ތޮއްޑޫ ދާއިރާގެ މެމްބަރު ހަސަން ޝިޔާން (ވ) އަލުން އެމްޑީޕީއާ ގުޅިވަޑައިގެންނެވުމުގެ ފޯމު ރައީސް ސޯލިހުއާ ހަވާލުކުރައްވަނީ (ފޮޓޯ/އެމްޑީޕީ)
މެމްބަރު ޝިޔާން ޑިމޮކްރެޓްސް ދޫކޮށް އެމްޑީޕީއަށް
ތޮއްޑޫ ދާއިރާގެ މެމްބަރު ހަސަން ޝިޔާން ދަ ޑިމޮކްރެޓްސް ދޫކުރައްވައި އެނބުރި އެމްޑީޕީއާ މިއަދު ގުޅިވަޑައިގެންފި އެވެ.
ވީ ކިހިނެއް؟ - އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހު ވަނީ ޝިޔާން އެމްޑީޕީއަށް އަލުން ސޮއިކުރެއްވި ފޯމާ ހަވާލުވެވަޑައިގެންފަ އެވެ.
ބުނީ ކީކޭ؟ - ޝިޔާން އެމްޑީޕީއަށް ސޮއިކުރެއްވުމަށް ފަހު އެކްސްގައި ވިދާޅުވީ، އޭނާ އެ ޕާޓީއާ އަލުން ގުޅުމަށް ނިންމީ ތޮއްޑޫ ދާއިރާ އާއި މުޅި ރާއްޖޭގެ ގިނަ ރައްޔިތުންތަކެއްގެ ވިސްނުމާ އެއްގޮތަށް ވިސްނުން ބަދަލުކުރުމަށް ފަހު ކަމަށެވެ. އަދި އެ ދާއިރާއިން މިފަހަރު އެންމެ ގިނަ ވޯޓު ލިބޭނީ ވެސް ރައީސް ސޯލިހަށް ކަމަށް އޭނާ ވިދާޅުވި އެވެ.
"ތޮއްޑޫ ދާއިރާގެ ސާފު ބޮޑު އަގުލަބިއްޔަތާ އެކު ރައީސް އިބްރާހީމް މުހައްމަދު ސޯލިހު މި އިންތިހާބު އެއް ބުރުން ކާމިޔާބު ކުރައްވާނެ،" ޝިޔާން ވިދާޅުވި އެވެ.
Dhaairaa aai mulhi raajjeyge gina rayyithunge vindhaa egothah alhuganduge visnun badhalukoh @MDPSecretariat aa alun gulhijjain. IA Thoddoo Dhaairaa ge saafu bodu aghlabiyyathaa eku Raees @ibusolih mi inthikhaabu 1 burun kaamiyaabu kuravvaane.#UfaaveriAmaanRaaje pic.twitter.com/fNnYGgl2Hc
— Hassan Shiyan (@HassanShiyaan) August 25, 2023
އެނގުން މުހިއްމު - ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއީދުކުރައްވައި މިދިޔަ ޖެނުއަރީގައި އެމްޑީޕީ ދޫކުރައްވައި ޑިމޮކްރެޓްސްއަށް ސޮއިކުރެއްވި 12 މެމްބަރުންގެ ތެރޭގައި ޝިޔާން ހިމެނިވަޑައިގެންނެވި އެވެ.
ޝިޔާންއާ އެކު ޑިމޮކްރެޓްސްއާ ގުޅިވަޑައިގެންނެވި ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުއްލަތީފް ވެސް ވަނީ މި މަހު އަލުން އެމްޑީޕީއާ ގުޅިވަޑައިގެންފަ އެވެ. ޔާސިރުއާ އެކު ކުޅުދުއްފުށީ ކައުންސިލްގެ މެމްބަރުން ވެސް އެނބުރި އެމްޑީޕީއާ ގުޅުނުއިރު ޑިމޮކްރެޓްސްއާ ގުޅުނު އެހެން ބައެއް ކައުންސިލަރުން ވެސް ދަނީ އަލުން އެމްޑީޕީއާ ގުޅެމުންނެވެ.