މިއަދުގެ ރައްޔިތުންގެ މަޖިލީހުގެ ޖަލްސާގައި މިނިސްޓަރު އަސްލަމް ވާހަކަދައްކަވަނީ
ތިލަމާލެ ބްރިޖު މަސައްކަތުގައި ލަސްކަމެއް އެބަހުރި، އެކަމަކު ތާރީހަށް ނިންމޭނެ: އަސްލަމް
މާލެ އާއި ވިލިމާލެ، ގުޅީފަޅު އަދި ތިލަފުށި ގުޅާލާ ގްރޭޓާ މާލޭ ކަނެކްޓިވިޓީ ބްރިޖު (ތިލަމާލެ ބްރިޖު) މަޝްރޫއުގެ މަސައްކަތުގެ ސްޕީޑު ލަސްކަމަށާއި އެކަމަކު މިހާރު ދީފައިވާ ތާރީހަށް މަސައްކަތް ނިންމޭނެ ކަމަށް ހައުސިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ބްރިޖު މަސައްކަތަށް ދީފައިވާ ތާރީހުތައް
-
މާލެ-ވިލިމާލެ ބްރިޖު ނިންމުން: ޖުލައި 2023 ނުވަތަ އެންމެ ލަސްވެގެން އޮގަސްޓް 2023އަށް
-
ވިލިމާލެ-ގުޅިފަޅު: ޑިސެމްބަރު 2023އަށް
-
ތިލަފުށި-ގުޅިފަޅު ގުޅާލައި މުޅި ބްރިޖު ނިންމުން: ނޮވެމްބަރު 2024އަށް
ތަފްސީލް - ބްރިޖު ލަސްކަމުން އަވަހަށް ނިންމުމަށް އިތުރު 25 މިލިއަން ޑޮލަރު ދީފައިވާ ކަމަށް މައުލޫމާތު ލިބިފައިވާކަން ފާހަގަކުރައްވާ ބްރިޖު މަޝްރޫއު ނިމޭނެ ތާރީހާ ގުޅޭ ގޮތުން މިއަދުގެ މަޖިލީހުގައި މާފަންނު މެދު ދާއިރާގެ ކުރީގެ އެމްޑީޕީ މެމްބަރު އިބްރާހިމް ރަޝީދު ސުވާލު ކުރެއްވި އެވެ.
މި ސުވާލަށް ޖަވާބުދެއްވަމުން އަސްލަމް ވިދާޅުވީ މަސައްކަތުގެ ޝެޑިއުލަށް ބަލާ އިރު ލަސްތަކެއް އެބަ އުޅޭ ކަމަށެވެ. އެކަމަކު މަސައްކަތް ނިންމަން ދީފައިވާ ތާރީހު އިތުރަށް ދިގުކުރުމުގެ ވިސްނުމެއް ނެތް ކަމަށް ވިދާޅުވި އެވެ.
"ކޮންޓްރެކްޓަރުގެ މަސައްކަތުގެ ޝެޑިއުލަށް ބަލާފައި އެބަ ހުރި ޑިލޭ. މިހާތަނަށް އަންނަންވާ މިންވަރަކަށް ނޫން [މަސައްކަތް] އައިސްފައި ހުރީކީ. ކެޗަޕް ކުރެވޭނެ ކޮންމެވެސް މިންވަރަކަށް. އެއްކޮށް ކެޗަޕް ނުކުރެވޭނެ. އެކަމަކު އަދި އަޅުގަނޑުމެން އެކްސްޓެންޝަނެއް ދޭކަށް ގަސްތެއް ނުކުރަން،" އަސްލަމް ވިދާޅުވި އެވެ.
އޭނާ ވިދާޅުވީ ތިލަމާލެ ބުރިޖަކީ ކުރީގެ ސަރުކާރުގައި އެޅި ސިނަމާލެ ބްރިޖު ގޮތަށް ވަގުތީ ޕްލެޓުފޯމެއް އަޅައިގެން މަސައްކަތްކުރާ މަޝްރޫއުއެއް ނޫން ކަމަށެވެ. ފުރަތަމަ ދެ ތަނބު ފިޔަވައި މިހާރު ޖަހާފައި ހުރި އެހެން ތަނބުތަކަކީ ބްރިޖުގެ އަސްލު ތަނބުތައް ކަމަށް ވިދާޅުވި އެވެ.
އިންޑިއާގެ އެފްކޮންސްއިން މި ބްރިޖްގެ ތަނބުތައް ޖަހަނީ ޕްލެޓްފޯމްތަކެއް ބޭނުންކޮށްގެންނެވެ. ސިނަމާލެ ބްރިޖްގެ މަސައްކަތްކުރީ މާލެ އާއި ހުޅުލޭ ކޮޅަށް ވަގުތީ ފާލަމެއް ހަދައިގެންނެވެ. ކަނޑު ގަދަވިޔަސް، އެއް ތަނުން އަނެއް ތަނަށް ސާމާނު ގެންދަން ދައްޗެއް ނޯވެ އެވެ.
އަސްލަމް ވިދާޅުވީ ލަސްތަކެއް ހުއްޓަސް ޝްރޫއު ކުރިއަށް ނުދާ ކަމަށް ގަބޫލުނުކުރައްވާ ކަމަށެވެ.
ބްރިޖުގެ މުހިންމު ތަފާސްހިސާބުތައް:
-
އަގު: 500 މިލިއަން ޑޮލަރު (6.2 ބިލިއަން ރުފިޔާ)
-
100 މިލިއަން ޑޮލަރު (1.55 ބިލިއަން ރުފިޔާ) އަކީ އިންޑިއާގެ ހިލޭ އެހީ
-
ބްރިޖުގެ މަސައްކަތުގައި ތުރުކީ، ޖަރުމަން އަދި އޮސްޓްރޭލިޔާގެ މާހިރުން ވެސް ބައިވެރިވޭ
-
މުޅި ބްރިޖުގެ ދިގުމިން: 3.6 ކިލޯމީޓަރު
-
220،000 ކިއުބިކް މީޓަރުގެ ސަރަހައްދެއް ހިއްކާ ތޮށިލުން
-
ބްރިޖާ ގުޅިގެންދާ 3 ކިލޯމީޓަރުގެ މަގާއި ފާލަން ހަދާނެ
-
މަޝްރޫއުއަށް ލޯނު ދެނީ އިންޑިއާގެ އެގްޒިމް ބޭންކުން
-
އެފްކޮންސްއާ މަޝްރޫއު ހަވާލުކުރީ 26 އޮގަސްޓް 2021ގައި