ޑިމޮކްރެޓްސްގެ 'ފަސޭހަ ވިޔަފާރި' ސިޔާސަތު: ލުއި ލޯނު ދީ، ޕޭޕާލް ގެނައުން

ކުދި އަދި މެދު ފަންތީގެ ވިޔަފާރިތަކުން (އެސްއެމްއީ) ލޯނު ހޯދަން އަތުން ފައިސާ ލާން ނުޖެހި އަދި ރަހުނެއް ވެސް ބަހައްޓަން ނުޖެހޭ ގޮތަށް ހެދުމާ އެކު، ޕޭޕާލް އާއި ސްޓްރައިޕް ފަދަ މަޝްހޫރު ބައިނަލްއަގުވާމީ ޕޭމަންޓް ގޭޓްވޭތަކުގެ ހިދުމަތް ރާއްޖެއަށް ތައާރަފުކުރުން ހިމެނޭ ގޮތަށް، ޑިމޮކްރެޓްސްގެ 'ފަސޭހަ ވިޔަފާރި' ސިޔާސަތު ރޭ އިފްތިތާހުކޮށްފި އެވެ.

ވީ ކިހިނެއް؟ - އަމިއްލަ މަސައްކަތުން އާމްދަނީ ހޯދައި ދިރިއުޅުން ބިނާ ކުރުމުގެ މަގުފަހިކޮށްދޭން ކަމަށް ބުނެ ޑިމޮކްރެޓްސްގެ ފަރާތުން ހުށަހަޅާފައިވާ ހައްލުތަކާ އެކު، އެ ސިޔާސަތު ލޯންޗުކުރުމަށް އެ ޕާޓީން ވަނީ ރޭ 8:30ގައި ރާއްޖޭގެ އެކި ކަންކޮޅުތަކުގައި ހަރަކާތްތަކެއް ކުރިއަށް ގެންގޮސްފަ އެވެ. އޭގެ ތެރެއިން މައި ހަރަކާތް އޮތީ، އެ ޕާޓީގެ ބާނީ އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ބައިވެރިވެވަޑައިގެން ބ. ތުޅާދޫގަ އެވެ.

ތަފްސީލް - އެ ސިޔާސަތު އެކުލަވާލާފައިވަނީ މިހާރު ހުރި މައިގަނޑު މައްސަލަތަކަށް ހައްލެއް ގެނެވޭނެ ގޮތަށް ކަމަށް ޑިމޮކްރެޓްސް އިން ބުނެފައިވެ އެވެ. އެގޮތުން، މިހާރު ރާއްޖޭގައި ވިޔަފާރިތަކަށް ހުރި އެންމެ ބޮޑެތި ގޮންޖެހުންތަކުގެ ގޮތުގައި ފާހަގަކޮށްފައިވަނީ:

އެ މައްސަލަތަކަށް ޑިމޮކްރެޓްސްގެ ސިޔާސަތުގެ ދަށުން ހުށަހަޅާފައިވާ ހައްލުތަކަކީ:

ބުނީ ކީކޭ؟ - 'ފަސޭހަ ވިޔަފާރި' ސިޔާސަތު އިފްތިތާހު ކުރަން ރޭ ބ. ތުޅާދޫގައި ބޭއްވި ޖަލްސާގައި ނަޝީދު ވަނީ، މިވަގުތު ރާއްޖޭގެ ވިޔަފާރީގެ ދާއިރާގައި ހުރި މައްސަލަތައް ފާހަގަކުރައްވައި އެ މައްސަލަތައް ހައްލު ކުރެވޭނެ ގޮތްތަކާ މެދު ވާހަކަދައްކަވާފަ އެވެ.

އެގޮތުން، މިދިޔަ 15 ވަރަކަށް އަހަރުގެ ތެރޭގައި ގިނަ ބަދަލުތަކެއް އައިސް، ދައުލަތުގެ އާމްދަނީ އެތައް ގުނައެއް އިތުރުވެފައިވީ ނަމަވެސް، އާންމު ރައްޔިތުންގެ އާމްދަނީއަށް ކުރިއެރުމެއް އައިސްފައި ނުވުމަކީ ބޮޑު މައްސަލައެއްކަން ނަޝީދު ފާހަގަކުރެއްވި އެވެ.

"ރައްޔިތުންގެ އާންމު ހާލަތު ރަނގަޅުކުރުމަށް، ރައްޔިތުންގެ އާމްދަނީ އިތުރުކުރުމަށް އެބަ އިތުރު މަސައްކަތްތަކެއް ކުރަން ޖެހޭ. ނޫން ނަމަ، ބިނާކުރާ އުމްރާނީ ވަސީލަތް، އޭގެ ފުރިހަމަ ބޭނުން ނުހިފި މި ދަނީ،" އެ މަނިކުފާނު ވިދާޅުވި އެވެ.

މިސާލެއްގެ ގޮތުގައި ނަޝީދު ވިދާޅުވީ، ބަނދަރެއްގެ ބޭނުމަކީ ބާޒާރެއް އުފެދި، މުދަލާ ހިދުމަތް ބަދަލުކޮށް، އެއް ރަށުން އަނެއް ރަށަށް ތަކެތި ގެންގޮސް ގެނެސް، މަހަށް ފުރި، އެހެން ވެސް ބޭނުންތަކަށް ލަފާފުރުން ފަސޭހަކުރުން ކަމަށެވެ. އެހެންކަމުން، ބަނދަރެއް އެޅުމަށް ހަރަދުވާ ފައިސާ އަނބުރާ ރައްޔިތުންނަށް ހޯދަދޭން އެ ބަނދަރުގެ ސަބަބުން މަގުފަހިވަނީ ކޮން ގޮތަކަށްތޯ، އެންމެ ރަނގަޅަށް އެ ބަނދަރުގެ ބޭނުން ހިފޭނީ ކޮންގޮތަކަށްތޯ ބަލަން ޖެހޭ ކަމަށެވެ.

"މި ރަށްތަކުގައި މީހުން ދިރިއުޅެ، މި ރަށްތައް ތަރައްގީކުރަން ވެއްޖެ ނަމަ، އެއީ ހަމައެކަނި ރިސޯޓެއްގައި މަސައްކަތްކުރާ ކުއްޖަކު ރަށަށް ފޮނުވާ ފައިސާއިން ނުވަތަ މާލޭގައި މަސައްކަތްކުރާ މީހަކު ރަށަށް ފޮނުވާ ފައިސާއިން، މި ރާއްޖޭގެ ރަށްތަކެއް ނުދިރޭނެ. އެކަން ކުރުމަށް މި ތަނުގައި [ރަށްރަށުގައި] އުފެއްދުންތެރިކަން އިތުރުވާން ޖެހޭ،" ނަޝީދު ވިދާޅުވި އެވެ.

އެ މައްސަލަތަކަށް ހައްލެއް ހޯދައިދިނުމަށްޓަކައި ޑިމޮކްރެޓުން މަސައްކަތް ކުރާނީ ރައްޔިތުންގެ ލާބަ އާއި މަންފާއަށް އިސްކަންދީގެން، ވެރިކަން ހޯދުމުގެ ނިޔަތުގައި ތަރައްގީގެ މަޝްރޫއުތައް ހިންގާ އުސޫލުން ނޫން ކަމުގެ ޔަގީންކަން ނަޝީދު ދެއްވި އެވެ.