އެއްވެ އުޅުން ހަނިކުރާ މާއްދާ އުވާލުން އަވަސްކުރަަން އެޗްއާރުސީއެމްއިން ގޮވާލައިފި

ރައީސް އަބްދުﷲ ޔާމީންގެ ސަރުކާރުގައި އެއްވެ އުޅުމާ ބެހޭ ގާނޫނަށް ގެނެސްފައިވާ، އާންމު ތަންތަނުގައި އެއްވުންތައް ބޭއްވުން މަނާކޮށްފައިވާ މާއްދާ އަދިވެސް އުވާނުލާ އޮތުމުން އެކަމާ މެދު ހިއުމަން ރައިޓްސް ކޮމިޝަން (އެޗްއާރުސީއެމް)އިން ކަންބޮޑުވެ އެ މާއްދާ އުވާލުން އަވަސް ކުރުމަށް ގޮވާލައިފި އެވެ.

ވީ ކިހިނެއް؟ - ކޮންމެ ކޮންމެ ތަނެއްގައި އެއްވުންތައް ނުބޭއްވޭ ގޮތަށް 'ސުލްހަވެރިކަމާ އެކު އެއްވެ އުޅުމުގެ މިނިވަންކަމުގެ ގާނޫނަށް' އިސްލާހު ގެނައީ 23 އޮގަސްޓް 2016 ގަ އެވެ.

އެ އިސްލާހުގައި ވާ ގޮތުން ފުލުހުން ލިޔުމަކުން ދޭ ހުއްދައަކާ ނުލައި މާލޭގައި އެއްވެސް ބާވަތެއްގެ އެއްވުމެއް، ހިނގާލުމެއް ނުވަތަ އުޅަނދުބުރެއް ބޭއްވޭނީ ހޯމް މިނިސްޓްރީން ކަނޑައަޅައި އިއުލާންކުރާ ތަނެއްގަ އެވެ.

ހޯމް މިނިސްޓްރީން 31 އޮގަސްޓު 2016 ގައި ކުރި އިއުލާނުގައިވާ ގޮތުން މާލޭގައި ފުލުހުންގެ ހުއްދައަކާ ނުލައި އެއްވުންތައް ބޭއްވޭނީ ހަމައެކަނި ކާނިވާ ސަރަހައްދުގަ އެވެ. އެހެންކަމުން ފުލުހުންގެ ހުއްދަ ނެތި އެހެން ތަންތަނުގައި އެއްވުންތަކާއި މުޒާހަރާތައް ނުބޭއްވޭނެ އެވެ.

ތަފްސީލު - އެޗްއާރުސީއެމްއިން މިއަދު ނެރުނު ނޫސްބަޔާނެއްގައި ބުނީ އެއްވެ އުޅުމުގެ މިނިވަންކަމުގެ ގާނޫނަށް ގެނައި އެ އިސްލާހާއެކު އެ ހައްގު ހަނިކޮށްފައިވާ ހަނިކުރުމަކީ ގާނޫނުއަސާސީގެ 32 ވަނަ މާއްދާގެ ދަށުން ރައްޔިތުންނަށް ލިބިދޭ އެއްވެ އުުމުގެ މިނިވަންކަމުގެ ހައްގާއި ރާއްޖެއިން ސޮއިކޮށް ތަސްދީގުކޮށްފައިވާ މަދަނީ އަދި ސިޔާސީ ހައްގުތަކާ ބެހޭ ބައިނަލްއަގްވާމީ މުއާހަދާ (އައިސީސީޕީއާރު) އަދި ބައިނަލްއަގްވާމީ މިންގަަނޑުތަކާ ވެސް ފުށޫއަރާ ކަމެއް ކަމަށެވެ.

އެއްވެ އުޅުމުގެ މިނިވަންކަން ހަނިކުރާ އިސްލާހު އުވައިލުމުގެ ބިލު ރައްޔިތުންގެ މަޖިލީހުން ދިރާސާކުރަމުން އަންނައިރު، އެޗްއާރުސީއެމްއިން ބުނީ އެ ބިލުގެ މަސައްކަތް އަވަސްކޮށްދިނުމަށް އެދި މިދިޔަ މަހުގެ 14ގައި އެ ކޮމިޝަނުން މަޖިލީހަށް ހުށަހެޅި ކަމަށެވެ.

ބުނީ ކީކޭ؟ - އެއްވެ އުޅުމުގެ މިނިވަންކަމަކީ ގާނޫނުއަސާސީ އާއި ރާއްޖެއިން ބައިވެރިވެފައިވާ ބޭރުގެ މުއާހަދާތަކުގެ ދަށުން ކަށަވަރުކޮށްދޭ އަސާސީ ހައްގެއްކަން ފާހަގަކޮށް އެޗްއާރުސީއެމްއިން ބުނީ މިފަދަ ހައްގެއް ނުވަތަ މިނިވަންކަމެއް އެއްވެސް މިންވަރަކަށް ހަނިކުރެވޭނީ ނުވަތަ ހިފެހެއްޓޭނީ މަޖިލީހުން ފާސްކުރާ ގާނޫނަކުން ނަމަވެސް ހައްގުތައް ހަނިކުރުމުގައި ބަލަން ޖެހޭ ކަންތައްތަކެއް ހުންނަ ކަމަށެވެ.

އެޗްއާރުސީއެމްއިން ބުނި ގޮތުގައި:

އެޗްއާރުސީއެމްގެ ބަޔާނުގައި މިއަދު ވެސް ތަކުރާރުކުރީ، މަޖިލީހުގައި ދިރާސާކުރަމުންދާ އެ އިސްލާހު އުވާލުމާ ބެހޭ ބިލުގެ މަސައްކަތް ވީހާ ވެސް އަވަސް ކުރުމަށެވެ.