ހޫނުކަން އިހުސާސްކުރެވޭ ވަރު 40 ޑިގްރީއަށް އަރާތީ ރައްކާތެރިކަމުގެ ފިޔަވަޅު އަޅަން އިލްތިމާސްކޮށްފި

މި މަހަކީ ރާއްޖެއަށް އެންމެ ހޫނުގަދަވާ މަސް ކަމަށާއި ބައެއް ވަގުތުތަކުގައި ހޫނުކަން އިހުސާސްކުރެވޭ ވަރު 40 ޑިގްރީ ސެލްސިއަސްއަށް މައްޗަށް ދާނެތީ ބޭރަށް ނުކުތުމުގައި ސަމާލުވުމަށް މޫސުމާ ބެހޭ އިދާރާ، މެޓް އޮފީހުން މިއަދު އިލްތިމާސްކޮށްފި އެވެ.

ވީ ކިހިނެއް؟ - މިއަދު ހެނދުނު 11ގައި ރާއްޖޭގެ އެކި ކަންކޮޅުތަކުގައި ފިނިހޫނުމިން ހުރި މިންވަރާ އެކު މެޓް އޮފީހުން ކުރި ޓްވީޓުގައިވާ ގޮތުން، އެކި ސަރަހައްދުތަކުގައި ފިނި ހޫނުމިން ހުރީ 31.6 ޑިގްރީ ސެލްސިއަސް އާއި 32 ޑިގްރީ ސެލްސިއަސްއާ ދެމެދުގަ އެވެ.

ތަފްސީލް - ނަމަވެސް މި ދުވަސްވަރު ވައި މަޑުވެ، އޭގެ ސަބަބުން ވައިގެ ތެތްކަން މަތިކޮށް ހިފެހެއްޓިފައި ހުރުމުގެ ސަބަބުން ވައިގެ ހޫނުމިނަށް ވުރެ އިހުސާސް ކުރެވޭ ހޫނިމިން އެތައް ގުނައެއް މަތިވާކަން މެޓް އޮފީހުން ފާހަގަކުރި އެވެ. އެގޮތުން، ރާއްޖޭގެ އެކި ހިސާބުތަކުގައި 'ފީލްސް ލައިކް ޓެމްޕެރޭޗާ' ނުވަތަ އިހުސާސް ކުރެވޭ ހޫނުމިން ހުރީ:

މި ފަސް ސްޓޭޝަނުން ރިކޯޑު ކުރެވޭ ފިނިހޫނުމިން މެޓް އޮފީހުގެ ވައިބާ ގްރޫޕުގައި ކޮންމެ ދުވަހަކު ހެނދުނު 11 އާއި މެންދުރުފަހު 2 ޖަހާއިރު އަދި ހަވީރު 5ގައި ހިއްސާ ކުރާނެ އެވެ. 

ކޮންމެ ދުވަހަކު ވެސް އެންމެ ހޫނު ގަދަވާ ކަމަށް ފާހަގަކުރެވެނީ މެންދުރުފަހު 2 ޖަހާއިރު ކަމަށް މެޓުން ބުންޏެވެ.

އިހުސާސްކުރެވޭ ހޫނުމިން މިހާ މަތިވުމުގެ ސަބަބުން ސިއްހީ ބައެއް މައްސަލަތައް ކުރިމަތިވުމުގެ ފުރުސަތު ބޮޑެވެ. އެކަންކަން ފާހަގަކޮށް، ރައްކާތެރިވުމަށް އެޅިދާނެ ބައެއް ފިޔަވަޅުތައް މެޓް އޮފީހުން ވަނީ ހިއްސާކޮށްފަ އެވެ.

ހޫނު ގަދަ ވުމުގެ ސަބަބުން ދިމާވެދާނެ ބައެއް ސިއްހީ މައްސަލަތައް:

ވަރުދެރަވުން، ބޮލުގައި ރިއްސަ ބޯއެނބުރުން ނުވަތަ އަކުނިވަޔަށް ދެމުން ފަދަ އަލާމާތްތައް ފެންނަ ނަމަ ސިއްހީ ފަރުވާ ހޯދުން މުހިއްމެވެ.

ތުއްތު ކުދިން، އުމުރުން ދުވަސްވީ މީހުން އަދި އަވީގައި މަސައްކަތް ކުރާ މީހުންނަށް މިފަދަ ސިއްހީ މައްސަލަތައް ދިމާވުމުގެ ފުރުސަތު ބޮޑެވެ. އެހެންކަމުން ހޫނު ގަދަ ގަޑިތަކުގައި ތުއްތު ކުދިން ބޭރަށް ނުގެންދިޔުމަށާއި ގެންދަން ޖެހިއްޖެ ހާލަތުގައި ވެސް ރައްކާތެރިކަމުގެ ފިޔަވަޅު އެޅުމަށް މެޓް އޮފީހުން އިލްތިމާސް ކުރެ އެވެ.

ރައްކާތެރިވުމަށް ކުރެވިދާނެ ކަންކަން:

ފަސްމަންޒަރު - ކޮންމެ އަހަރަކު ވެސް ރާއްޖޭގައި އެންމެ ބޮޑަށް ހޫނުގަދަވަނީ އޭޕްރިލް އަދި މެއި މަހު އެވެ. މިދިޔަ އަހަރު ރާއްޖޭގެ ފިނިހޫނުމިން އެންމެ މައްޗަށް އަރާފައިވަނީ އޭޕްރިލް-މެއި ގައި 33.8 ޑިގްރީ ސެލްސިއަސް އަށެވެ.

މޫސުމަށް އަންނަ ބަދަލުތަކުގެ ސަބަބުން ދުނިޔޭގެ ކަނޑުތަކުގެ ފިނިހޫނުމިން އާދަޔާހިލާފަށް އުފުލެން މެދުވެރިވާ 'އެލްނީނޯ'ގެ އަސަރު ވެސް ކުރިއަށް އޮތް ދުވަސްތަކުގައި ރާއްޖެއަށް ވަރަށް ބޮޑަށް ކުރާނެ ކަމަށް މޯލްޑިވްސް މެރިން ރިސާޗް އިންސްޓިޓިއުޓުން އިންޒާރުދީފައިވެ އެވެ.

މި ދުވަސްވަރު ހޫނު ގަދަވުމުގެ ސަބަބުން ކަރަންޓު ބޭނުންކުރާ މިންވަރު އިތުރުވަމުންދާތީ، ކަރަންޓު އިގްތިސޯދު ކުރަން ސްޓެލްކޯއިން ވަނީ ގޮވާލައިފަ އެވެ.