މަނާ ކުރި ސިޓިރިޒިން ބޭސް
ސިޓިރިޒިންގެ ދިޔާ ބޭހުގެ ބެޗެއް ރާއްޖޭގައި ވަގުތީ ގޮތުން މަނާކޮށްފި
އަރިދަފުސް ރޯގާ ޖެހުމުން ދިވެހިން އާންމުކޮށް ބޭނުން ކުރާ ބޭހެއް ކަމުގައިވާ ސިޓިރިޒިންގެ ދިޔާ ބާވަތުގެ ބެޗެއް ރާއްޖޭގައި ބޭނުންކުރުމާއި ވިއްކުމާއި އެތެރެ ކުރުން، މޯލްޑިވްސް ފުޑް އެންޑް ޑްރަގު އޮތޯރިޓީ (އެމްއެފްޑީއޭ) އިން މިއަދު މަނާކޮށްފި އެވެ.
ވީ ކިހިނެއް؟ - ކުޑަކުދިންނަށް ހާއްސަކޮށްފައިވާ އެ ބޭސް ވަގުތީ ގޮތުން މަނާކުރިކަން އެ އިދާރާ އިން އިއުލާންކުރީ ހެދި ޓެސްޓުތަކަކަށް ފަހު މިއަދު ނެރުނު ބަޔާނެއްގަ އެވެ.
ތަފްސީލު - އެމްއެފްޑީއޭ އިން އެގޮތަށް ނިންމީ، ބަޔާނުގައިވާ ގޮތުން، އެ ބޭހުގެ ބެޗެއްގައި ކެމިކަލް މާއްދާއެއް ކަމަށްވާ ޑައިއެތިލީން ގްލައިކޯލް (ޑީއީޖީ) އަދި އެތިލީން ގްލައިކޯލް (އީޖީ) އެކުލެވިގެންވާ ކަމަށް، ފުރަތަމަ މަރުހަލާގެ ޓެސްޓުތަކުން ދައްކާތީ އެވެ.
ބަޔާނުގައި ބުނިގޮތުގައި:
-
އޮކްޓޯބަރު 2022 އިން ފެށިގެން ދުނިޔޭގެ އެކި ކަންކޮޅުތަކުގައި އުފައްދާ، ކެއްސުމާއި ހުމާއި ރޯގާއަށް ބޭނުން ކުރާ ދިޔާ ބޭހުގައި އެ ދެ ކެމިކަލް ހިމެނޭ ކަމަށް ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން ނެރެފައިވާ އެލާޓާ ގުޅިގެން ރާއްޖެއިން ވެސް ރެންޑަމްކޮށް ބާޒާރުން ސާމަލް ނަގައި ސްކްރީންކުރުމުގެ މަސައްކަތް ފެށި
-
އެ ކެމިކަލް ދެނެގަތުމަށް ކުރަން ޖެހޭ ކޮންފަމޭޓިވް ޓެސްޓް ރާއްޖޭގައި ހެދޭނެ އިންތިޒާމް މިވަގުތު ހަމަޖެހިފައިނުވާތީ، ޑީއީޖީ އަދި އީޖީ ހުރިކަން ފާހަގަ ކުރެވޭ ސާމްޕަލްތައް ޓެސްޓު ކުރަނީ ރާއްޖެ އިން ބޭރުގެ ލެބޯރެޓަރީއަކަށް ފޮނުވައިގެން
"މި އަހަރުގެ މިހާތަނަށް 10 ސާމްޕަލް މާކެޓުން ނަގާ ސްކްރީން ކުރި އިރު ތިރީގައި މި ދަންނަވާ ބްރޭންޑްގެ މި ބެޗުގައި އީޖީ/ޑީއީޖީ ހުރިކަން ވަނީ ކަށަވަރުވެފައެވެ،" އެ ބަޔާނުގައި ބުނެފައިވެ އެވެ.
އެހެންވެ އެމްއެފްޑީއޭ އިން ނިންމާފައިވަނީ އެ ބްރޭންޑުގެ އިތުރު ތަހުލީލުތައް ހެދުމަށް ރާއްޖޭން ބޭރަށް ސާމްޕަލް ފޮނުވުމަށެވެ.
"މި ޓެސްޓުގެ ނަތީޖާ ލިބި، ބޭހުގެ ރައްކާތެރިކަން ކަށަވަރު ކުރެވެންދެން މި ބްރޭންޑް އެތެރެކުރުމާއި ވިއްކުމާއި ބޭނުން ކުރުމަކީ މަނާ ކަމެކެވެ،" ބަޔާނުގައި ބުނެފައިވެ އެވެ.