އެމްޑީޕީން ކަނޑާލައި ޖަލަށްލާފާނެތީ ކަންބޮޑެއް ނުވޭ: އާޒިމް

ސަރުކާރާ ދެކޮޅަށް ވާހަކަދައްކައިގެން އެމްޑީޕީން ކަނޑާލާފާނެތީ އަދި ޖަލަށް ލާފާނެތީ ވެސް ކަންބޮޑުވެވަޑައިނުގަންނަވާ ކަމަށް މެދު ހެންވޭރު ދާއިރާގެ މެންބަރު އަލީ އާޒިމް އިއްޔެ ވިދާޅުވެއްޖެ އެވެ.

ވީ ކިހިނެއް؟ - ރާއްޖެ އާއި ޗާގޯސްގެ ކަނޑުގެ ސަރަހައްދުގެ އިން ވަކިކުރުމުގެ މައްސަލާގައި އިޓްލޮސްގެ ނިންމުމާ ގުޅިގެން އިދިކޮޅުން ދެކެނީ ދެކުނުގެ އިގްތިސާދީ ސަރަހައްދުން ބައެއް ރާއްޖެއަށް ގެެއްލުނީ ކަމަށެވެ. އެ މައްސަލާގައި ބައެއް ސިޔާސީ ޕާޓީތަކުގެ އިތުރަށް ކުރީގެ ބައެއް ވަޒީރުންނާއި ކުރީގެ ބަންޑާރަނައިބުން ބައިވެރިވާ އިދިކޮޅު އިއްތިހާދެއް އުފައްދައިގެން ސަރުކާރާ ދެކޮޅަށް ދަނީ މަސައްކަތް ކުރަމުންނެވެ.

މި މަސައްކަތުގެ ތެރެއިން:

ތަފްސީލް - 'ކަނޑު ވިއްކުމާ ދެކޮޅު އިއްތިހާދު'ގެ ނަމުގައި ރޭ ބޭއްވި ނޫސްވެރިންގެ ބައްދަލުވުމުގައި، އެމްޑީޕީގެ ތެރޭގައި އުފެދިފައިވާ ދެ ފެކްޝަންގެ ތެރެއިން އެ ޕާޓީގެ ރައީސް މުހައްމަދު ނަޝީދުގެ 'ފިކުރެއްގެ ދިރުން' ފެކްޝަންގެ ފަރާތުން މެދު ހެންވޭރު ދާއިރާގެ މެންބަރު އަލީ އާޒިމް ވެސް ބައިވެރިވެވަޑައިގެންނެވި އެވެ.

ސަރުކާރާ ދެކޮޅަށް އިދިކޮޅުން ހިންގާ ހަރަކާތްތަކުގައި ބައިވެރިވާ އެމްޑީޕީ މެމްބަރުންނަށް ފިޔަވަޅު އަޅާނެ ކަމަށް އެ ޕާޓީން ބުނެފައިވާތީ، އެކަމާ ގުޅިގެން ރޭގެ ނޫސްވެރިންގެ ބައްދަލުވުމުގައި 'ދައުރު'ން ސުވާލުކުރުމުން އާޒިމް ވިދާޅުވީ، އެކަމާ ކަންބޮޑުވެވަޑައިނުގަންނަވާ ކަމަށެވެ.

ބުނީ ކީކޭ؟ - ހިޔާލު ތަފާތުވުން އޮތަސް، ގިނަ ސިޔާސީ ޕާޓީތަކާ އެކު އެ ތަނުގައި އިންނެވީ ވަރަށް މާތް މަގުސަދެއްގައި ކަމަށް އާޒިމް ވިދާޅުވި އެވެ.

"ރައްޔިތުންގެ މަޖިލީހުގެ މެމްބަރެއްގެ ހައިސިއްޔަތުން އަދި އެމްޑީޕީގެ މެމްބަރެއްގެ ހައިސިއްޔަތުން އަަޅުގަނޑަށް ވެދާނެ ކަމެއްގެ ސަބަބުން ބަހެއް ނުބުނެ [ނުހުންނާނަން]. ޕާޓީން ކަނޑާލާފާނެތީ އަދި ޖަލަށް ލާފާނެތީ އެކަމާ އަޅުގަނޑު ކަންބޮޑުނުވާތީ ހަގީގަތުގައި މިއަދު މިތާ މި އިނީ،" އޭނާ ވިދާޅުވި އެވެ.

އާޒިމް ވިދާޅުވީ:

މަޖިލީހަށް ވައްދަން އުޅޭ ރައީސް ސޯލިހް އަޒުލުކުރުމުގެ މައްސަލައަށް ވޯޓު ދެއްވާނަންތޯ 'ދުއުރު'ން ސުވާލުކުރުމުން އާޒިމް ވިދާޅުވީ "ރާއްޖެއިން މަދުވެފައި މި އޮތް ބައި ހޯދުމަށް ކުރަން ޖެހޭ ކޮންމެ ކަމެއް ފިކުރެއްގެ ދިރުމުގެ ފަރާތުން ކުރާނެ އަދި އަޅުގަނޑު ވެސް ކުރާނެ" ކަމަށެވެ.