ހަރުކަށި ފިކުރުގެ ޔުނިޓް ހަދަނީ ސިންގަޕޫރު ނަމޫނާއަކަށް ބަލައިގެން؛ ޖޫންގައި ނިމޭނެ: އިމްރާން

ހަރުކަށި ފިކުރުގެ މީހުން އެހެން ގައިދީންނާ ވަކިން ބަންދުގައި ބޭތިއްބުމަށް މާފުށީ ޖަލުގައި ހަދަމުން އަންނަ ހާއްސަ ޔުނިޓް ހަދަނީ ސިންގަޕޫރޫގައި ހަދާފައިވާ އެފަދަ ފެސިލިޓީ ނަމޫނާއަކަށް ބަލައިގެން ކަމަށާއި މި މަސައްކަތް ޖޫން މަސް ތެރޭ ނިންމާލެވޭނެ ކަމަށް ހޯމް މިނިސްޓަރު އިމްރާން އަބްދުﷲ މިއަދު ވިދާޅުވެއްޖެ އެވެ.

ވީ ކިހިނެއް؟ - މަޖިލީހުގެ ޖަލްސާގައި އިމްރާން މިގޮތަށް ވިދާޅުވީ، އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ކުރެއްވި ސުވާލަކާ ގުޅިގެންނެވެ.

ތަފްސީލު - މިފަހުން ޓްރާންސްޕޭރެންސީ މޯލްޑިވްސްއިން މާފުށީ ޖަލާ ގުޅޭ ގޮތުން ހެދި ދިރާސާ ރިޕޯޓަށް އިޝާރާތް ކުރައްވައި މެންބަރު ވަހީދު ވިދާޅުވީ، ހަނގުރާމަވެރި، "ހަރުކަށި ފިކުރުގެ އައްޑާއެއްގެ ގޮތުގައި ޖަލު ބައްޓަން ވެފައި"ވާ ކަމަށެވެ. އެ ރިޕޯޓާ ގުޅިގެން މިނިސްޓްރީން ކުރަމުން ދަނީ ކޮން މަސައްކަތެއްތޯ އޭނާ އެއްސެވި އެވެ.

ތަފްސީލް - އެ ސުވާލަށް ޖަވާބު ދެއްވަމުން އިމްރާން ވިދާޅުވީ، ހަރުކަށު ފިކުރުގެ ގައިދީންގެ ފަރާތުން މުޅި ޖަމުގެ ނިޒާމަށް ކޮންމެ ދުވަހަކު އެކި ގޮންޖެހުންތައް ކުރިމަތިވާ ކަމަށެވެ. ބައެއް ރޭރޭ ވެރިން ނިދިނަގާލަން ޖެހޭ ފަދަ ހާދިސާތައް ދިމާވާކަން އޭނާ ފާހަގަ ކުރެއްވި އެވެ.

"މިހާރު ސީދާ އެފަދަ [ހަރުކަށި ފިކުރުގެ] ފަރާތްތައް ބައިތިއްބާނެ ހައި ސެކިއުރިޓީ ވިންގެއް މާފުށީ ޖަލުގައި ތަރައްގީކުރުމުގެ މަސައްކަތް މިހާރު ދަނީ ކުރިޔަށް. އަޅުގަނޑު އުންމީދު ކުރަނީ، އިރާދަކުރެއްވިއްޔާ މި އަހަރުގެ ޖޫން، ޖުލައި ހިސާބުގައި އެ ވިންގް ނިންމާލެވޭނެ،" މެންބަރުގެ ވަހީދުގެ ސުވާލަށް ޖަވާބު ދެއްވަމުން އިމްރާން ވިދާޅުވި އެވެ.

"އެތަން އަޅުގަނޑުމެން ޑިޒައިންކޮށްފައި އެ ވަނީ ސިންގަޕޫރު ފަދަ، މިފަދަ ފަރާތްތައް ގެންގުޅޭނެ ތަންތަން ޑިޒައިންކޮށްފައިވާ ގޮތް ބަލައިގެން، އަޅުގަނޑުމެންގެ ގައުމުގައި ލިބެން ހުރި ތަނަވަސް ކަމާ އެއްވަރަށް."

އިމްރާން ވިދާޅުވި ގޮތުގައި ސިންގަޕޫރަށް ގޮސް އެތަނުގެ މިފަދަ ފެސިލީޓީ ބެލި ކަމަށެވެ. އެ ފެސިލިޓީ އެ ގައުމުން ހަދާފައި ވަނީ 55 މިލިއަން ޑޮލަރު (402 މިލިއަން ރުފިޔާ) ކަން ފާހަގަކޮށް، އިމްރާން ވިދާޅުވީ ރާއްޖޭގެ ފެސިލިޓީ ހެދުމަށް ހޯމް މިނިސްޓްރީއަށް ބެޖެޓް ލިބުނީ، 35 މިލިއަން ރުފިޔާ ކަމަށެވެ.

"ދެން ބައްލަވާ އަޅުގަނޑުމެން ގެންނަން ޖެހޭނެ ގޮތް. އެހެން ނަމަވެސް ރާއްޖޭގެ މާލީ ތަނަވަސްކަން ހުރި މިންވަރަށް ބަލާފައި އަޅުގަނޑު ގަބޫލު ކުރަނީ، އިރާދަކުރެވިއްޔާ އެފަދަ ފަރާތްތައް ގެންގުޅޭން އެކަށީގެންވާ ވަރުގެ ފެސިލިޓީއަކަށް ވާނެ ކަމަށް،" އިމްރާން ވިދާޅުވި އެވެ.

އެ ސުވާލަށް އިތުރަށް ޖަވާބު ދެއްވަމުން އިމްރާން ވިދާޅުވީ:

"ނަމަވެސް މިހާރު އަޅުގަނޑުމެން ވަކިން ހާއްސަކޮށް، ހަރުކަށި ފިކުރުގެ ފަރާތްތައް އެސެސް ކުރާނެ ޓޫލްތަކެއް ޑިވެލޮޮޕްކޮށް، އެ ފަރާތްތައް އެސެސްކޮށް، އެހެން ގައިދީންނާ ވަކިން ބޭތިއްބެން އޮތް އެންމެ ބޮޑު މިންވަރަކަށް މި ދަނީ އެކަން ކުރުމުން،" އިމްރާން ވިދާޅުވި އެވެ.