ރިލްވާނާއި ޔާމީނުގެ މަރުގެ މައްސަލައިގައި ހައްޔަރުގައި ހުރި އަހުމަދު އިސްމާއިލް (އަހަނދު)
ކުށްވެރިންގެ ފައިގައި ޓެގް އަޅުވަން ފަށައި ފުރަތަމަ ޓެގް އަހުމަދު އިސްމާއިލް ފައިގައި
ބޮޑެތި ކުށްތަކަށް ތުހުމަތުކުރެވޭ މީހުންގެ ހަރަކާތްތައް ބެލުމަށް ފައިގައި ޓެގް އަޅުވަން އަލުން ފަށައިފި އެވެ. ފުރަތަމަ ޓެގް މިއަދު އެޅުވީ ނޫސްވެރިޔާ އަހްމަދު ރިލްވާން އާއި ބްލޮގަރު ޔާމީން ރަޝީދުގެ މަރާ ގުޅިގެން ހައްޔަރުކޮށް ދައުވާ އުފުލައި ޝަރީއަތް ނިމެންދެން ބަންދުކޮށްފައި ހުއްޓާ މިދިޔަ ބުދަ ދުވަހު ކޯޓުން ދޫކޮށްލި އަހުމަދު އިސްމާއިލް (އަހަނދު)ގެ ފައިގަ އެވެ.
ވީ ކިހިނެއް؟ - މިނިވަން ނޫހުގެ ނޫސްވެރިޔާ ރިލްވާން ގެއްލުވާލުމާއި ބްލޮގަރު ޔާމީން މަރާލުމުގެ މައްސަލައިގައި މިދިޔަ އަހަރުގެ ޖޫން 26ގައި ހައްޔަރުކޮށް، ސެޕްޓެމްބަރު 1ގައި ތިން މީހެއްގެ މައްޗަށް ދައުވާ އުފުލި އެވެ. އެ ތިން މީހުންނާއި އެ މީހުންގެ މައްޗަށް ކުރި ދައުވާތަކަކީ:
-
1-
އަހުމަދު އިސްމާއިލް (އަހަނދު)، މއ. ފާގަފިލާގެ، 39 - ޓެރަރިޒަމްގެ އަމަލެއް ކުރުމަށް އެހީތެރިވުން އަދި ޓެރަރިޒަމްގެ އަމަލެއް ކުރުމަށް ރޭވުން
-
2-
އިސްމާއިލް އަބްދުލްރަހީމް އާދަމް (އިސޫ)، މ. ލެގޫންވިއު، 30 - ޓެރަރިޒަމްގެ އަމަލެއް ކުރުމަށް އެހީތެރިވުމުގެ ދެ ދައުވާ
-
3-
އަހްމަދު މުއާޒު (ގަޓު މުއާ)، މާލޭ ދަފްތަރު އާރުއެސް 8499، 40 - ޓެރަރިޒަމްގެ އަމަލެއް ކުރުމަށް ރޭވުން
ތަފްސީލް - މި މީހުންގެ ތެރެއިން އަހްމަދު އިސްމާއިލް ޝަރުތުތަކަކާ އެކު ކޯޓުން ދޫކޮށްލާފައި ވަނިކޮށް، ހޯމް މިނިސްޓަރު އިމްރާން އަބްދުﷲ މިރޭ ވިދާޅުވީ ކުށްވެރީންގެ ފައިގައި އަަލުން ޓެގު އަޅުވަން ފަށާފައިވާ ކަމަށެވެ.
'ދައުރު' އަށް އެނގިފައިވާ ގޮތުގައި:
-
ޓެގް އެޅުވި ފުރަތަމަ މީހާއަކީ އަހްމަދު އިސްމާއިލް
-
ޓެގު އަޅުވަން އަލުން ފެށި ފަހުން މިހާތަނަށް ޓެގު އެޅުވީ އޭނާގެ ފައިގައި އެކަނި
'އަމާޒަކީ ޖަލުގައި މީހުން ބަންދުކުރާ މިންވަރު މަދުކުރުން'
ޓެގު އަޅުވަން ފެށިކަން ހާމަކުރައްވައި އިމްރާން ކުރެއްވި ޓުވީޓެއްގައި ވިދާޅުވީ ޖިނާއީ އަދުލުގެ ބޭނުމަށްޓަކައި މީހުން މޮނިޓަކޮށް ކޮންޓްރޯލްކުރުމުގެ ގާބިލުކަން ފުލުހުންގެ ކިބައިގައި ގާއިމުކޮށް، ކޯޓު އަމުރެއްގެ ދަށުން އެންކަލް ބްރެސްލެޓް ބޭނުންކުރަން މިއަދު ފެށިއިރު، ކުރިން ދިމާވި އިދާރީ އަދި ތަންފީޒީ ދަތިތައް މިފަހަރު ދިމާނުވާނެ ކަމަށެވެ.
އެނގުން މުހިންމު - މޮނިޓަކޮށް ކޮންޓްރޯލް ކުރުމުގެ (މޮނިކޮން) ނިޒާމަކީ ބޮޑެތި ކުށްތަކަށް ތުހުމަތުކުރެވޭ މީހުންގެ ހަރަކާތްތައް ހުންނަ ގޮތް، ވަކި ކަހަލަ އާލާތެއް (ޓެގް) ބޭނުންކޮށްގެން، ބަލައި ދެނެގަތުމުގެ ނިޒާމެކެވެ.
އެއީ އެފަދަ މީހުން ތަހުގީގަށް ހައްޔަރުކުރެވޭ ވަރަށް ހެކި ނެތުމުން ނުވަތަ ޝަރީއަތް ނިމެންދެން ހައްޔަރުކޮށްފައި ބައިތިއްބަން ނުފެންނަ ކަމަށް ކޯޓުން ކަނޑައަޅާ މީހުންގެ ހަރަކާތްތައް ހުންނަ ގޮތް ދެނެގަތުމަށް ކުރާ ކަމެކެވެ.
ޒަމާނީ ވަސީލަތްތަކާ އެކު މި ނިޒާމު ބޭނުންކުރަނީ މައިގަނޑުގޮތެއްގައި ޓެރަރިޒަމް މަނާކުރުމުގެ ގާނޫނުގެ ދަށުން ކަމަށް ވިޔަސް، ސަރުކާރުގެ އަމާޒަކީ އަދުލުގެ ނިޒާމުގައި 'މޮނިކޮން' ބޭނުންކުރެވޭނެ އިތުރު އިޖުރާއާތްތައް ތައާރަފުކޮށް، ޖަލުގައި މީހުން ބަންދުކުރެވޭ މިންވަރު މަދުކުރުން ކަމަށް އިމްރާން ވިދާޅުވި އެވެ.
މޮނިކޮން އަމުރު ނެރެފައި ނެތަސް ޓެގު އެޅުވޭނެ ގޮތަކަށް ގާނޫނީ އޮނިގަނޑު އިސްލާހުކުރަން އެޓާނީ ޖެނެރަލް (އޭޖީ) އޮފީހާ އެކު މަޝްވަރާ ކުރަމުން އަންނަ ކަމަށް މީގެ ކުރިން އިމްރާން ވިދާޅުވެފައިވެ އެވެ. އަދި އެ އޮނިގަނޑު އިސްލާހުކޮށް މި އަހަރު ތެރޭ އަލުން ޓެގު އަޅުވަން ފެށޭނެ ކަމަށް މިދިޔަ އަަހަރު ތެރޭ އޭނާ ވިދާޅުވި އެވެ. އިމްރާން ވިދާޅުވެފައިވަނީ އެގޮތަށް ޓެގު އަޅުވަން ފެށުމުން، ބޮޑެތި ކުށްތަކަށް އަރައިގަންނަ މީހުން ޖެހިލުންވާ ފަދަ އަދި އެކަމުން މުޖުތަމައުއަށް ވެސް އެނގުންވާ ފަދަ ބަދަލެެެއް އަންނާނެ ކަމަށެވެ.
ގާނޫނު އޮތް ގޮތުން، މީހެއްގެ ގައިގައި ޓެގެއް އެޅުވޭނީ ހޯމް މިނިސްޓަރުގެ އެދުމަކަށް ހައި ކޯޓުން ނެރޭ އަމުރަކަށެވެ.
މޮނިކޮން އަމުރު ރައްދުވާ މީހުން:
-
ވަކި ވަގުތުތަކެއްގައި ގެއިން ބޭރަށް ނުވަތަ ވަކި ސަރަހައްދުތަކަކަށް ދިއުން މަނާ މީހުން
-
ފުލުހުން އަންގައިފި ނަމަ، އަމުރު ރައްދުވާ މީހާ ދިރިއުޅޭ ތަނުގައި އުޅޭ އެހެން މީހުންގެ މައުލޫމާތު ފުލުހުންނަށް ދޭން ޖެހޭ
-
މިނިސްޓަރުގެ ހުއްދަ ނެތި މާލޭން ބޭރަކަށް ނުދެވޭ
-
އެ މީހެއްގެ މާލީ އަދި މުވާސަލާތީ މުއާމަލާތްތަކާއި މުދާ ކޮންޓްރޯލް ކުރުމުގެ ބާރު ފުލުހުންނަށް ލިބޭ
-
އެ މީހުންގެ ހަށިގަނޑުގައި ނުވަތަ ދިރިއުޅޭ ތަނުގައި ވެސް ޓެގް ހަރު ކުރެވިދާނެ
-
އިތުރަށް ކިޔާލަން - ޔާމީނާއި ރިލްވާންގެ މަރު: އަހުމަދު އިސްމާއިލް ދޫކޮށްލައިފި