މަޖިލީހުގެ އެސްއޯއީ ކޮމިޓީގެ ބައްދަލުވުމެއްގައި ފެނަކައިގެ މެނޭޖިން ޑިރެކްޓަރު އަހްމަދު ސައީދު މުހައްމަދު ވާހަކަދައްކަވަނީ (ފޮޓޯ/ މަޖިލިސް)
ފެނަކައަށް ގަތީ 2.9 މިލިއަން ރުފިޔާގެ ލަގްޒަރީ ކާރެއް
އަތޮޅުތަކުގެ ރަށްތަކުގައި ކަރަންޓުގެ ހިދުމަތް ދޭ ސަރުކާރުގެ ޔުޓިލިޓީ ކުންފުނި، ފެނަކައިން 2.9 މިލިއަން ރުފިޔާގެ ލަގްޒަރީ ކާރެއް ގަނެފައި ވާކަން 'ދައުރު'އަށް ކަށަވަރު ކުރެވިއްޖެ އެވެ.
ވީ ކިހިނެއް؟ - އެ ކާރު ގަތުމަށް ފެނަކައިން ތައްޔާރުކުރި ރަސްމީ ޕާޗޭސް އޯޑަރުގެ ސައްހަ ކޮޕީއެއް 'ދައުރު'އަށް ލިބިފައި ވާއިރު، އެ ލިޔުމުން ފެންނަ ގޮތުގައި މިދިޔަ އަހަރުގެ 10 ފެބުރުއަރީގައި ފެނަކައިން ވަނީ 'އެގްޒެކެޓިވް ވޭން'އެއް ގަންނަން 2.9 މިލިއަން ރުފިޔާ އަމިއްލަ ކުންފުންޏަކަށް ދައްކައިފަ އެވެ.
ތަފްސީލް - މި މުއާމަލާތާ ގުޅޭ މައުލޫމާތު އެނގޭ ފެނަކައިގެ މަސްދަރަކުން 'ދައުރު'އަށް ކަށަވަރުކޮށްދިން ގޮތުގައި، އެ ޕޭޗާސް އޯޑަރަށް ގަނެފައި ވަނީ 'އައުޑީ ކިއު7' މަރުކާގެ އެސްޔޫވީއެއް ނުވަތަ ކާރެކެވެ.
'އައުޑީ ކިއު7' އަކީ ދުނިޔޭގެ އެންމެ ލަގްޒަރީ އެއް އެސްޔޫވީ އެވެ. މީގެ އާ ކާރެއްގެ އަގު އުޅެނީ، އައުޑީގެ ރަސްމީ ވެބްސައިޓުގައިވާ ގޮތުން، 59،200 ޑޮލަރު (909،312ރ.) އަށެވެ.
މިދިޔަ އަހަރުގެ ކުރީކޮޅު އެ ކާރު ރާއްޖެ ގެނެސް، ފެނަކައިގެ މެނޭޖިން ޑިރެކްޓަރު އަހުމަދު ސައީދު މުހައްމަދު ދަތުރުކުރައްވަން ބޭނުންކުރާކަން ވެސް ކަށަވަރުވެފައިވެ އެވެ. އެގޮތުން، ފެނަކައިގެ ޓީމެއް ވެސް ބައިވެރިވެގެން މިދިޔަ ފެބްރުއަރީ މަހު މާލޭގައި ބޭއްވި ފުޓްސަލް މުބާރާތަކާއި އެހެނިހެން ބައެއް ރަސްމިއްޔާތުތަކަށް ސައީދު އެ ކާރުގައި ވަޑައިގެންފައިވާ ކަމަށް ފެނަކައިގެ އެއް މުވައްޒަފަށް ވުރެ ގިނަ މުވައްޒަފުން 'ދައުރު'އަށް ކަށަވަރުކޮށްދިނެވެ.
ފަސް މަންޒަރު - ފެނަކައަކީ އެއް އިރެއްގައި ވެސް މާލީ ގޮތުން ރަނގަޅު ކުންފުންޏަކަށް ނުވާއިރު، އެ ކުންފުނީގެ ދަރަނި 2.8 ބިލިއަން ރުފިޔާއަށް އަރަ އެވެ. އެ ކުންފުންޏަށް ތަކެއްޗާއި ހިދުމަތްތައް ފޯރުކޮށްދީފައިވާ ބައެއް އަމިއްލަ ފަރާތްތަކަށް ފައިސާ ނުދީ ގިނަ ދުވަސްތަކެއް ވަމުންދާ ކަމަށް ބުނެ، މިދިޔަ އާދިއްތަ ދުވަހު އޭގެ ތެރެއިން ބައެއް މީހުން ވަނީ ފެނަކައިގެ މައި އޮފީސް ކުރިމަތީގައި މުޒާހަރާ ވެސް ކޮށްފަ އެވެ.
ބުނީ ކީކޭ؟ - އެ ހާލަތުގައި އޮތް ކުންފުންޏަކުން އެ ވަރުގެ އަގު ބޮޑު ކާރެއް ގަތީ ކީއްވެތޯ ސުވާލުކުރުމުން ސައީދު މިއަދު 'ދައުރު'އަށް ވިދާޅުވީ އަގު ބޮޑު "ކާރެއް" ފެނަކައަށް ގަނެފައި ނުވާނެ ކަމަށާއި އޭނާ އެފަދަ ކާރެއް ނުވެސް ދުއްވާ ކަމަށެވެ.
"ކާރެއް" ނުގަންނަ ކަމަށް ވިދާޅުވާއިރު، އެ ޕާޗޭސް އޯޑަރަށް ގަނެފައި ވަނީ ކޮން ކަހަލަ އުޅަނދެއްތޯ ސުވާލުކުރުމުން ސައީދު ވަނީ އެކަން ސާފުކޮށްދެއްވަން އިންކާރު ކުރައްވައިފަ އެވެ. އޭނާ ވިދާޅުވީ "ތިބޭފުޅުން މައުލޫމާތު ހޯއްދަވާ ގޮތަކުން ހޯއްދެވުން ރަނގަޅުވާނޭ" ކަމަށެވެ.
ސައީދު ވިދާޅުވި ގޮތުގައި، ފެނަކައަކީ ރާއްޖޭގައި ވަރަށް ގިނަ ރަށްރަށުގައި ކަރަންޓުގެ ހިދުމަތް ދޭ ކުންފުންޏަކަށް ވާތީ އެ އޮޕަރޭޝަން ހިންގުމަށް ބޭނުންވާ އެކި ވައްތަރުގެ އަގު ބޮޑެތި ސާމާނު އެ ކުންފުނިން އަބަދު ވެސް ގަނެ އެވެ. އަދި އެ ކުންފުނިން އަގު ބޮޑެތި ތަކެތި ގަތުމަކީ އާ ކަމެއް ނޫން ކަމަށާއި އެއީ ރައްޔިތުންނަށް ހިދުމަތް ފޯރުކޮށްދޭން ގަންނަން ޖެހޭ ތަކެތި ކަމަށް އޭނާ ވިދާޅުވި އެވެ.
"މި ތަނުގެ އޮޕަރޭޝަންތަކަށް އެ ވަގުތަކަށް ބޭނުންވާ އެއްޗިހި މި ތަނުން އަބަދު ވެސް ގަންނަމުން ދާނެ. ތިބޭފުޅުން އެހެންވީމާ އެ ވާހަކަތައް ވެސް ލިޔުއްވަން ވާނެ. ދެން މި ތަނަށް ތަކެތި ހޯދުމާއި އެހެން ކަންކަން ހަމަ އަބަދު ވެސް އަޅުގަނޑުމެން އޮންނަ އުސޫލުން ބޯޑްގެ ތެރެއިން ފާސްކޮށްގެން ކުރަމުން ގޮސްފައި ހުންނާނީ،" ސައީދު ވިދާޅުވި އެވެ.
އޭނާ އެހެން ވިދާޅުވި ނަމަވެސް 'ދައުރު'އަށް ލިބިފައިވާ ވެހިކަލް ރަޖިސްޓްރީއިން ދައްކާ ގޮތުގައި މިދިޔަ އަހަރުގެ 9 ފެބުރުއަރީގައި ފެނަކައިގެ ނަމުގައި ޓްރާންސްޕޯޓްގައި ވަނީ 'އައުޑީ ކިއު7' މަރުކާގެ ހުދު ކުލައިގެ ކާރެއް ރަޖިސްޓްރީކޮށްފަ އެވެ. އެއީ ފައިސާ ދެއްކުމުގެ އެއް ދުވަސްކުރި އެވެ. އެ ކާރުގެ ނަމްބަރަކީ، B1B5235 އެވެ. އަދި އެ ކާރުގައި ސައީދު ދަތުރުކުރައްވާތަން ވަނީ އެކި ފަހަރުމަތިން ފެނިފަ އެވެ.
ކޮމެންޓް (14)
ާއައިބޮސް
ހަސަންދީ
ސާބަސް
ކޮމިއިނިސްޓު
ތައްހާނު
ތއްތ
ތަސްނީފް
ބޮކަރު ޖޫސް
ފްރައިޑޭ
ސައިއްޓޭ
ޙެހެ
ބޮކަރު ޖޫސް
ގަމްބެ
ޙަހަހަހަ