އައްޑޫ އިކުއަޓޯރިއަލް ހޮސްޕިޓަލް (ފޮޓޯ/އޭއީއެޗް)
އައްޑޫ އެކްސިޑެންޓުގައި އަނިޔާވި މީހާގެ ސިކުނޑިއަށް ލޭ އެޅިފައި؛ އިތުރު ފަރުވާއަށް މާލެ
އައްޑޫ ހިތަދޫގައި އެމްބިއުލާންސަކާއި ސައިކަލެއް ޖެހި މިއަދު ހަވީރު ހިނގި އެކްސިޑެންޓުގައި އަނިޔާވި މީހާގެ ހާލު ސީރިއަސް ކަމަށާއި އޭނާ މާލެ ގެނައުމުގެ މަސައްކަތް ކުރަމުން އަންނަ އައްޑޫ އިކުއިޓޯރިއަލް ހޮސްޕިޓަލުން މިރޭ ބުނެފި އެވެ.
ވީ ކިހިނެއް؟ - އެ އެކްސިޑެންޓުގައި އަނިޔާވެ ފަރުވާދެމުން އަންނަނީ ސައިކަލު ދުއްވަން އިން 18 އަހަރުގެ ފިރިހެނަކަށެވެ. އޭނާއަށް މިވަގުތު ވެސް އައްޑޫ އިކުއިޓޯރިއަލް ހޮސްޕިޓަލުގައި ދަނީ ފަރުވާ ދެމުންނެވެ.
އެ ހޮސްޕިޓަލުން ކުރިން ބުނީ އޭނާއަށް މާ ބޮޑެތި އަނިޔާތަކެއް ލިބިފައިނުވާ ކަމަށެވެ.
ބުނީ ކީކޭ؟ - ކުރިން އޭނާގެ ހާލު ސީރިއަސް ނޫން ކަމަށް ބުނި ނަމަވެސް، ހޮސްޕިޓަލުގެ އޮފިޝަލަކު މިރޭ 'ދައުރު' އަށް ވިދާޅުވީ، އިތުރު ތަހުލީލުތައް ހެދުމަށް ފަހު އޭނާގެ ސިކުނޑިއަށް ލޭ އެޅިފައިވާކަން ސްކޭންތަކުން ދައްކާ ކަމަށެވެ.
މިި ވަގުތު އޭނާއަށް ފަރުވާދެމުންދަނީ އައިސީޔޫގައިކަން ފާހަގަކުރައްވަމުން އޮފިޝަލް ވިދާޅުވީ، އިތުރު ފަރުވާއަށް އޭނާ މާލެ ފޮނުވުމުގެ މަސައްކަތް މިހާރު ކުރަމުން އަންނަ ކަމަށެވެ.
ފާހަގަކޮށްލެވޭ ކަމެއް - އެކްސިޑެންޓުގެ ފޮޓޯތަކެއް މިހާރު ދައުރުވަމުންދާއިރު، އެމްބިއުލާންސަށް ބޮޑެތި ގެއްލުންތަކެއް ލިބިފައިވާތަން އެ ފޮޓޯތަކުން ފެނެ އެވެ.