އިންތިގާލީ ކޮމެޓީން ދިވެހިބަހުގެ އެކެޑެމީއާ އެކު މިދިޔަ ބުދަ ދުވަހު ބައްދަލުވުން. (ފޮޓޯ/ދިވެހިބަހުގެ އެކެޑެމީ)
ބަހުގެ އެކެޑެމީން ނޭނގި އިންތިގާލީ ކޮމެޓީއާ ބައްދަލުކުރި ކަމަށް ބުނެ ޔުމްނާ ކަންބޮޑުވެއްޖެ
ދިވެހި ބަހުގެ އެކެޑަމީން ކަމާ ބެހޭ މިނިސްޓްރީއަށް ނޭނގި، އިންތިހާބީ ރައީސްގެ އޮފީހުގެ އިންތިގާލީ ކޮމެޓީއާ ބައްދަލުކުރި ކަމަށް ވިދާޅުވެ، އެ އެކެޑަމީގެ ބެލެނިވެރި ފަރާތް، އާޓްސް އެންޑް ކަލްޗާ މިނިސްޓަރު ޔުމްނާ މައުމޫން މިއަދު ކަންބޮޑުވުން ފާޅުކުރައްވައިފި އެވެ.
ވީ ކިހިނެއް؟ - އިންތިގާލީ ކޮމެޓީން ބަހުގެ އެކެޑެމީއާ ބައްދަލުކުރީ މިދިޔަ ބުދަދުވަހު އެވެ. އެ ބައްދަލުވުމުގައި އިންތިގާލީ ކޮމެޓީން ވަނީ ބަހުގެ އެކެޑެމީގެ މަސައްކަތްތައް ބަލައި އެ ކޮމެޓީއަށް ބޭނުންވާ މައުލޫމާތު ހޯދައިފަ އެވެ.
ބުނީ ކީކޭ؟ - އެ ބައްދަލުވުމާ މެދު ކަންބޮޑުވުން ފާޅުކުރައްވައި ޔުމްނާ މިއަދު 'އެކްސް'ގައި ކުރެއްވި ޕޯސްޓެއްގައި ވިދާޅުވީ އެ ބައްދަލުވުން ބޭއްވީ މިނިސްޓްރީއަށް އެންގުމެއް ނެތި ކަމަށެވެ.
"މިހާ ހިސާބަށް ދިޔައިމަ އެއްޗެއް ދަންނަވަން ޖެހޭ. އިންތިގާލީ ކަންކަން ކުރިއަށް ގެންދިއުމަށް ޕީއެސް [ޕާމަނަންޓް ސެކެޓްރީ]އާ ހަވާލުކޮށްފައިވަނިކޮށް ޕީއެސްއަށް ވެސް، އަޅުގަނޑަށް ވެސް ނޭނގި އިންތިގާލީ ކޮމިޓީއާ އެކެޑެމީން ބައްދަލުކުރެއްވުމުން އެކެޑެމީ ތެރެއަށް ސިޔާސީ ނުފޫޒު ވަދެފައި އޮތް ވަރު ސާފު،" އެ ޕޯސްޓުގައި ޔުމްނާ ވިދާޅުވި އެވެ.
މިހާ ހިސާބަށް ދިޔައިމަ އެއްޗެއް ދަންނަވަންޖެހޭ. އިންތިޤާލީ ކަންކަން ކުރިޔަށް ގެންދިޔުމަށް ޕީ.އެސް އާ ހަވާލުކޮށްފައިވަނިކޮށް ޕީ.އެސް އަށްވެސް އަޅުގަނޑަށް ވެސް ނޭނގި އިންތިޤާލީ ކޮމިޓީއާ އެކެޑެމީއިން ބައްދަލުކުރެއްވުމުން އެކެޑެމީ ތެރެއަށް ސިޔާސީ ނުފޫޒު ވަދެފައި އޮތްވަރު ސާފު. https://t.co/mGw4YHlra5 pic.twitter.com/IvmjbgGjQB
— Yumna Maumoon 🇲🇻 🤝🇵🇸 (@yumna_maumoon) October 16, 2023
ތަފްސީލު - މިނިސްޓަރުގެ ޕޯސްޓުގައި ބަހުގެ އެކެޑެމީގެ ރައީސާއި ނައިބު ރައީސްގެ މަސްއޫލިއްޔަތުތައް ވެސް ހިއްސާކުރެއްވި އެވެ. އެގޮތުން، އެކެޑެމީގެ މަސައްކަތްތަކާ ގުޅޭ ގޮތުން ކަމާ ބެހޭ ވަޒީރަށް ޖަވާބުދާރީވާން ޖެހޭ ކަމަށް އެކެޑެމީއާ ބެހޭ ގަވާއިދުގައި ބަޔާންކޮށްފައިވާކަން އޭނާ ފާހަގަކުރެއްވި އެވެ.
އެނގުން މުހިންމު - ދިވެހި ބަހުގެ އެކެޑެމީގެ ރައީސް ޑރ. އަޝްރަފް އަބްދުލްރަހީމަކީ ނިމިދިޔަ ރިޔާސީ އިންތިހާބުގައި ޕީއެންސީއާ އެކު ފަހު ވަގުތު ކޯލިޝަން ހެދި މީދޫ ދާއިރާގެ މެމްބަރު އަހުމަދު ސިޔާމް މުހައްމަދުގެ މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ މެމްބަރެކެވެ.
އެމްޑީއޭއިން ޕީއެންސީއަށް ތާއީދުކުރަން ނިންމީ، އެ ޕާޓީން ފުރަތަމަ ބުރުގައި ތާއީދުކުރި ރައީސް އިބްރާހިމް މުހައްމަދު ސޯލިހަށް ރިޔާސީ އިންތިހާބުގެ ފުރަތަމަ ބުރުގައި ނާކާމިޔާބީއާ ކުރިމަތިވެވަޑައިގަތުމުންނެވެ.
ކޮމެންޓް (2)
އޯޕްލީޒް
ހުންބާ