ކޮމިޓީތައް އެކުލަވާނުލެވި އޮތުމުން އިވާގެ އިތުބާރުނެތް ކަމުގެ މައްސަލަ މަޑުޖައްސާލައިފި

ރައްޔިތުންގެ މަޖިލީހުގެ ކޮމިޓީތައް އަދިވެސް އެކުލަވާނުލެވި އޮތުމުން، މަޖިލީހުގެ ނައިބު ރައީސް އިވާ އަބްދުﷲ މަގާމުން ވަކިކުރުމުގެ މައްސަލަ ކުރިއަށް ގެންދިޔުން މަޖިލިސް އިދާރާއިން މަޑުޖައްސާލާފައިވާ ކަމަށް މެންބަރުންނަށް މިއަދު އަންގައިފި އެވެ.

އެނގުން މުހިންމު - ރައްޔިތުންގެ މަޖިލީހުގައި ސިޔާސީ ޕާޓީތައް ތަމްސީލު ކުރާ މެންބަރުންގެ އަދަދުތަކަށް މިދިޔަ މަހު ފަހުކޮޅު އައި ބަދަލާ އެކު، އަލުން ކޮމިޓީތައް އެކުލަވާލަން ޖެހެ އެވެ. ނަމަވެސް، ޕާޓީތަކަށް އެކަމުގައި އެއްބަސްނުވެވި، ކޮމިޓީތަކުގެ މަސައްކަތް އޮތީ ހުއްޓިފަ އެވެ.

ވީ ކިހިނެއް؟ - މަޖިލީހުގެ 50 މެންބަރުން ސޮއިކޮށް، އިވާ މަގާމުން ވަކިކުރުމުގެ މައްސަލަ މަޖިލީހަށް ހުށަހެޅީ، މިދިޔަ މަހު ފަހުކޮޅު އެވެ. އަދި ކުރިން އެޖެންޑާކޮށްފައިވާ ގޮތުން މި މައްސަލާގައި ދިން 14 ދުވަސް ނޯޓިސް ހަަމަވުމާ އެކު، އަންނަ އާދިއްތަ ދުވަހު ޖަލްސާއެއް ބާއްވައިގެން އެ މައްސަލަ ކުރިއަށް ގެންދިޔުމަށް އޮތީ ނިންމައިފަ އެވެ.

ނަމަވެސް މަޖިލީހުގެ އަމީން އާންމު، ފާތުމަތު ނިޔުޝާ މިއަދު މެންބަރުންނަށް ފޮނުވި ސިޓީއެއްގައި ވަނީ އެ މައްސަލަ މިވަގުތަށް އެޖެންޑާއިން ނެގި ކަމަށް ވިދާޅުވެފަ އެވެ. 

ތަފްސީލު - ނިއުޝާ މެންބަރުންނަށް ފޮނުވި ސިޓީގައި ވިދާޅުވީ ކޮމިޓީތައް އެކުލަވާލެވި އަދި ފާސްކޮށްފައި ނުވާތީ، މަޖިލިސް ގަވައިދުގެ ދަށުން މިފަދަ މައްސަލަތަކުގައި ބަހުސް ކުރަން ކަނޑައަޅަން ޖެހޭ ވަގުތު އަދި އޮތީ ކަނޑަނޭޅި ކަމަށެވެ.

"ވީމާ މަޖިލިސް ގަވައިދުގައިވާ ގޮތުގެ މަތިން، މަޖިލިހުގެ ނައިބު ރައީސްގެ މަގާމުން ގަލޮޅު ދެކުނު ދާއިރާގެ މެންބަރު އިވާ އަބްދުﷲ ވަކިކުރުމަށް ހުށަހަޅާފައިވާ ގަރާރާ ގުޅިގެން ބަހުސް ކުރުމުގެ ވަގުތު ކަނޑައަޅައި ނިމުމުން، އެ ގަރާރު އެޖެންޑާ ކުރެވޭނެ ތާރީހެއް ފަހުން އަންގާނެ،" ސިޓީގައި ނިޔުޝާ ވިދާޅުވި އެވެ.

ފާހަގަކޮށްލެވޭ ކަމެއް- އިވާގެ މައްސަލަ މަޑުޖައްސާލި އިރު، ފޮރިން މިނިސްޓަރު އަބްދުﷲ ޝާހިދު މަގާމުން ވަކިކުރަން އިދިކޮޅުން ހުށަހެޅި މައްސަލަ ވެސް އެޖެންޑާ ކުރުމަށް ފަހު، ފަހުން ވަނީ އެޖެންޑާއިން ނަގައިފަ އެވެ. އެ މައްސަލަ ވެސް މަޑުޖައްސާލީ، ކޮމިޓީތައް އެކުލަވާނުލާ އޮތުމުންނެވެ. އޭގެ އިތުރުން، ބަންޑާރަނައިބު އިބްރާހިމްގެ ރިއްފަތުގެ އިތުބާރު ނެތް ކަމުގެ މައްސަލަ ވެސް އެ ސަބަބާ ހުރެ ވަނީ މަޑު ޖައްސާލައިފަ އެވެ. އެއީ، އެ މައްސަލައިގެ ތެރެއިން ރިއްފަތާ ގުޅޭ އިމްތިޔާޒުގެ މައްސަލައެއް ހުށަހަޅާފައިވާތީ ކަމަށް އެދުވަހުގެ ޖަލްސާގައި ރިޔާސަތުގައި އިންނެވި ނަޝީދު ވަނީ ވިދާޅުވެފަ އެވެ.

ގުޅުން ހުރި ކަމެއް- ކޮމިޓީތައް އެކުލަވާނުލެވި، އިތުބާރު ނެތް ކަމުގެ ތިން މައްސަލަ މަޑުޖައްސާލާފައިވާ އިރު، އިއްޔެ އެމްޑީޕީގެ ޕާލިމަންޓްރީ ގްރޫޕުން ވަނީ ނަޝީދު، މަޖިލިސް ރައީސްކަމުން ވަކިކުރަން 54 މެންބަރުންގެ ސޮޔާ އެކު ހުށަހަޅައިފަ އެވެ. އެމްޑީޕީން ތުހުމަތު ކުރާ ގޮތުގައި ކޮމިޓީތައް އެކުލަވާނުލާ އޮތީ ގަސްތުގަ އެވެ.

އިތުރަށް ކިޔާލަން: