ނޫސްވެރިޔާ އަހުމަދު ރިލްވާން
ރިލްވާން ގެއްލުވާލި ފަހުން 9 އަހަރު؛ އަދިވެސް އިންސާފު ނުލިބޭ
މިނިވަން ނޫހުގެ ނޫސްވެރިޔާ އަހުމަދު އަބްދުﷲ ރިލްވާން ވަގަށް ނަގައި ގެއްލުވާލި ހާދިސާއަށް މިއަދު ނުވަ އަހަރު ފުރޭ އިރު، އަދިވެސް އޭނާއަށް އިންސާފު ލިބިފައިނުވާތީ އެކި ފަރާތްތަކުން ކަންބޮޑުވުން ފާޅުކޮށްފި އެވެ.
އެންގުން މުހިއްމު - ރާއްޖޭގައި ފެތުރެމުންދިޔަ ދީނީ ހަރުކަށި ފިކުރާ ދެކޮޅަށް ފާޅުގައި އަޑުއުފުލަމުން ދިޔަ ރިލްވާނަށް އެކި ފަހަރު މަތިން އިންޒާރު ދިނުމަށް ފަހު، ބަޔަކު އޭނާއަށް ހަމަލާދީ، ރަހީނުކޮށް، ގެއްލުވާލާފައިވަނީ 8 އޮގަސްޓް 2014ގަ އެވެ.
ފާހަގަކޮށްލެވޭ ކަމެއް - ރިލްވާނާއި އަނިޔާވެރި ގޮތަކަށް މަރާލާފައިވަ ބްލޮގަރު ޔާމީން ރަޝީދަށް އިންސާފު ހޯދައިދިނުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ. ގޮތް ނޭނގޭ މަރުތައް ތަހުގީގުކުރުމަށް ވެރިކަމުގެ ފުރަތަމަ ދުވަހު ރައީސް ސޯލިހް އުފެއްދެވި ރިޔާސީ ކޮމިޝަނުން ތަހުގީގުކޮށް، ދައުވާ ކުރަން ފޮނުވައި ކޯޓަށް މައްސަލަ ހުށަހެޅި ފުރަތަމަ މައްސަލަ އަކީ ވެސް ޔާމީނާއި ރިލްވާންގެ މަރުގެ މައްސަލަ އެވެ.
ނަމަވެސް، ދައުރު ހަމަވާން ދާއިރު މިހާތަނަށް އެ ދެ މައްސަލައިގައި ވެސް އިންސާފު ގާއިމްކުރެވިފައެއް ނުވެ އެވެ.
ވީ ކިހިނެއް؟ - އެކަމާ ގުޅިގެން އެސޯސިއޭޝަން ފޯ ޑިމޮކްރަސީ އިން ދަ މޯލްޑިވްސް (އޭޑީއެމް) އިން މިއަދު ނެރުނު ބަޔާނެއްގައިވާ ގޮތުން:
-
ރިލްވާން ވަގަށް ނެގުމަށް ފަހު މިއަދާ ހަމައަށް ވެސް އޭނާއަށް ވީ ގޮތެއް ކަށަވަރުކުރެވިފައެއް ނުވޭ
-
އެ ކަމުގައި ހަރަކާތްތެރިވި މީހުން އިންސާފުގެ ކުރިމައްޗަށް ގެެނެވިފައެއް ނުވޭ
-
ރިލްވާން ވަގަށް ނަގައި ގަދަކަމުން ގެއްލުވާލަން ރާވައި އެކަން ހިންގުމުގެ ފަހަތުގައި ތިބި ބަޔަކު ހޯދިފައެއް ނުވޭ
-
އެ މައްސަލައިގެ ތަހުގީގަށް ބުރޫއަރާ ފަދަ އެކި އަމަލުތަކުގައި އެކި ގޮތް ގޮތުން ބައިވެރިވެފައިވާ ދައުލަތުގެ މުއައްސަސާތަކުގައި ވަޒީފާ އަދާކުރި މީހުންނާ މެދު އެއްވެސް ފިޔަވަޅެއް އަޅާފައެއް ވެސް ނުވޭ
ރިލްވާނަށް އިންސާފު ހޯދައިދިނުމަކީ ރައީސް ސޯލިހު 2018ގައި ވެވަޑައިގެންނެވި އެންމެ މުހިންމު އެއް ވައުދުކަން ފާހަގަކޮށް، "ވެރިކަމާ ހަވާލުވެވަޑައިގެންނެވި އިރާއި ފަސް އަހަރުގެ ދައުރެއް ފުރިހަމަކުރެއްވި އިރާ ތަފާތެއް ނެތުމަކީ" އިންތިހާއަށް ކަންބޮޑުވެ، ނުރުހުން ފާޅުކުރާ ކަމެއް ކަމުގައި އޭޑީއެމް އިން ބުންޏެވެ.
"ރިޔާސީ އިންތިހާބު ގާތް ވެފައިވާ މި ދަނޑިވަޅުގައި، ދެން އަންނަ ސަރުކާރަކުން މިހާރަށް ވުރެ ރަނގަޅަށް މި މައްސަލައިގެ ތަހުގީގު އަދި މަރުވެފައިވާ މީހުންނާއި ގެއްލުވާލާފައިވާ މީހުންގެ މައްސަލަތަކުގެ ތަހުގީގުތައް ކުރިއަށް ގެންދާނެ ކަމުގެ ޔަގީންކަން އާއިލާތަކަށް ދިނުމަކީ އެންމެހާ ސިޔާސީ ޕާޓީތަކުގެ ފަރާތުން އަޅުގަނޑުމެން އެދޭ ކަމެއް،" އެ ޖަމިއްޔާގެ ބަޔާނުގައިވެ އެވެ.
އޭޑީއެމްގެ އިތުރުން ވެސް، ރިލްވާންގެ ރަހުމަތްތެރިންނާއި ގާތްތިމާގެ މީހުންނާއި އާންމުން ވެސް އަންނަނީ މިއަދު ސޯޝަލް މީޑިއާގައި އެފަދަ ހިޔާލުތައް ފާޅުކުރަމުންނެވެ.
ފަސްމަންޒަރު - މަރު ކޮމިޝަނުން ތަހުގީގު ކުރަމުން އަންނަ، ރިލްވާން ގެއްލުވާލުމާއި ޔާމީން މަރާލުމުގެ މައްސަލައިގައި މިދިޔަ އަހަރުގެ 26 ޖޫންގައި ހައްޔަރުކޮށް، ޖެހިގެން އައި 1 ސެޕްޓެމްބަރުގައި ދައުވާ އުފުލި އެ ތިން މީހުންނަކީ:
-
އަހުމަދު އިސްމާއިލް (އަހަނދު)، މއ. ފާގަފިލާގެ، 39 - ޓެރަރިޒަމްގެ އަމަލެއް ކުރުމަށް އެހީތެރިވުން އަދި ޓެރަރިޒަމްގެ އަމަލެއް ކުރުމަށް ރޭވުން
-
އިސްމާއިލް އަބްދުލްރަހީމް އާދަމް (އިސޫ)، މ. ލެގޫންވިއު، 30 - ޓެރަރިޒަމްގެ އަމަލެއް ކުރުމަށް އެހީތެރިވުމުގެ ދެ ދައުވާ
-
އަހްމަދު މުއާޒު (ގަޓު މުއާ)، މާލޭ ދަފްތަރު އާރުއެސް 8499، 40 - ޓެރަރިޒަމްގެ އަމަލެއް ކުރުމަށް ރޭވުން
މި މައްސަލައިގައި ދައުވާ ލިބޭ އަހުމަދު އިސްމާއިލް (އަހަނދު) އާއި އިސްމާއިލް އަބްދުލްރަހީމް އާދަމް (އިސޫ) ވެސް ވަނީ ޝަރުތުތަކަކާ އެކު ފައިގައި ޓެގު އެޅުވުމަށް ފަހު މި ފަހުން ދޫކޮށްލާފަ އެވެ. އެހެންވެ، މި މައްސަލާގައި ބަންދުގައި މިހާރު ހުރީ އަހްމަދު މުއާޒު (ގަޓު މުއާ) އެކަންޏެވެ.
ރިލްވާންގެ މަރުގެ މައްސަލަ:
-
2014 ވަނަ އަހަރު ގެއްލުވާލި ނޫސްވެރިޔާ ރިލްވާން މަރާލި މައްސަލައިގައި ދެ މީހެއްގެ މައްޗަށް ޓެރަރިޒަމްގެ ދައުވާ ކުރިން އުފުލި
-
އެ ދެ މީހުންގެ މައްޗަށް ވެސް ކުށް ސާބިތުނުވާ ކަމަށް 2018ގައި ވަނީ ހުކުމްކުރި؛ އެ ހުކުމް އިސްތިއުނާފެއް ނުކުރޭ
-
މީގެ ކުރިން މަރު ކޮމިޝަން ބުނެފައިވަނީ، ރިލްވާން ކިޑްނެޕްކުރުމަށް ފަހު ރާއްޖޭގެ އަލް-ގައިދާ ގޮފިން އޭނާ މަރާލާފައިވާ ކަމަށް
އިތުރަަށް ކިޔާލަން -