ގާޒީ ބިލްޑިން.
ގާޒީ ބިލްޑިން ތަޅާލައި އެ ތަނުގައި ޕާކިން ޒޯނެއް ހަދަނީ
ސަރުކާރުގެ އޮފީސްތަކެއް ހިންގަމުން އަންނަ ގާޒީ ބިލްޑިން ތަޅާލަން ނިންމައި އެ ތަން ހުސްކުރުމުގެ މަސައްކަތް ފަށައިފި އެވެ.
ވީ ކިހިނެއް؟ - މޯލްޑިވްސް ކަރެކްޝަނަލް ސާވިސް އާއި އޮޑިޓަ ޖެނެރަލްގެ އޮފީސް މިހާރު ހިންގަމުން އަންނަ ގާޒީ ބިލްޑިން ތަޅާލުމަށް ނިންމާފައިވަނީ އެ އިމާރާތް ވަރަށް ބޮޑަށް ބާވެފައި ވުމުން ކަމަށް ހައުސިން މިނިސްޓްރީން މިއަދު ބުންޏެވެ.
ތަފްސީލް - ޕްލޭނިންގެ ސްޓޭޓް މިނިސްޓަރު އަކްރަމް ކަމާލުއްދީން މިއަދު 'ދައުރު'އަށް ވިދާޅުވީ، އަންނަ މަހުގެ ނިޔަލަށް އިމާރާތް ހުސްކުރެވޭނެ ކަމަށެވެ.
"މިހާރު ކުރިއަށް ދަނީ އެ ތަނުގައި ހިންގަމުން އަންނަ އޮފީސްތައް ބަދަލުކުރުމުގެ މަސައްކަތް. އެ މަސައްކަތް ނިމުމުން ޖޫން މަސް ތެރޭގައި އިމާރާތް ތަޅާލެވޭނެ،" އޭނާ ވިދާޅުވި އެވެ.
އެ އިމާރާތް ތަޅާލުމަށް ފަހު އެ ތަން ބަދަލުކުރަން ނިންމާފައިވަނީ ޕާކިން ޒޯން އަކަށެވެ.
ގުޅުން ހުރި ކަމެއް - އެ ސަރަހައްދުގައި ހުރި، ސަރުކާރުގެ ގިނަ އޮފީސްތަކެއް ހިންގި ހުރަވީ ބިލްޑިން ވެސް ތަޅާލައި ޕާކިން ޒޯންއަކަށް މިހާރު ވަނީ ބަދަލުކޮށްފަ އެވެ.