ވެރިކަމުގައި ނިންމި ކަމަކާ މެދު އެއްވެސް 'ރިގްރެޓެއް' ނެތް: ރައީސް

ވެރިކަމުގެ މި ފަސް އަހަރުގެ ދައުރުގައި، ވަކި ކަމަކާ މެދު ވަކި ގޮތަކަށް އަމަލުކުރެއްވިގެން ހިތާމަ ނުވަތަ "ރިގްރެޓް" ނުކުރައްވާ ކަމަށް، އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުހައްމަދު ސޯލިހު އިއްޔެ ވިދާޅުވެއްޖެ އެވެ.

ވީ ކިހިނެއް؟ - އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގެ ކެމްޕެއިނުގައި އުޅުއްވާ ރައީސް އެހެން ވިދާޅުވީ، 'ދައުރު'ގެ 'ރިޔާސީ ވާހަކަ' ޕްރޮގްރާމަށް ދެއްވި ހާއްސަ އިންޓަވިއުއެއްގަ އެވެ.

ބުނީ ކީކޭ؟ - މި ފަސް އަހަރު ތެރޭގައި ރައީސަށް ނިންމަވަން އެންމެ އުނދަގޫވި ނިންމުމަކީ ކޮބައިތޯ ކުރި ސުވާލަށް ޖަވާބުދެއްވަމުން ރައީސް ވިދާޅުވީ، އެންމެ ބޮޑު "ޗެލެންޖަކަށް"ވީ ކޮވިޑް-19އާ ގުޅިގެން 2020ގައި ރާއްޖޭގެ ބޯޑަރުތައް ބަންދުކުރަން ނިންމަން ޖެހުން ކަމަށެވެ.

"އެއް ފަރާތުގައި ތިއްބެވީ މެޑިކަލް ޑޮކްޓަރުންނާއި ސިއްހީ މާހިރުން، އަނެއް ފަރާތުގައި އިގްތިސާދުގެ މަސައްކަތް ކުރައްވާ ބޭފުޅުން. ޓޫރިޒަމްއަށް ބަރޯސާވެފައި އޮތް ގައުމަކަށް ވާއިރުގައި ރާއްޖެއަށް ފްލައިޓުތައް އައުން ހުއްޓާލުން ވެގެން ދިޔައީ ވަރަށް އުނދަގޫ ޑިސިޝަންއަކަށް،" ރައީސް ވިދާޅުވި އެވެ.

ރައީސް ގަބޫލުކުރައްވާ ގޮތުގައި، އެއީ އޭރު ހާލަތު އޮތް ގޮތުން، ޓޫރިޒަމް ދާއިރާގެ ބައެއް ފަރާތްތަކުން ހިތްހަމަނުޖެހުނަސް، އެ މަނިކުފާނު ނިންމަވަން ޖެހިވަޑައިގެންނެވި ރަނގަޅު ނިންމެވުމެކެވެ.

ރައީސްގެ ހައިސިއްޔަތުން ނިންމެވި ނިންމެވުމަކާ މެދު "ރިގްރެޓް" ކުރައްވަންތޯ ކުރި ސުވާލުގެ ޖަވާބުގައި ރައީސް ވިދާޅުވީ މި ދައުރުގެ ތެރޭގައި "ވަކި ކަމެއް ވަކި ގޮތަކަށް ކުރެވިގެން ރިގްރެޓް ކުރާ ވަރުގެ ކަމެއް" ކުރެއްވިފައިވާ ކަމަކަށް ގަބޫލުނުކުރައްވާ ކަމަށެވެ.