ގޯތި ދޫކުރަން ހުޅުމާލޭ ދެވަނަ ފިޔަވަހީގެ ފަޅު ހިއްކަން، އުޅަނދުތައް 10 ދުވަހުގެ ތެރޭ ނަގަން އަންގައިފި

ހުޅުމާލެއިން ގޯތި ދޫކުރުމަށް ހިއްކަން ނިންމާފައިވާ ދެ ވަނަ ފިޔަވަހީގެ ފަޅު، ހިއްކަން ފެށުމަށް އެ ފަޅުގައި އަޅާފައިވާ އުޅަނދުތަައް 10 ދުވަހުގެ ތެރޭގައި ނެގުމަށް މިއަދު އާބަންކޯއިން އަންގައިފި އެވެ. 

ވީ ކިހިނެއް؟ - މި ސަރުކާރުން މާލޭ ރައްޔިތުންނަށް ގޯތި ދިނުމަށްވީ ވައުދު ފުއްދަން ޝަރުތު ހަމަވާ ލިސްޓެއް މިދިޔަ މަހު ފަހުކޮޅު ވަނީ ނެރެފަ އެވެ. އަދި އެ ލިސްޓަށް، ހުޅުމާލެ، ގުޅީފަޅު، ގިރަވާރު ފަޅުން އަންނަނީ ގޯތިތައް ލިބޭ ފަރާތްތައް ގުރުން ނިންމަމުންނެވެ. ސަރުކާރުން ބުނަނީ ރައީސް އިބްރާހީމް މުހަންމަދު ސޯލިހުގެ ސަރުކާރުގެ ފަސް އަހަރުގެ ދައުރު އަންނަ ނޮވެމްބަރު މަހު 17ގައި ނިމުމުގެ ކުރިން އެ ފަރާތްތަކަށް ލިބުނު ގޯތިތަކުގެ ރަޖިސްޓްރީ ހަވާލުކުރާނެ ކަމަށެވެ. ހިލޭ ގޯތި ދެނީ:

ހުޅުމާލޭ ދެވަނަ ފިޔަވަހީންދޭ ގޯތިތައް އިތުރުކުރަން ސަރުކާރުން ނިންމާފައި ވަނީ ހުޅުމާލެ ފަރުކޮޅުފުށި ސަރަހައްދުގައި އޮތް ފަޅު ހިއްކައިގެންނެވެ. މިހާރު އެ ފަޅު ބޭނުން ކުރަނީ ސަފާރީތަކާއި އެހެން އުޅަނދުފަހަރު ބަނދަރު ކުރުމަށެވެ.

ތަފްސީލް - މިއަދު އާބަންކޯއިން ނެރެފައިވާ ބަޔާނެއްގައި ބުނެފައިވަނީ ހުޅުމާލޭ ދެވަނަ ފިޔަވަހީގެ ފަޅުތެރޭގައި އަޅާފައިވާ އުޅުނދުތަކާއި އަޑިއަށް ގޮސްފައިވާ އުޅަނދުފަހަރުތައް އެ ސަރަހައްދުން ނެގުމަށް އަންގާ ކަމަށެވެ.

"ވީމާ، މި އުޅަނދުތަކުގެ ވެރިފަރާތެއްވާ ނަމަ މި ކުންފުނީގެ ހޮޓްލައިން 1516 އަށް ގުޅުއްވައި މައުލޫމާތު ސާފުކުރުމަށް ފަހު، މިއަދުން ފެށިގެން 10 ދުވަހުގެ ތެރޭގައި އެ އުޅަނދެއްގެ ވެރިފަރާތުން އެ އުޅަނދެއް ނެންގެވުމަށް ދަންނަވަމެވެ،" އާބަންކޯގެ ބަޔާނުގައިވެ އެވެ.

އެމުއްދަތުގައި ނުނަގާ އުޅަނދުތަކާ މެދު "ކ. ތިލަފުއްޓާއި ކ. ގުޅީފަޅުގެ ފަޅުތެރެއަށް ދޫކޮށްލާފައިވާ އުޅަނދުފަހަރާއި ތަކެއްޗާ މެދު އަމަލުކުރުމުގެ އުސޫލު"ގެ ދަށުން އަމަލުކުރާނެ ކަމަށް އެ ކޯޕަރޭޝަނުން ބުންޏެވެ.

އެނގުން މުހިންމު - ހުޅުމާލޭ ދެވަނަ ފިޔަވަހި ޕްލޭންކޮށްފައި ފުރަތަމަ އޮތީ ބައިނަލްއަގުވާމީ ފެންވަރުގެ ކްރޫޒް ޓާމިނަލެއް ހަދާ ގޮތަށެވެ. އެ ތަން ހަދަނީ ހުޅުމާލޭ ދެ ވަނަ ފިޔަވަހީގެ ހުޅަނގު ފަރާތު ފަޅުގެ ކަނޑު ތޮށި ހިމަނައިގެންނެވެ. ޓާމިނަލް އަޅާނެ ބަޔަކު ހޯދަން އިއުލާންކުރުމުން އޭގެ ތަޖުރިބާ ހުރި ބޮޑެތި ކުންފުނިތަކުން ޝައުގުވެރިކަން ފާޅުކުރިކަމަށް، އާބަންކޯއިން ކުރިން އޮތީ ބުނެފަ އެވެ.

ނަމަވެސް، ރިޔާސީ އިންތިހާބާ ދިމާކޮށް މުޅި މާސްޓަ ޕްލޭން ބަދަލުކޮށް، ދެވަނަ ފިޔަވަހީގެ ފަޅު ހިއްކައި އެތަނުން ގޯތި ދޭން މިހާރު ސަރުކާރުން ވަނީ ނިންމާފަ އެވެ.