ވިއްސާރައިގައި ފެމިލީ ކޯޓަށް ފެން ވަދެ، މަސައްކަތް ހުއްޓުމަކަށް

ބާވެ، ބޭނުން ނުކުރެވޭ ވަރަށް ހަލާކުވެފައި ހުންނަތާ ގިނަ ދުވަސްތަކެއް ވެފައިވާ ފެމިލީ ކޯޓުގެ އިމާރާތަށް، ރޭ މާލެއަށް ކުރި ބޯ ވިއްސާރައާ އެކު ފެން ވަދެ، އެ ކޯޓުގެ މަސައްކަތްތައް ހުއްޓުމަކަށް އަތުވެއްޖެ އެވެ.

ވީ ކިހިނެއް؟ - ރޭ މާލެއަށް ހުއްޓުމެއް ނެތި ވަރަށް ގިނައިރުވަންދެން ވާރޭ ވެހިފައި ވާއިރު، ފެމިލީ ކޯޓުން ރޭ 10:20 ހާއިރު ނެރެފައިވާ ނޯޓިހެއްގައި ބުނެފައިވަނީ، އެ ވިއްސާރާގައި އެ ކޯޓުގެ ހެންވޭރު އިމާރާތުގެ ސީލިންގުން އިމާރާތުގެ އެތެރެއަށް ފެން ވަދެ، މަސައްކަތް ނުކުރެވޭ ވަަރަށް އެ ތަނަށާއި ތަކެއްޗަށް ގެއްލުން ލިބިފައިވާ ކަމަށެވެ. އެހެންވެ:

ތަފްސީލް - 'ދައުރު'އަށް އެނގިފައިވާ ގޮތުގައި، މީގެ ކުރިން ވެސް ވިއްސާރަ ކުރާ ދުވަސްވަރު އެ އިމާރާތަށް ވަރަށް ބޮޑަށް ވިއްސާރައިގެ އަސަރުކުރެ އެވެ. އޭރު ސީލިންގުން ފެން ފައިބަމުން ދިޔައީ އެ އިމާރާތުގެ ދެ ކޮޓަރިއަކަށް ނަމަވެސް، އެ މައްސަލަ ހައްލުކުރަން ކޯޓު އިމާރާތް މަރާމާތު ކުރަން ފެށި ފަހުން މިހާރު މުޅި އިމާރާތުގެ ސީލިންގުން ވެސް ފެން ވަންނަ ކަމަށްވެ އެވެ.

މާރާމާތުގެ މަސައްކަތް ކުރިއަށް ނުގޮސް މިހާރު ހުއްޓިފައި ވާއިރު، ސީލިންގުން ފެން ލީކުވެ، މުޅި އިމާރާތުގައި މަސައްކަތް ނުކުރެވޭ ވަރަށް ފެން ވަންނަ ކަމަށްވެ އެވެ، ރޭ ކުރި ވިއްސާރައިގައި، އެ ތަނުގައި ހުރި ސިސްޓަމްތަކާއި އޭސީ އަދި ބައެއް ލިޔެކިއުންތަކަށް ވެސް ފެނުގެ އަސަރު ކޮށްފައިވާ ކަމަށްވެ އެވެ.

'ދައުރު'އަށް ލިބިފައިވާ ފޮޓޯތަކާއި ވީޑިއޯތަކުން ވެސް ފެންނަ ގޮތުގައި:

ފެމިލީ ކޯޓުގައި މަސައްކަތް ކުރާ މުވައްޒަފަކު ވެސް 'ދައުރު'އަށް މިކަން ވަނީ ކަށަވަރުކޮށްދީފަ އެވެ. އޭނާ ބުނީ، އެ ތަނުގައި މިވަގުތު ފެން ނުވަންނަ އެއްވެސް ދިމާލެއް ނެތް ކަމަށާއި، ސީލިންގުގެ ބައިތައް ފީވެ، ނެއްޓެން ވެސް ފަށާފައިވާ ކަމަށެވެ.

އެހެންވެ، ވިއްސާރަ ދުވަސްވަރެއްގައި ކޯޓު އިމާރާތަށް ވަންނަ ފެނުގެ ސަބަބުން ތަކެއްޗަށް ލިބޭ ގެއްލުމުގެ އިތުރުން، އެ ތަނުގައި މަސައްކަތް ކުރާ މުވައްޒަފުންގެ ސަލާމަތާއި ރައްކާތެރިކަމަށް ވެސް ނުރައްކާވެފައިވާ ކަމަށް އޭނާ ބުންޏެވެ.

ކޯޓުގެ ބަސް - ފެމިލީ ކޯޓުގެ އިމާރާތަކީ ގާތްގަނޑަކަށް 40 އަހަރު ވެފައިވާ ދުވަސްވީ ތަނެކެވެ. އެ އިމާރާތް ބާވެ، ހަލާކުވެފައިވާތީ، މީގެ ކުރިން ވެސް ވިއްސާރަ ކުރާ ދުވަސްވަރެއް ނަމަ، ތަނުގެ ބައެއް މަސައްތަކަށް ބުރު އަރަ އެވެ. އެކަން ހައްލުކުރަން ޑިޕާޓުމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން މިދިޔަ މާޗު މަހު ވަނީ އެ ތަން މަރާމާތު ކުރުމުގެ މަސައްކަތް ފަށާފަ އެވެ. 

އެ މަސައްކަތް ކުރިއަށްދާ ގޮތާ ގުޅޭ ގޮތުން، ފެމިލީ ކޯޓުގެ ތަރުޖަމާނު އަހުމަދު ޝައްފާން ވިދާޅުވީ، އެ މަސައްކަތް އެއްކޮށް އަދި ނުނިމޭ ކަމަށާއި، މަސައްކަތް ފަށައިގެން ދޭތެރެ ދޭތެރެއިން މެދުކެނޑެމުން ގޮސް، މިހާރު މުޅިން ހުއްޓިފައިވާ ކަމަށެވެ.

"އަޅުގަނޑުމެން އެދެމުން މި ދިޔައީ ތަކުރާރުކޮށް ޑިޖޭއޭގައި އެ މަސައްކަތް ނިންމައި މައްސަލަ ހައްލުކޮށްދިނުމަށް. އެހެން އޮއްވައި މި ވިއްސާރަ މި ދިމާވީ. ޑީޖޭއޭ އިން ބުނެފައިވަނީ އަވަހަށް މަސައްކަތް ނިންމަން މަސައްކަތް ކުރަމުންދާ ކަމަށް،" އޭނާ ވިދާޅުވި އެވެ. 

މިކަމާ ގުޅޭ ގޮތުން ޑީޖޭއޭގެ ބަހެއް އަދި ނުލިބެ އެވެ.

އެނގުން މުހިންމު - ވިއްސާރައިގެ ސަބަބުން ކޯޓު އިމާރާތުން ހިދުމަތް ނުދެވޭތީ، ބައެއް ހިދުމަތްތައް ޖަސްޓިސް ބިލްޑިންއަށް ބަދަލުކޮށްފައިވެ އެވެ. އެގޮތުން، ޖަސްޓިސް ބިލްޑިންގުގެ އެންމެ ތިރީ ބުރިން ދެމުން އަންނަ ހިދުމަތްތަކަކީ: