ތޫނު އެއްޗަކުން ހަމަލާދީ ޒަހަމްކޮށްލި ޒުވާނާ މަރުވެއްޖެ

މާލޭ ފިހާރައެއްގެ ތެރޭގައި ވަޅިން ހަމަލާދީ މިދިޔަ ހުކުރު ދުވަހުގެ ރޭ ޒަހަމްކޮށްލި މީހާ މިއަދު މަރުވެފައިވާ ކަމަށް އައިޖީއެމްއެޗުން ބުނެފި އެވެ.

ވީ ކިހިނެއް؟ - މާފަންނު މުރަނގަމަގުގައި ހުންނަ، ކޮސްމެޓިކްސް ވިއްކާ 'ކްރާސާ' ފިހާރައިގެ ތެރޭގައި ވަޅިން ހަމަލާދީފައި ވަނީ މުހައްމަދު އަހުމަދު ދީދީ (ނައުއްޓެ)، 30، އަށެވެ. އެ ރެއިން ފެށިގެން އޭނާއަށް ފަރުވާ ދިނީ ވެންޓިލޭޓަރުގަ އެވެ.

އައިޖީއެމްއެޗުން ބުނީ މިއަދު ހެނދުނު 6:45ގައި އޭނާ މަރުވެފައިވާ ކަމަށެވެ.

ތަފްސީލް - ފުލުހުން ވަނީ އެއީ ގޭންގު މާރާމާރީއެއް ކަމަށް ބުނެފަ އެވެ.

މަންޒަރު ދުށް ދެ މީހަކު 'ދައުރު'އަށް ރޭ ކިޔައިދިން ގޮތުގައި، މި ހަމަލާ ދިނީ ހެލްމެޓް އަޅައިގެން ތިބެ ފިހާރައަށް ވަތް ދެ މީހެކެވެ.

މި މައްސަލައިގައި އެކަކު ވަނީ ހައްޔަރުކޮށްފަ އެވެ.