ފައިބާ ކޭބަލް އެޅުމަކީ ޓެކްނޮލޮޖީގެ ހަބަކަށް ރާއްޖެ ހެދުމުގެ ބިންގާ: ރައީސް

ބައިނަލްއަގުވާމީ ފައިބާ ކޭބަލް އެޅުމަކީ ޓެކްނޮލޮޖީގެ ހަބަކަށް ރާއްޖެ ހެދުމުގެ ބިންގާ ކަމަށާއި މިއީ ރާއްޖޭގެ އިގްތިސާދު ދެ ގުނަ ކުރަން ލިބުނު ވަރަށް ބޮޑު ކުރިއެރުމެއް ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

ވީ ކިހިނެއް؟ - އިންޑިއާގެ ބިލިއަނަރު މުކޭޝް އަންބާނީގެ ރިލަޔަންސް ޖިއޯއާ ހަވާލުކޮށްގެން ދިވެހި ސަރުކާރުން އަޅާ އިންޓަނެޓް ސަބްމެރިން ކޭބަލް މިއަދު ރާއްޖެ ގެނެސް، ކޭބަލް އަޅާ ނިންމާލުން ވަނީ ފާހަގަކޮށްފަ އެވެ.

ރާއްޖެއާ ގުޅާލާފައި ވަނީ ޖިއޯ އިން ގާއިމްކުރަމުން އަންނަ ޖުމްލަ ދެ ކޭބަލް ހިމެނޭ ދުނިޔޭގެ އެންމެ ބޮޑު ސަބްމެރިން ކޭބަލް ނެޓްވޯކުގެ ތެރެއިން އޭޝިއާ ސަރަހައްދުގައި އަޅާ އިންޑިއާ-އޭޝިއާ އެކްސްޕްރެސް ކޭބަލްގެ ކޮޅެކެވެ.

ބުނީ ކީކޭ؟ - "އަޅުގަނޑުމެންގެ ރާއްޖެ، ބައިނައަލްއަގުވާމީ ފައިބާ ކޭބަލްއަކާ ގުޅާލުމަކީ، ރާއްޖޭގައި ބައިނަލްއަގުވާމީ ޓެކްނޮލޮޖީ ހަބެއް އުފެއްދުމުގެ ވެސް ބިންގާ. އަޅުގަނޑުމެން މިއަދު މިއުޅެނީ، ބައިނަލްއަގުވާމީ ވިޔަފާރި އާއި ޓެކްނޮލޮޖީގެ ދާއިރާއިން ދުނިޔޭގެ އިރުމައްޗާއި ހުޅަނގާ ދެމެދު ގުޅާލެވޭ ފާލަމަކަށް ރާއްޖެ ހެދުމުގެ ފުރަތަމަ ފިޔަވަޅުގައި،" ހުޅުމާލޭ ދެވަނަ ފިޔަވަހީގައި ބޭއްވި ރަސްމިއްޔާތުގައި ކޭބަލް ފައިބާ ގުޅާލުމުގެ މަޝްރޫއު އިފްތިތާހު ކުރެއްވުމަށް ފަހު ރައީސް ވިދާޅުވި އެވެ.

ތަފްސީލު - ރައީސްގެ ވާހަކަ ފައްޓަވަމުން ވިދާޅުވީ، މިއަދު މި ފާހަގަ ކުރަނީ "ޑިޖިޓަލް ދިވެހި ޖީލުގެ ފެށުން" ކަމަށެވެ. ބައިނަލްއަގުވާމީ ސަބްމެރިން ކޭބަލްއަކުން ރާއްޖެ ގުޅުވާލުމަކީ ދިވެހި ތާރީހުގައި ވެސް އަލަށް ކުރާ ކަމެއް ކަން ފާހަގަކުރައްވައި ރައީސް ވިދާޅުވީ، މިކަން ކޮށް ނިންމާފައި އޮންނަން ޖެހޭތާ އެތައް ޒަމާނެއް ވެއްޖެ ކަމަށެވެ. 

"މި ސަބްމެރިން ކޭބަލްއާ އެކު ދިވެހި ރައްޔިތުން ގޮވައިގެން، ވަކިން ހާއްސަކޮށް، ދިވެހި ޒުވާނުން ގޮވައިގެން އަޅުގަނޑުމެން މި ދަތުރު ކުރަނީ މުޅިން އާ ދުނިޔެއަކަށް،" ރައީސް ވިދާޅުވި އެވެ.

އާ ދުނިޔެއަކަށް ދަތުރު ފެށި ކަމަށް ވިދާޅުވި ސަބަބުތައް ވެސް ރައިސް ދެއްކެވި އެވެ. އެގޮތުން ވިދާޅުވީ:

"ޑިޖިޓަލް މުއާސަލާތުގެ ސަބަބުން އެންމެ ދުރު ކަރަތައް ވެސް އެއް އިނގިލިހާ ކައިރިކޮށްފި. ނަމަވެސް އަޅުގަނޑުމެންނަށް އަދި މުޅިން މި އުޅެވެނީ، އެ ދުނިޔެއަށް ނުވަދެވިގެން،" ރައީސް ވިދާޅުވި އެވެ.

"ހަގީގަތުގައި މިއީ، މީގެ އެތައް އަހަރެއް ކުރިން ދިވެހިންނަށް އަލިވިލެންވީ ދުވަހެއް."

ރައީސް ފާހަކުރެއްވި ގޮތުގައި ރާއްޖޭގައި މުއާސަލާތީ ހިދުމަތްތައް ތައާރަފް ކުރިތާ 80 ވަރަކަށް އަހަރު އަދި އިންޓަނެޓްގެ ހިދުމަތް ދޭން ފެށިތާ 27 އަހަރު ފުރުނު އިރު، މިދިޔަ 80 އަހަރު ތެރޭ ދުނިޔޭގައި ކުރިއަރައިދިޔަ އެއް ދާއިރާއަކީ ޓެކްނޮލޮޖީ އާއި މުއާސަލާތެވެ.

"ޒަމާނީ ޓެކްނޮލޮޖީ ތެރެއިން އިންސާނުން އީޖާދު ކުރި އާޓިފިޝަލް އިންޓެލިޖެންސް، އިންސާނުން ފަހާ ދުވަމުންދާއިރު، ދިވެހިން އަދިވެސް ދުވަން ޖެހިފައި މި އޮތީ އިންޓަނެޓް ސްޕީޑާއި މޯބައިލް ރޭންޖްގެ ފަހަތުން،" އެއީ ދިވެހންނަށް ހައްގު މިންވަރު ނޫންކަން ފާހަގަކުރައްވައި ރައީސް ވިދާޅުވި އެވެ.

"ޑިޖިޓަލް ދުނިޔޭގެ ދުވެލީގައި ދިވެހިން ކުރިއަރާ ގޮސް، ހައްގު މިންވަރު ލިބެން އޮތީ، ބައިނަލްއަގުވާމީ ސަބްމެރިން ކޭބަލް ނިޒާމުގެ ތެރެއަށް މި ޖަޒީރާތައް ވަދެ، ލާމެހިގެން."

މި މަޝްރޫއުގެ މަގްސަދަކީ އެއީކަން ފާހަގަކުރައްވައި ރައީސް ވިދާޅުވީ، މިއީ ރާއްޖޭގައި އިންޓެނެޓްގެ ހިދުމަތް ދޭ ކުންފުނިތަކަށް ވެސް އޮތް ވަރަށް ރަނގަޅު ފުރުސަތެއް ކަމަށެވެ. ރައީސް ވިދާޅުވިގޮތުގައި:

"އަޅުގަނޑުމެން އަމާޒު ހިފާފައި މި ވަނީ، ރާއްޖޭގެ އިގްތިސާދު ދެގުނަ ކުރަން. މި ޒަމާނުގެ އިގްތިސާދީ ނާރެހަކީ، އިންފޮމޭޝަން ކޮމިއުނިކޭޝަން ޓެކްނޮލޮޖީ. މި ޓެކްނޮލޮޖީގެ ތެރެއަށް ގައުމެއް ވަދެ، ލާމެހިގެންދާ ވަރަކަށް އެ ގައުމެއްގެ ޖީޑީޕީ ވެސް މައްޗަށް އެބަދޭ،" ކުރިއަރާފައިވާ ގައުމުތަކުން އެ ހަގީގަތް ފެނިގެންދާކަން ފާހަކުރައްވައި ރައީސް ވިދާޅުވި އެވެ.