މިއަދު ކްރިމިނަލް ކޯޓުން ބޭއްވި އޮންލައިން އަޑުއެހުމުގައި ހަލީމަތި ލަމްހާ އަބްދުއްރަހްމާން:
ލަމްހާ އެދުނީ ގޮތް ބަލައިލަން ބަންދުން ދޫކޮށްލަ ދޭން؛ ލުޔެއް ނުދިން
އުމުރުގެ ހަގުކަމާއި ނަފްސާނީ ހާލަތު ތަން ނުދޭތީ ގޮތް ބަލާލަން 100 ދުވަހުގެ މުއްދަތަކަށް ބަންދުން ދޫކޮށްލަދިނުމަށް އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް އޮނެޑް ޕިނެޑާ (މޭރީ)ގެ މަރުގެ މައްސަލާގައި ދައުވާ އުފުލާފައިވާ ހަލީމަތު ލަމްހާ އަބްދުއްރަހްމާނު ކޯޓުގައި މިއަދު އެދިއްޖެ އެވެ.
ނަމަވެސް ކޯޓުން ނިންމީ ބަންދުން ދޫކޮށްލަން ޖެހޭ ސަބަބެއް އަދި ނެތް ކަމަށެވެ.
ވީ ކިހިނެއް؟ - 19 އޮކްޓޫބަރު 2021ގައި މއ. އުދުހޭކޮކާގޭގެ ފުރަތަމަ ފަންގިފިލާގައި ދިރިއުޅެމުން އައި މޭރީގެ ބޮލާއި ކަރަށް ހަމަލާދީގެންނާއި ނޭވާ ހާސްކޮށްލައިގެން މަރާލާފައިވާ ކަމަށް ބުނާ މައްސަލާގައި ލަމްހާގެ އިތުރުން މޭރީގެ ފިރިމީހާ މާވިން އެސްވައި ވާގަސްގެ މައްޗަށް ވެސް ދައުވާ ވަނީ އުފުލައިފަ އެވެ.
މާވިންގެ ލޯބިވެރިޔާ ކަމަށް ބުނާ ލަމްހާގެ މައްޗަށް ތިން ދައުވާ އެެއް ކުރެ އެެވެ. އެއީ؛
-
އެނގި ހުރެ މީހަކު މެރުމުގައި ބައިވެރިވުން؛ ދައުލަތުން ކޮށްފައިވާ ދައުވާގައި ވާ ގޮތުން މޭރީ މަރާލާފައިވަނީ މާވިން އާއި ލަމްހާ ދުރާލާ ރާވައިގެންނެވެ. އަދި މޭރީ މަރާލުމަށް މާވިންއަށް ލަމްހާ އެހީތެރިވެދީފައި ވެއެވެ.
-
ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުން؛ ދައުލަތުން ކޮށްފައިވާ ދައުވާގައި ވާ ގޮތުން މޭރީ މަރާލުމަށް ދުރާލާ ތައްޔާރުވެ، އައިޖީއެމްއެޗް އިން ބޭރުކުރުން މަނާ ކޮންޓްރޯލް ޑްރަގްސްތަކެއް ލަމްހާ ގެއަށް ގެންގޮސްފައިވެ އެވެ. އެތަކެތި ލަމްހާގެ ކޮޓަރި ތެރެއިން ފެނިފައިވާ ކަމަށް ދައުލަތުން ބުނެ އެވެ.
-
އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ
-
ދައުވާތައް ސާބިތުވެއްޖެ ނަމަ ދެ މީހުންނަށް ވެސް މަދުވެގެން 10 އަަހަރުގެ ޖަލު ހުކުމެއް އަންނާނެ
ތަފްސީލް - މި މައްސަލާގައި މިހާރު ކުރިއަށްދަނީ ދައުވާ ސާބިތުކުރަން ދައުލަތުން ހުށަހަޅާފައިވާ ހެކިވެރިންގެ ހެކިބަސް ނެގުމެވެ. މިއަދުގެ އަޑުއެހުމުގައި ތިން ފަރާތެއްގެ ހެކިބަސް ނެގުމަށް ފަހު އަޑުއެހުން ނިންމާލުމުގެ ކުރިން ލަމްހާގެ ފަރާތުން ބަންދު މުރާޖާކޮށްދިނުމަށް އެދިފައިވާ އެދުމާ މެދު ގޮތް ނިންމި އެވެ.
ލަމްހާގެ ވަކީލު އަހްމަދު ޔާމީން ކޯޓުގައި ވިދާޅުވީ:
-
ލަމްހާ ބަންދުގައި ބަހައްޓާފައި ވަނީ މުޖުތަމައުއަށް ނުރައްކާވާ ކަމަށް ބުނެ، މި ހާލަތު އަދިވެސް ވުޖޫދުގައި އެބަ އޮތްތޯ ނެތްތޯ ބަލަން ޖެހޭ
-
މުޖުތަމައުއަށް ނުރައްކާ އޮތް މީހެއްތޯ ބެލުމުގައި އެހެން މީހަކު މެދުވެރިވެގެން ކުށް ތަކުރާރުކޮށްފާނެ ކަމަށް ބެލެވޭނެ ހާލަތެއް އޮތްތޯ ބަލަން ޖެހޭ
-
ލަމްހާއަކީ އޭނާއާ ބެހޭ ގޮތުން މުޖުތަމައުގައި ވަރަށް ގިނަ ގޮތްގޮތަށް ވާހަކަދެއްކޭ، ގޯސް ރެޕިއުޓޭޝަނެއް އޮތް މީހަކަށް ވާއިރު މުޖުތަމައުއަށް ދޫކޮށް ލިޔަސް މުޖުތަމައުއަށް ނުކުތުމަށް ލަދުވެތިވާނެތީ އެކަން އެ މަގަކުން ނުހިނގާނެ
-
ލަމްހާއަކީ މިހާރު އައިޖީއެމްއެޗްގައި މަސައްކަތް ކުރާ މީހެއް ނޫން
-
ލަމްހާގެ އުމުރުގެ ހަގުކަމާ އެކު އެހާ ގިނަ ދުވަހު ބަންދުގައި ހޭދަކުރަން ޖެހުމުން އޭނާގެ ނަފްސާނީ ހާލަތު ރަނގަޅެއް ނޫން
-
މި އެދެނީ 100 ދުވަހަށް ބަންދުން ދޫކޮށްލަ ދިނުމަށް؛ އެއަށް ފަހު ކަން ވާ ގޮތަކުން އަލުން ބަންދަށް ނެގުމުގައި އިއުތިރާޒެއް ނެތް
ބަންދުން ދޫކޮށްލުމާ މެދު އިއުތިރާޒު ކުރައްވާ ދައުލަތުގެ ވަކީލު ޝާމާ ނަސީރު ވިދާޅުވީ ލަމްހާއަކީ މުޖުތަމައުއަށް ނުރައްކާވެދާނެ ހާލަތެއް އޮތުމުން ޝަރީއަތް ނިމެންދެން ބަންދުގައި ބަހައްޓަން ޖެހޭ މީހެެއް ކަމަށް މީގެ ކުރިން ނިންމާފައިވާ ކަމަށެވެ.
އަދިވެސް އެ ހާލަތު އެގޮތުގައި އޮތުމުން ބަންދުން ދޫކޮށްލަން ޖެހޭ ސަބަބެއް އޮތް ކަމަށް ނުފެންނަ ކަމަށް ވިދާޅުވި އެވެ. އަދި މަރުގެ މައްސަލައެއްގައި ބަންދުކުރާ މީހާގެ ވިިކްޓިމެއް ނެތަސް އެ ހާލަތުގައި ދެން ބަލަން ޖެހޭނީ މުޖުތަމައުގެ މަސްލަހަތަށް ކަމަށް ދައުލަތުން ފާހާގަކުރި އެވެ.
ދެ ފަރާތުގެ ވާހަކަތައް އަޑުއެއްސެވުމަށް ފަހު ގާޒީ ހުސެއިން ފާއިޒު ރަޝާދު ނިންމެވީ ބަންދުކުރި ސަބަބު އަދިވެސް އެގޮތުގައި އޮތް ކަމަށް ފެންނާތީ ބަންދުން އަދި ދޫކޮށް ނުލެވޭނެ ކަމަށެވެ. އެކަމަކު ދެން އަންނަ އަޑުއެހުމެއްގައި އެ ސަބަބު އިސްތިސްނާވެފައި އޮތް ނަމަ އެކަމާ މެދު ގޮތެއް ކަނޑައެޅިދާނެ ކަމަށް ވިދާޅުވި އެވެ.
އެނގުން މުހިންމު - ދެން މި މައްސަލާގައި އެންމެ އަވަހަށް އަޑުއެހުމެއް އޮންނާނީ އަންނަ މަހުގެ ކުރީކޮޅެވެ.
ކޮމެންޓް (4)
ޝަމްސުއްދީން
ނޮޓް މީ
އިޓްސް މީ
ނިިންނި