިގެން ނުވާ ކަމަށެވެ. އެގޮތުން:
-
މަޖިލީހުގެ ގަވާއިދުން އަމީން އާއްމަށް ލިބިފައި ނުވާ ބާރެއް އަމީން އާއްމު ނެންގެވުމަށް އެ ހުކުމް އެހެން ގޮތަކަށް މާނައެއް ނުކުރެވޭނެ
-
ގަވާއިދު މާނަކުރުމުގައި ގާނޫނުއަސާސީ އާއި މަޖިލީހުގެ ގަވާއިދާ ހިލާފުވުން ތަކުރާރުނުކުރެއްވުމަށް އިލްތިމާސްކުރެއްވި
މީގެ އިތުރުން، ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ގެންދިއުމާ ގުޅޭ ގޮތުން އެޓާނީ ޖެނެރަލްގެ ލަފާ ހޯދުމަށް އާއްމު ކޮމިޓީން ނިންމި ނިންމުމާ ގުޅިގެން ވެސް އީވާ ނުރުހުން ފާޅުކުރެއްވި އެވެ. އޭނާ ވިދާޅުވީ:
-
މަޖިލީހުގެ ހިންގުމުގެ ހުރިހާ ކަމެއްގައި މަޖިލީހަށް ގާނޫނީ ލަފާ ދިނުމަށް ކަނޑައަޅާފައިވަނީ މަޖިލީހުގެ ކައުންސެލް ޖެނެރަލް
-
ކޮމިޓީން އޭޖީގެ ލަފާ ހޯދުމަށް ނިންމި ނަމަވެސް މަޖިލިސް ހިންގުމުގެ ކަންކަމުގައި ބަންޑާރަ ނައިބުގެ ލަފާ ހޯދުމަށް ގަވާއިދުން ތަނެއް ނުދޭ
-
ތިން ބާރު ވަކިވެފައި އޮތް ނިޒާމެއްގައި އެއީ ގާނޫނުއަސާސީން މަޖިލީހަށް ދީފައިވާ ބާރު ކަނޑުވާލައި މަޖިލިސް ހިންގުމަށް އޮތް ހުރަހަކަށް ވާނެ
"ރައްޔިތުން އިންތިހާބުކޮށްފައިވާ މަޝްވަރާ މަޖިލީހެއްގެ ގޮތް ނިންމުމުގެ ތެރެއަށް އިދާރީ މަސައްކަތް ހިންގުމަށް ކަނޑައަޅާފއި ހުންނަ އަމީމް އާއްމު ވެންނެވުމަކީ ރައްޔިތުންގެ މަޖިލީހަށް ރައްޔިތުން ދީފައިވާ ބާރަށް އަރައިގަތުމެވެ. އަދި އިންތިހާބީ އޮނިގަނޑުން ބޭރުން މަޖިލީހުގެ މިނިވަންކަމާއި މުސްތަގިއްލުކަމާއި ކަރާމާތަށް އަރައިގަތުމަށް ކޮށައިދެވޭ މަގަކަށް ވާނެ އެވެ،" އީވާ ވިދާޅުވި އެވެ.
"މަޖިލީހުގެ ޖަލްސާތަކުގެ ރިޔާސަތު ބެލެހެއްޓުމަށް މަޖިލީހުގެ ނައިބު ރައީސް ޖަލްސާއަށް ހާޒިރުވެ ހުންނަހާ ހިނދަކު، މަޖިލީހުގެ ގަވާއިދުގެ 44 ވަނަ މާއްދާގެ ދަށުން ރިޔާސަތު ބެލެހެއްޓުމަށް ކަނޑައަޅާފައިވާ އެއްވެސް ފަރާތެއް ރިޔާސަތާ ހަވާލުވުމަކީ ގާނޫނުއަސާސީ އާއި މަޖިލީހުގެ ގަވާއިދާ އަދި ސުޕްރީމް ކޯޓުގެ އެ ހުކުމާ ކަނޑައެޅިގެން ހިލާފު ކަމެކެވެ."