މަސް ކިލޯއެއް 26ރ.އަށް ހަދަން ގާސިމް ވައުދުވެވަޑައިގެންފި

ރިޔާސީ އިންތިހާބު ކާމިޔާބުކުރައްވައި ވެރިކަމަށް ވަޑައިގެންނެވިއްޖެ ނަމަ، ރާއްޖޭގެ ކޮންމެ ހިސާބެއްގައި ބާނާ މަސް ސަރުކާރުން ގަންނާނީ 26ރ.އަށް ކަމަށް ޖޭޕީގެ ރިޔާސީ ކެންޑިޑޭޓް ގާސިމް އިބްރާހީމް މިއަދު ވިދާޅުވެއްޖެ އެވެ.

ވީ ކިހިނެއް؟ - ގާސިމް އެހެން ވިދާޅުވީ ގދ. އަތޮޅުގެ ވެރިކަން ކުރާ ތިނަދުއަށް ވަޑައިގެން އެ ރަށުގައި ރޭ ބޭއްވި ޖަލްސާގައި ވާހަކަދައްކަވަމުންނެވެ.

ބުނީ ކީކޭ؟ - މަސްވެރި ރަށެއް ކަމަށްވާ ތިނަދޫގައި ގާސިމް ދެއްކެވި ވާހަކައިގައި އޭނާ ވަނީ، ސަރުކާރުގެ މަސް ކުންފުނި، މިފްކޯ ހިންގަނީ ގެއްލުންވަމުންދާ ގޮތަށްކަން ފާހަގަކުރައްވާފަ އެވެ.

އޭނާ ވިދާޅުވީ، މިފްކޯއަށް އިންތިހާއަށް ގެއްލުން ވިޔަސް، ސަރުކާރުން އެ ކުންފުންޏަށް ފައިސާ ދެމުން ގެންދާތީ ރައްޔިތުންނަށް ފައިދާވާތީ އުފާކުރައްވާ ކަމަށެވެ. އެކަމަކު އެއީ ރަނގަޅަށް ވިޔަފާރި ކުރެވޭނެ ގޮތެއް ނޫންކަން އޭނާ ފާހަގަކުރެއްވި އެވެ.

"އެހެން ނަމަވެސް، އެކަން ކުރައްވަމުން ގެންދެވަނީ އެ ދުވަހު ވެސް ކުރައްވަމުން ގެންދެވި ގޮތަށް މިހާރު ވެސް އެ ދަނީ. ސަރުކާރަށް ނުހަނު ބޮޑު ގެއްލުން ވަމުން އެ ދަނީ،" ގާސިމް ވިދާޅުވި އެވެ.

ހޮރައިޒަން ކުންފުނި އުފައްދަވައިގެން މަސް އެކްސްޕޯޓް ކުރުމުގެ ވިޔަފާރި ކުރައްވަމުން ގެންދަވާ ގާސިމް ވިދާޅުވީ އޭނާގެ ވިޔަފާރިއަށް ވެސް ވަނީ މިފްކޯއަށް ވާ ގޮތް ކަމަށެވެ. ހޮރައިޒަންއަށް އަމިއްލައަށް 250 މިލިއަން ރުފިޔާ އިންވެސްޓު ކުރެއްވިޔަސް އެ ވިޔަފާރިން ފައިދާ ނުވާ ކަމަށް އޭނާ ވިދާޅުވި އެވެ.

އެހެން ބައެއް ރިޔާސީ ކެންޑިޑޭޓުން ވެސް ގަބޫލުކުރައްވާ ގޮތުގައި، މަހުގެ އަގު މަތި ކުރެވޭނީ، ރޯ މަސް އެކްސްޕޯޓް ނުކޮށް، އޭގެއިން އެހެން ތަކެތި އުފައްދައި އެކްސްޕޯޓުކޮށްގެންނެވެ. ނަމަވެސް، މާ ބޮޑު ތަފްސީލެއް ނުދެއްވައި ގާސިމް ވިދާޅުވީ އޭނާއަށް މަހުގެ އަގު ބޮޑުކުރެވެން އޮތީ، ވެރިކަމަށް އާދެވިއްޖެ ނަމަ އެވެ.

"މާތްﷲގެ ވާގިފުޅާ އެކު އަޅުގަނޑު މިފަހަރު މި ސަރުކާރަށް އަތުވެއްޖިއްޔާ ދިވެހިރާއްޖޭގެ ހުރިހާ ކަންކޮޅެއްގައި ބާނާ މަސްތައް ވިއްކަން އައިސްގެން ކަޅު ބިލަ މަހެއް ނުވިއްކާނެ 25ރ.އަށް ވުރެ ދަށް އަގަކަށް. އިންފެކްޓު، އަޅުގަނޑުމެން ގަންނާނީ 26ރ.އަށް ކިލޯއެއް،" މާ ބޮޑު ތަފްސީލެއް ނުދެއްވައި ގާސިމް ވިދާޅުވި އެވެ.

މަޖިލީހުގައި މާމިގިލި ދާއިރާ ތަމްސީލުކުރައްވާ ގާސިމް ވިދާޅުވީ، މިހާތަނަށް އައި ކޮންމެ ސަރުކާރެއްގައި ޖޭޕީ އޮތް ނަމަވެސް، މަހުގެ ހަމަ އަގު ކަނޑައެޅުން ފަދަ ކަންކަން ސަރުކާރުން ކުރަނީ އެއްވެސް މަޝްވަރާއެއް ކުރުމެއް ނެތި ކަމަށެވެ.

"މިހާރަކު އަޅުގަނޑަކަށް އެ ކަމެއް ނުކުރެވޭނެ. އެއީ ކީއްވެ؟ އަޅުގަނޑަކީ ރާއްޖޭގެ ރައީސުލްޖުމްހޫރިއްޔާއެއް ނޫން. އަޅުގަނޑު ދައްކާ ވާހަކައެއް ގަބޫލެއް ނުކުރޭ،" ގާސިމް ވިދާޅުވި އެވެ.

"އެހެން ނޫން ނަމަ، އަޅުގަނޑު ދެންނެވީމުސް، އަޅުގަނޑު ދެންނެވީމުސް މިކަން ކުރެވޭނެ ގޮތް."

ފާހަގަކޮށްލެވޭ ކަމެއް - ގާސިމްއާ އެއްގޮތަށް އެހެން ބައެއް ރިޔާސީ ކެންޑިޑޭޓުން ވެސް ވަނީ އެ ބޭފުޅެއްގެ ވެރިކަމެއްގައި މަހުގެ އަގު ބޮޑު ކޮށްދެއްވާނެ ކަމަށް ވައުދުވެވަޑައިގެންފަ އެވެ. އެގޮތުން، ޑިމޮކްރެޓްސްގެ ކެންޑިޑޭޓް އިލްޔާސް ލަބީބް ވިދާޅުވީ އޭނާގެ ވެރިކަމެއްގައި މަަސް ކިލޯއެއްގެ އަގު 25ރ.އަށް ހައްދަވައިދެއްވާނެ ކަމަށެވެ.