މުއިއްޒުގެ އަނބިކަނބަލުންނަށް ވުމުން ޑިރެކްޓަރުކަން ނުދިން ކަމަށް ބުނެ ސާޖިދާ ހުށަހެޅި މައްސަލަ ސުޕްރީމް ކޯޓުން ވެސް ބަލައެއް ނުގަތް

މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ޑިރެކްޓަ ޖެނަރަލް ކަމުގެ މަގާމު ނުދިނީ، މާލޭގެ މޭޔަރު ޑރ. މުހައްމަދު މުއިއްޒުގެ އަނބިކަނބަލުންނަށް ވުމުން ވަޒީފާ ދިނުމުގައި ތަފާތުކޮށްގެން ކަމަށް ބުނެ، ސާޖިދާ މުހައްމަދު ހައި ކޯޓަށް ހުށަހެޅުއްވި މައްސަލަ ބަލައިނުގަތުމަށް އެ ކޯޓުން ނިންމި ނިންމުން ރަނގަޅު ކަމަށް ސުޕްރީމް ކޯޓުން ވެސް ކަނޑައަޅައިފި އެވެ.

މައްސަލައިގެ ފެށުން - އެމްއެފްޑީއޭގެ ޑިރެކްޓަ ޖެނެރަލްގެ މަގާމަށް މީހަކު ހޯދުމަށް 12 އޮގަސްޓު 2020ގައި ކޮށްފައިވާ އިއުލާނާ ގުޅިގެން، އޭރު ވެސް ހެލްތު މިނިސްޓްރީގެ އިސް މަގާމެއްގައި ހުންނެވި ސާޖިދާ އެ މަގާމަށް ކުރިމަތިލެއްވި އެވެ. ކޯޓަށް ހުށަހަޅާފައިވާ މައްސަލާގައި ސާޖިދާ ވިދާޅުވެފައިވާ ގޮތުން، އިމްތިހާނާއި އިންޓަވިއު މަރުހަލާއަށް ފަހު އެ މަގާމަށް އޭނާ ހޮވިފައިވާ ކަމާއި، އެ ވަޒީފާއަށް އޭނާ އައްޔަންކުރުމުގެ މަސައްކަތް ހެލްތު މިނިސްޓްރީން ކުރަމުންދާ ކަމަށް އެ އަހަރުގެ 25 އޮކްޓޯބަރުގައި އޭނާއަށް އަންގާފައި ވެސްވެ އެވެ.

އޭގެ ފަހުން:

ބުނީ ކީކޭ؟ - ހައި ކޯޓުގެ ފަނޑިޔާރުންގެ ނިންމުން މުރާޖައާކޮށްދިނުމަށް އެދި ސާޖިދާ ސުޕްރީމް ކޯޓަށް ހުށަހެޅުއްވި އިޖުރާއީ މައްސަލާގައި ސާޖިދާގެ ފަރާތުން ފާހަގަކުރައްވާފައި ވަނީ، އެ މައްސަލަ ބަލައިނުގަތުމަށް ރަޖިސްޓްރާ ނިންމެވި ނިންމުން ބާތިލުކުރަން ނުޖެހޭ ކަމަށް އެ ކޯޓުގެ ފަނޑިޔާރުން ނިންމަވާފައި ވަނީ، ސަބަބުތަކަށް ރިއާޔަތްކުރެއްވުމެއް ނެތި އަދި އެ ނިންމެވުމަށް ފަނޑިޔާރުން ވާސިލުވެވަޑައިގެންނެވި ސަބަބުތައް ވެސް ބަޔާންކުރެއްވުމެއް ނެތި ކަމަށެވެ.

ހައި ކޯޓުގެ ފަނޑިޔާރުން ނިންމެވި ނިންމެވުން މުރާޖައާކޮށް ސުޕްރީމް ކޯޓުގެ ފަނޑިޔާރުންގެ މަޖިލީހުން މިދިޔަ ހަފްތާގެ ބުދަ ދުވަހު ނިންމެވި ނިންމުމުގައި ވެސް ބުނެފައިވަނީ، އެ މައްސަލަ ބަލައިނުގަންނަން ހައި ކޯޓުގެ ފަނޑިޔާރުން ނިންމި ނިންމުމަށް ބަދަލު ގެންނަން ޖެހޭ ތަނެއް ނެތް ކަމަށެވެ.

ސާޖިދާގެ ފަރާތުން ހުށަހަޅުއްވާފައިވާ އިސްތިއުނާފީ ނުކުތާތަކާ ގުޅޭގޮތުން ސުޕްރީމް ކޯޓުގެ ނިންމުމުގައި ބުނެފައިވަނީ، މައިގަނޑު ނުކުތާއެއްގެ ގޮތުގައި ސާޖިދާ ވާހަކަދައްކަވާފައިވަނީ ތަފާތުކުރުމާ ގުޅޭ ގޮތުން ކަމަށް ވާއިރު، ތަފާތުކޮށްފައި ވަނީ ކޮން ފަރާތްތަކެއްގެ މެދުގައި ކަމާއި ކޮން ގޮތަކުން ކަމެއް ބަޔާންކޮށްދެއްވާފައި ނުވާ ކަމަށެވެ.

"އަދި ވަޒީފާ ދޭ ފަރާތުގެ ނިންމުމަކީ އިސްތިއުނާފް ކުރާ ފަރާތް [ސާޖިދާ]، މާލޭގެ މޭޔަރުގެ އަނބިކަނބަލުންނަށް ވެފައި، އިދިކޮޅު ސިޔާސީ ފަރާތްތަކާ ގުޅުން ހުރި ފަރާތަކަށް ވާތީ ނިންމާފައިވާ ނިންމުމެއް ކަމަށް މި ނުކުތާގައި ދައްކާފައިވާ ވާހަކަތަކުން ބާރެއް ނުދެ އެވެ،" ސުޕްރީމް ކޯޓުގެ ނިންމުމުގައިވެ އެވެ.

އެނގުން މުހިންމު - އޭޕްރީލް 2021ގައި ބޭއްވި ލޯކަލް ކައުންސިލްތަކުގެ އިންތިހާބު ކާމިޔާބު ކުރެއްވި ސާޖިދާގެ ފިރިކަލުން، މުއިއްޒު މާލޭގެ މޭޔަރުކަމާ ހަވާލުވެވަޑައިގަތީ 17 މޭ 2021ގަ އެވެ.

އެއަށް ފަހު، މިދިޔަ ސެޕްޓެމްބަރު މަހު ބޭއްވި ރިޔާސީ އިންތިހާބު ކާމިޔާބުކުރައްވައި މި މަހުގެ 17ގައި ވެރިކަމުގެ ހުވާކުރައްވަން މުއިއްޒު މިހާރު ވަނީ ތައްޔާރުވެވަޑައިގެންފަ އެވެ.