'ބިންވެރިޔާ' ސްކީމުގެ ދަށުން މާލެ ސަރަހައްދުން ގޯތި ލިބޭ މީހުންގެ ގުރުއަތުލުން ގަލޮޅު ދަނޑުގައި އޮތް އިރު ފޯމު ލީ މީހުން އިށީނދެގެން (ދައުރު ފޮޓޯ/ހުސައިން ސުނޭން)
ދައުރު ޕޯލް: ހުޅުމާލެއިން ހިލޭ ގޯތި ދޭން ގިނަ މީހުން ދެކޮޅު
މި ސަރުކާރުގެ 'ބިންވެރިޔާ' ސްކީމްގެ ދަށުން ހުޅުމާލެއިން ހިލޭ 1،351 ގޯއްޗަށް މިހާރު ވަނީ ގުރުނަގައިފަ އެވެ. މިއީ މާލޭގެ ރައްޔިތުންނަށް ކޮށްދޭން ޖެހޭ ކަމެއް ކަމަށް ސަރުކާރުން ދެކެ އެވެ. އަދި ހިލޭ ބިން ހޯދަން ބޭނުން މާލޭ މީހުން ދެކޭ ގޮތުގައި އެއީ އެ މީހުންނަށް ލިބެން ޖެހޭ ހައްގެކެވެ.
ނަމަވެސް، މިއީ އެމްޑީޕީގެ ފުރަތަމަ ސަރުކާރުގައި 2010 އިން ފެށިގެން އުފެދިފައި އޮތް ވަރަށް ހޫނު މައުލޫއެކެވެ. ކުރީގެ ރައީސް މުހައްމަދު ނަޝީދުގެ ސަރުކާރުން އޭރު ނިންމީ މާލޭގެ ކުދިކުދި ތަންތަންކޮޅު ދޫކޮށްލާ ކޮންމެ މީހަކަށް ހުޅުމާލެއިން 1،600 އަކަފޫޓުގެ ގޯތެއް ދޭށެވެ. އެ ވެރިކަމުގައި 290އަށް ވުރެ ގިނަ ގޯތި، ހިލޭ ދޫކުރި އެވެ.
ނަމަވެސް، ހުޅުމާލެއަކީ ރާއްޖޭގެ އެންމެ އަގުބޮޑު ބިމަށް ވެފައި އެއް ބަޔަކު ބޮޑު އަގުގައި ބިން ގަންނަ އިރު އަނެއް ބަޔަކަށް ހިލޭ ގޯތި ދިނުމަކީ އިންސާފެއް ނޫން ކަމަށް، އޭރުއްސުރެ މިހާރު ވެސް އެތައް ބަޔަކު ބުނެ އެވެ.
'ބިންވެރިޔާ' ސްކީމްގައި މާލެ ސަރަހައްދުން ގޯތި ހޯދަން 19،000އަށް ވުރެ ގިނަ މީހުން ފޯމު ލި އެވެ. އޭގެ ތެރެއިން ހުޅުމާލެއިން ގޯތި ލިބޭނީ 1،351 މީހަކަށެވެ. ދެން ގޯތި ދޫކުރަނީ ގުޅިފަޅުންނާއި ގިރާވަރުފަޅު ހިއްކައިގެންނެވެ.
މިއީ އަދިވެސް ގިނަ ދިވެހިންގެ ހިޔާލު ތަފާތު މައްސަލައެއް ކަމުން 'ދައުރު'ން ޕޯލްއަކަށް ހުޅުވާލި އެވެ. އޭގައި ކިއުންތެރިންގެ ހިޔާލު ހޯދަން ހުށައެޅީ މިގޮތަށެވެ؛ ހުޅުމާލެއިން ހިލޭ އަދި ހަމައެކަނި މާލޭ އުފަން މީހުންނަށް ގޯތި ދިނުމަކީ:
-
ރަނގަޅު ކަމެއް
-
ވަރަށް ބޮޑު ބޭއިންސާފެއް
-
ކޮށްގެން ވާނެ ކަމެއް ނޫން
މި ޕޯލްގައި 2،225 މީހުން ބައިވެރިވެ އެ މީހުންގެ ވިސްނުން ހިއްސާކުރި އެވެ. އެގޮތުން:
-
ބައިވެރިވި %43 މީހުން ބުނީ އެއީ 'ރަނގަޅު ކަމެއް' ކަމަށް
-
'ވަރަށް ބޮޑު ބޭއިންސާފެއް' ކަމަށް ގަބޫލުކުރީ %40
-
'ކޮށްގެންވާނެ ކަމެއް ނޫން' ކަމަށް %17 މީހުން ބުނި
ފަހުގެ ދެ އިހުތިޔާރުގެ ޕަސެންޓޭޖް އެއްކޮށްލުމުން، ހުޅުމާލެއިން ހަމައެކަނި މާލޭ މީހުންނަށް ގޯތި ދިނުމާ %57 މީހުން ދެކޮޅެވެ. ނުވަތަ އެއީ އިންސާފުވެރި ކަމެއް ނޫން ކަމަށް ގަބޫލުކުރެ އެވެ.
ހުޅުމާލޭ ދެވަނަ ފޭހުން އެންމެ ފަހުން ބީލަމުގައި ބިން ވިއްކާފައި ހުރީ އަކަފޫޓެއް 6،700ރ.އަށް ވުރެ ބޮޑުކޮށެވެ. އޭގެ މާނައަކީ 'ބިންވެރިޔާ' ސްކީމްގެ ދަށުން ހުޅުމާލެއިން އެންމެ ކުޑަކޮށް ދޭ 1،250 އަކަފޫޓުގެ ގޯއްޗަކަށް 8.3 މިލިއަން ރުފިޔާ ޖެހުމެވެ. ހަމައެކަނި އެ ނިސްބަތުން 1،351 ގޯއްޗަށް ހިސާބު ހަދާލިޔަސް، ސަރުކާރުން ހިލޭ މި ދޫކޮށްލަނީ 11 ބިލިއަން ރުފިޔާގެ އަގު ހުރި ބިމެވެ.
ކޮމެންޓް (2)
އާއިޝަތު
ދީބު